Apocalipsis 12

1Bre'da'ora' to da yebánello le' yebán', bre'ra' to no're nechje' willen', na' naken ka xhe'e. Na' nreje' lo be'on, na' nzoe' to corona da llia chllinn (12) berj. 2Na' no'r na' noe' bda'o, na' llosie', llake' bes ke yel san. 3Na' bre'ra' ye to da nak zi yebánello le' yebán', bre'ra' to bel xi'o ba zo galle yichj to ba xhen kwis nakba'. Nakba' ba xhna, na' llia chi lozba', na' toto yichjba'n xhoan twej corona. 4Na' kone xhbanba' na', blle'lle'oba' ra't berj da ka' llia yebán', na' bza'lba'n rao yellrion'. Na'll le brezteba' xhnie' no'ren', ba rez so bda'o ke'e na', nench gaoba' bda'o ke'en kate ra'be'n. 5Kat le bxhante no'ren' to bida'o byio, bi nnebia' yeolol yell ka', na' gonbe' wzenay ake' kebe'. Na' le bazi'te Diosen' lebe' gan' llie' llnebie' na'. 6Na'll baxhonnje no'ren' belen', bayeje' to latj dach ga bencha'o Diosen' ke'e, ga we'e ake' da ye'j gawe' rao to mir chop gayoa wyon (1,260) lla. 7Bde na' gok to wdile yebán', le angl brao re Miguel ren angl ka' llakrén le'e, bdilrén ake' bel xi'o ban' llia galle yichjen', ren angl ke belen', be'nn ka' bayak daxi'o. 8Na' belen' ren daxi'o ka' bi bzoe akre'n angl be'nnen' nake be'nn ke Diosen', na' billbi latj go't ke belen' yebán'. 9Na' angl ke Diosen' bza'l ake bel xi'on rao yellrio, ban' nak xan daxi'o ka', ban' zo kana'te nakba' ba wxhiye'e, na' leba'n Satanás, na' nna zokzba' nna', ziye'ba' be'nne. 10Na'll benra' bnne to be'nn zo yebán' zillj kwis ne'e: —Ba bllin lla yesrá Dios kellon' be'nn ka' llonlira'll Le'en, ba bllin lla llakbe'llo nap Diosen' yel wak xhen, ba bllin lla llnebie' nench gak kon da llaya'l gak. Ba bllin lla Cristo be'nnen' breje' nnebia'n, ba llnebia'rene' Le'e. Gak da llaya'l gak, le daxi'o dan' ba bzo rao Diosen' do lla do yer, blliayi'llen be'nn llonlira'll Criston', ba babej ake'n ko'llre. 11Be'nn ka' benlira'll Criston' ben ake' gan, le bzoe akre' gopra'll ake', kan' be'e ake' di'll dan' byejle' ake' ke Jesucriston', na' byejle' ake' dan' brarj xchene', ni ke lli'o goke' ka xhi'r da'o, na' bi blleb ake' cha' biteze gok ke ake', na' bzo ake' xhnid la'kze gat ake'. 12Ke len na' llaya'l yewé be'nn lla'a yebá, llaya'l gosia're yel llawé, zan re' lla'a yellrion' nya'chraz gak keré, ren re' lla'a nisda'o, le ba betj daxi'on gan' zore, na' llaklla'n le ye chollzen' de latj ke. 13Na'll ka gokbe'e bel xi'on bza'l akeba' rao yellrion', gokra'llba' wrayba' no'ren' bxhan bida'o byion'. 14Bixha be'e Diosen' chop xir no'ren' da xhen, ka xir bsia nench byeje' latj dach ga bill gok chej belen', latj gan' bencha'we' ke'e gan' we'e da ye'j gawe' chonn iz ye achje. 15Na' blloj nis xhen lo lloa' belen' goken to yeo xhen, bllinen gan' zo no'ren', na' wa'chachen le'e. 16Bixha Diosen' bene' byarje rao yellrion', gokrenen no'ren' we'n nisen' blloj lo lloa' belen'. 17Na'll goklla'a belen' no'ren', na' byejba' jatilrenba' yezikre xhi'nn xhosoe' ka', dan' llzoa ake' xti'll Diosen', llon ake' kon kan' bllia Diosen' bia'a, na' zo ake' nxenra'll ake' xti'll Jesucriston'.

will be added

X\