Apocalipsis 14

1Ka bwia' na' bre'ra' be'nnen' nak ka xhi'r da'on, zelle'e rao ya' dan' nzi'i Sión, na' ren to gayoa tapayon mir (144,000) be'nn yobre. Nyoj roxhga ake'n ra xhi'r da'on ren ra Xe'e. 2Na' benra' llak llakia yebán', ka ga de yeo xhen, na' ka nen kat llachj yi'wzi'o, na' ka ga lla'a be'nn zan, llsill ake' dan' ne arpa to chi'ze. 3Na' bel ake' to da kobe rao Diosen', na' rao be'nn tap ka' zjallia xir na', na' rao be'nn brao tapalloa ka' (24) gan' llia Dios na'. Nollre no be'nne gok gol len, zerao be'nn to gayoa tapayon mir ka'ze, gok bsed ake' dan' bel ake'n, leake'n basrá Criston' chak nna ni't ake' yellrio. 4Be'nn ka' bel ake'n nak ake be'nn bi jatil no're, bdapchi'i kwin ake' nench gok ake' yall rao Diosen'. Nao akteze' xhi'r da'on gateze zeje', na' basre'e leake' nench nak ake' be'nn ke'e, na' be'nn ke Dios. Na'llen' nak ake' ka to da llarap ake' da nelle, da be'e ake' Diosen' ren xhi'r da'on. 5Gaga be'e ake' di'll wenra'lle, na'llen' bibi do'l de ke ake' rao Dios. 6Na'll bre'ra' ye to angl le' yebán' de'e rao lla. Na' bdixjwe're' Di'll Wen ke Diosen' da bi te ke rao be'nn zjalla'a yellrio, ren be'nn wde wdere yell xhen, na' wde wdere yell da'o, na' wde wdere dialla ke be'nnach, na' be'nn llak wde wdere di'll da de yellrio. 7Bnne'e zillje, lle'e leake': —Lelleb Diosen', na' lewe'xhene', le ba bllin lla gone' yel koxchis ke be'nnach. Lewxenra'll Dios be'nnen' ben yebán', na' yellrio, na' nisda'o, na' do ga llar nis. 8Ye to angl za'a ko'llre, bne'e: —Ba bllin lla kweyi' yellen' nzi'i Babilonia dan' nak da brao. Ba bllin lla kweyi' yell ke be'nn ka' bkwas ake' ka'le ke Diosen', na' bpe akre', na' bko'yel akre' yeolol be'nne bnao ake llon ake' kan' llon leake' na', na' nnello gok ake' ka be'nn bzollre', le benrén ake' le'e txhen rao da xhinnj ke'en. 9Na'll ye to angl zej ko'lltere be'nn wyonne, na' bnne'e zillje, na' bne'e: —Cha' no be'nne wxenra'lle bell xi'on ren lwa'a keba' na', na' we'e ake' latje so ake' sen ke bell xi'on roxhga ake' o na'a ake', 10Diosen' ba bllie' bia'a sa'kzi' ake' gan' lla'lnninn dan' nzi'i azufre rao be'nn ka' nak angl ke Dios, na' rao be'nnen' nak ka xhi'r da'o na'. 11Ke chnare chas llén ke yi' gan' sa'kzi' be'nn ka' nxenra'll bell xi'on ren lwa'a keba' na', na' be'nne zjazó sen keba'n roxhga ake' o na'a ake'n, bi yezi'ra'll ake' ke yel llza'kzi'n do lla do yere. 12Ke len na' llaya'l gakxhenra'll-llo, lli'o nakllo rallna'a Diosen', na' llzoallo di'll dan' nllie' bia'a gonllo na', na' bi llbej yichjllo dan' nxenra'll-llo Jesúsen'. 13Na'll benra' to be'nn zo yebán' na' bne'e: —Bzoj da ni: “Nbaraz ke be'nn ka' nxenra'll Xanllon' llinte lla gat ake'.” Na' Spíritu ke Diosen' nen: —Da li kwisen' nni't ake' nbaraz, le yezi'ra'll ake' rao xchin ake', na' xchin ake' da ka' ben ake' na', len wroe'n yeolol da wen da ba ben ake'. 14Na'll bwia' da yobre, na' bre'ra' to bej lliche le' yebán', na' ko'll bej na' llia to be'nne nake ka Be'nnen' Gorj Radj Be'nnach. Na' nzoe' to corona de ya cha'o dan' nzi'i oro, na' no'xe' to ya da látit lloe' dan' nzi'i hoz. 15Na' blloj ye to angl loe gan' lloe'rao ake' Diosen' yebá na', na' bnne'e zillje, llalwille' be'nnen' llia ko'll bejen': —Bxhi'i ya da látit ko'on, na' barap, le ba bllin lla yetopo' dan' bllia rao yellrion', le ba byechen. 16Na' be'nnen' llia ko'll bejen', le be'xte' ya dan' látit rawen', na' batope' dan' bllia rao yellrion'. 17Na'll blloj ye to angl loe gan' lloe'rao ake' Diosen' yebán', na' leska' no'xe' ye to da látit rawe. 18Na'll blloj ye toe' be'nn yo' rallne'e yi' da lla'le kwit bkoy gan' lloe'rao ake' Diosen'. Na' angl na' bnne'e zillje, na' balwille' be'nnen' no'x ya da látiten', na' lle'e le'e: —Ba we uvas dan' llia rao yellrion'. Bachoyen kone ya ko'o dan' nlátit na', nench yetopllon. 19Na'll bachoy anglen' uvas dan' llia rao yellrion' kone ya dan' látit ke'e na', dan' no'xe' na', na'll batope'n bza'le'n to lo da nak ka cha' xhen ga llsi ake'n lloj xise. Zeje di'll Dios na', batope' be'nn ka' bi bzoa xti'lle'n, na' broe' leake' ga sa'kzi' ake' yellayrao ake'. 20Na' gan' bxha'kzi' ake'n naken lloa' yell, na' lo dan' nak ka cha' xhen gan' blle'e uvas ka', brarj llen xhen dan' nak xchen ake' na', na' bllinen ka to sibe lloa' kabay, na' bllirjen chonn gayoa mir (300,000) metr.

will be added

X\