Apocalipsis 16

1Benra' bnne to be'nn zillj kwis, zoe' gan' nak latj la'yen', lle'e angl gall ka': —Lelljak lelljararje dan' yoll lo leo kerén' rao yellrion', na' gona' sa'kzi' ake'. 2Na'll byej angl nellen', jararje' dan' yoll lo leo ke'en rao yellrio, na' yeolol be'nn ka' zjazó sen ke bell xi'on, na' nxenra'll ake' lwa'a dan' nak ka leba', bllia ake' we'e xhen we'e zban, na'll bra ake' kwis. 3Na'll jararje angl wllopen' dan' yoll lo leo ke'en lo nisda'on, na' bayak nisda'on llen ka llen ke be'nn wat, na' wasa't yeolol ba lla'a lo nisda'on. 4Na'll jararje angl wyonnen' dan' yoll lo leo ke'en lo yeo ka', na' yeolol ga llar nis, na' leska' bayaken llen. 5Na'll benra' bnne angl be'nnen' llap nis dan' de rao yellrion', lle'e Diosen': —Rwe'n nako' Dios be'nn nak lixheje, ba zokzo' ka za xe yellriote, yel be'nn li ko'o ba nchoybia'o da ka' llak ni. 6Le be'nn lla'a yellrio ni, ba baso'te' be'nn ka' be'e xti'llo'n, na' ba baso'te' nollre be'nn bxenra'll rwe'. Na'llen' ba beno' ye'j ake' llen ni, dan' brarj ake' xchen be'nn ka'. Na' ka' llaya'lkze gak ke ake'n kan' llak ke ake' nna'. 7Na'll benra' bnne to be'nne lloa' bkoyen', bne'e: —Xa Dios, rwe'n napo' le zerawe yel wak xhen, llono' dan' llaya'l gono', na' llono' da zej lixheje kat bi da llchoybia'o ke be'nne. 8Na'll jararje angl wdapen' dan' yoll lo leo ke'en rao willen', na' bzey willen' be'nnach ka'. 9Na' be'nn ka' byey ake', na' bi bayat akre' ni ke bayoe'xhen akze' Dios, yezikre blliayi'll ake' Diosen', be'nnen' be'e latje llak da ki. 10Na'll jararje angl wga'yen' dan' yoll lo leo ke'en gan' lli' bell xi'on llnebia'ba'n, na' doxhente bayak xchol gan' llnebia'ba'n, be'nnach ka' to llyi'nn roll ake' katken' llallayrao ake'n. 11Na' bi bsan akse' bill gon ake' da xhinnjen', blliayi'll aklle' Diosen' be'nnen' llia yebá na', la'kze llallayrao ake'. 12Na'll jararje dan' yoll lo leo ke angl wxhopen' lo yeo xhen dan' nzi'i Eufrates, na' bayo'j yeon' nench byarj to nez ga te be'nn wnebia' ka' za'k do gan' llra' willre. 13Na' bre'ra' chonn daxi'o da nak ak ka loll bcheko. Ton bllojen lo lloa' bel xi'on zo gall yichj na', ye ton bllojen lo lloa' bell xi'o na', na' ye ton blloj lo lloa' be'nnen' lloe' di'll wenra'll na', nench nxenra'll ake' bell xi'o na'. 14Na' daxi'o ki ben aken yel wak da babane be'nne, na' jatop aken yeolol be'nn wnebia' ka' zjalla'a do gateze yellrio ni, nench tilrén ake' Dios be'nnen' nap le zerawe yel wak xhen kat llin lla. 15Na' Xhi'nn Diosen' bne'e: —Ba rez yeda' da yobre, ka llin to be'nn wan llillize. Nbaraz ke be'nn ka' zjani't bez ake' nada' kat yeda', llon ake' ka be'nn llap xhara'n, nench ke ta ake' gal yid ake', na' re'e be'nn ka' yel zdo' ke ake'n. 16Na'll daxi'o ka' batop ake' be'nn ka' nak wnebia' lla'a yellrio ni, to latj gan' nzi'i Armagedón di'll Hebreo. 17Na'll jararj angl wgallen' dan' yoll lo leo ke'en rao lla, na'll benra' bnne Diosen' latj la'yen' zillje, gan' zoe' lloe'rao ake' Le'e yebá gan' llie' na', bne'e: —Ba gok da llaya'l gak. 18Na' byep yes, gok llakia, na' gochj, na' bxho'. Bxho'lle da xhenll ka to llxho'kze chak ba blla'a be'nn yellrio ni. 19Na' yell dan' nakll da brao yellrion' goken chonnre, leska' blleyi' yezikre yell da zjalli' rao yellrio ni. Diosen' jadinra'lle' yell Babilonian', na' ka da xhinnj ka' baso'ne' nench na' wsa'kzie' leake'. 20Na' ka da xhen na' bxho'n, barante yeolol yellrio dan' zjalli' lo nisda'on, na' yeolol ya' ak. 21Na' blle' yej se'd yele rao yellrion', da nak ka do tap rrob wej btekon be'nne. Na'll blliayi'll be'nn ka' Diosen' ke dan' ballayrao ake'n, ke nak yej se'd xhen ka' bsa'kzi' leake'n.

will be added

X\