Apocalipsis 13

1Na' bzia' lloa' nisda'on, na' bre'ra' blloj to bell xi'o lo nisda'on. Zo galle yichjba', na' llia chi lozba', na' toto lozba' nzoan twej corona. Na' toto yichjba'n nyojen raba' da lltitje Dios. 2Bellen' nakba' ka ba znia ban' nzi'i leopardo, na' nia'na'ba'n naken ka nia'na'a ban' nzi'i oso, na' lloa'ba'n naken ka lloa' bell yi'xe. Na' bel xi'o ban' zo gall yichj, be'ba' bellen' yel wak, na' yel llnebia' keba'n nench bnebia'ba'. 3Na' bre'ra' to yichj bellen' naken we'e, naken ka da gatrenba', na' bayakba'. Na' yeolol be'nne babán akre' dan' bayakba' na', na' benrén akeba' txhen. 4Yeololze be'nn be'rao ake' belen' dan' be'ba' yel llnebia' ke bell xi'on, na' leska' be'rao ake' bell xi'on, bne ake: —Nono llra' be'nn nape yel llnebia' xhen ka bell ni, na' nono soe tilrén leba'. 5Na' be'e ake' latje ke bellen' benxhen kwinba', na' bnneba' zban ke Diosen'. Na' gok rallna'ba' nnebia'ba' chopayon (42) be'o. 6Na'll bnneba' zban ke Diosen', na' ke latj le' yebán' gan' zoe' na', na' ren ke yezikre be'nne zjalla'a yebá na'. 7Na' go't latj ke bell xi'on bdilrenba' be'nn ka' nak rallna'a Dios, na' bi bzoe akereba'. Na' be'e latj bnebia'ba' yeolol yell xhen, yeolol yell da'o, yeolol dialla be'nn, na' yeolol be'nn llak wde wdere di'll da de yellrio ni. 8Na' yeolol be'nn zjalla'a rao yellrio, be'nn bi nyoj ra ake' le' yich ke be'nn ka' ga't yel nban ke ake', bxenra'll ake' bellen', le ka bxhe yellriote bzoj be'nnen' nak ka xhi'r dao, ra yeolol be'nn nnezre' ga't yel nban zejlikane ke ake' le' yich ke'en, le'e nake' xhi'r da'on baso't ake'. 9Cha' no zo nay, lewzenay dan' nia' ni. 10Be'nnen' ba naken go'x ake' wsej ake' le'e, go'x akse' le'e na' cheyje'. Na' be'nnen' ba naken gate' kone spad, kone spad na' gate'. Ke len na' llaya'l sechoch lli'o ba brej Diosen' nak rao ne'e, gapra'll-llo bi da llak kello, na' seteze sello wxenra'll-lloe'. 11Bde na' bre'ra' ye to bell xi'on ba blloj lo yo. Na' zo chop lozba' da nak ka loz xhi're, na' bnneba' kan' bnne bel xi'o ban' zo gall yichj na'. 12Na' bell xi'o nellen' benba' nench nnebia' bell xi'o wllopen' ka leba', na' bell xi'o wllopen' benba' nench yeolol be'nn lla'a yellrio, wxenra'll ake' bell xi'o nellen' ban' bayak we'e keba' dan' nak zi gatrenba'. 13Na' bell xi'o wllope na', benba' da zan da babane be'nne kone yel wak keba' na', na' benba' nench ra'll yi' le' yebán', yexjen rao yellrio, re'e be'nne. 14Na' benba' da ka' gan' zo bell xi'o nellen', bxhiye'ba' be'nn lla'a yellrio nench ben akeba' txhen. Na' gollba' be'nn ka', ben ake' to lwa'ba' da nak ka bell nell na', bell ban' gok yichjba' we'e kone spad, dan' nak zi got leba', na' bayakba'. 15Na' gok rallna'a bell wllopen' gonba' nne lwa'a lsa'kba'n, na' gokte bnnen, na' blliaba' bia'a baso'te be'nne bi wxenra'll len. 16Na' bell xi'o wllopen' leska' benba' bien bzo yeolol be'nne sen ke bellen', na'a ake' cha'we o cha' roxhga ake', no be'nn gore no bida'o ak, na' be'nn wnia', be'nn ya'che, no be'nn nak be'nn wen llin ke be'nne, na' be'nn bi nak be'nn wen llin ke be'nne. 17Na' be'nn bi soe' sen ke bellen' o raba' o ka to nbab raba' na', bibi gok bi sie' bi da sie', na' bibi gok go'te. 18Yálljello yel si'n na', nench chejnie'llo da ki. Be'nne chejnie're wak wie' ka to nbab raba'n, le to ka'tzen' nbab ra to be'nnach, na' naken xop gayoa wyon xope (666).

will be added

X\