Apocalipsis 11

1Na'll benn anglen' nada' to xhis yia da nak ka da llonrén ake' llin ga ll-llix ake' yo, na'll lle'e nada': —Byej jallixe yoda'o braon', na' bkoy gan' llzey ake' bi da lloe'rao ake' Dios, na' wrabo' bale be'nn zjalla'a nxenra'll Le'e. 2Zan bi wllixo' lia're, le ba naken rallna'a be'nn bi nak be'nn Israel, be'nn bi nxenra'll Dios, leake'n yeso'n ake' ka lle'n akre' rao yell ke Diosen', rao chopayon (42) be'o. 3Na' wse'la' chop be'nne we'e xti'lla'n, na' gak ake' ra'll gasj, ka be'nn zo yel wan, na' chixjwe' akre' xti'lla'n rao to mir chop gayoa wyon (1,260) lla. 4Be'nn ka' chopen' nak ake' ka yay olivos ka' chope na', na' ka chop kandler ka' zjazó rao Dios, be'nnen' nake xan yellrio. 5Na' cha' no lle'ne bi gonre leake', le llojte yi' lo lloa' ake', na' wzeyen be'nn ka' lle'ne bi gone leake'. 6Be'nn ka' we'e xti'lla'n, wak gon ake' bi gak yejw chak chixjwe' akre' xti'lla'n, na' wakte gon ake' yeyak nisen' llen batteze lle'n akre', gon ake' gak bi da yellayrao be'nn lla'a yellrio. 7Na' kat yeyoll we'e ake' xti'lla' na', na'll lloj to bell xi'o lo gabil gan' nake lo yell zitj, go'xba' leake', tilrenba' leake', gotteba' leake'. 8Na' kwerp ke ake' ka', wni't ake'n lao ya'a ke yell brao gan' baso't ake' Xanllo Jesucriston'. Yellen' naken ka Sodoma ren Egipto. 9Na' chonn lla choa will be'nn za'k zan yell da'o, na' zan yell xhen, na' be'nn nak wde wdere dialla, na' be'nn ka' llak wde wdere di'll da de yellrio ni, wia ake' be'nn wat ka', na' bi we'e ake' latj ga'ch ake'. 10Be'nn ka' zjalla'a yellrio ni, yewé akre' dan' wasa't be'nn ka' chope, na'll we'e lwellj ake' bi da we'e lwellj ake', le yewé akre' dan' bill ni't be'nn ka' llak akre' llsa'kzi' leake' dan' lloe'rén ake' leake' xti'll Diosen', le llakbe'y akre' leake'n. 11Na' bde chonn lla choa will na', bre'da'ora' basbán Diosen' be'nn ka' chopen', bazellá ake' da yobre, na' yeolol be'nn ka' bre'e leake'n, blleb ake'. 12Na' llopte be'nn ka' ben akre' goll Diosen' leake' zillje: —Ledá, lewayep nile. Na' bre'e be'nn ka' llwie leake'n, bayep ake' lo bejen', zjayake' yebán'. 13Na' ka bayep ake' le' yebá na'n, le bxho'te, na' blleyi' ra't yellen', gall mir be'nn wasa't kan' bxho' na'. Na' be'nn ka' baga'nnen' blleb ake' kwis, na'll balwill ake' Diosen' kwis, be'nnen' zo yebán'. 14Ba bde yel zi' wllopen', na' za za'a da wyonnen'. 15Na' bkwell trompet ke angl be'nn gallen', na' benra' bal be'nn ka' zjalla'a yebán', bnne ake' zillje, bne ake': Doxhen yel llnebia' ke yellrion', ba naken rao na'a Xanllo Diosen', ren Cristo be'nnen' breje' llnebia' ke chnare. 16Na' be'nn tapalloa ka' (24) zjalli' kwit Diosen', le go't akte' slloa're rao yon', lloe'xhen ake' Diosen', 17bne ake': Llonto' yel llioxken ko'o Xa Dios, rwe' nako' be'nn yel wak xhen. Ba zo'o ka bi nna xe yellrio, na' ba bzorao llnebia'o ren yel wak xhen ko'o, nench gak kan' llazra'llo' na'. 18Be'nn yell ka' lla'a yellrio ni, goklla'a ake' rwe'. Na' ba bllin lla wsa'kzi' akoe'. Ba bllin lla gono' yel koxchis ke yeolol be'nn ka' ba wasa'te. Na' gono' nench nni't be'nn ka' nbaraz, be'nn ka' llon xchino'n, ren yeolol be'nn ka' brejo' nak be'nn bxenra'll rwe'. Yeololte be'nn bxenra'll rwe' nni't ake' wen, no be'nn gore no xkwi'de. Leska' ba bllin lla kweyi' be'nn ka' blleyi' da de rao yellrio. 19Na'll byarj yoda'o braon' zo yebá gan' lloe'rao ake' Diosen', na' bre'ra' kaj la'y gan' blla'cha'o ake' xti'lle'n, dan' goll Diosen' be'nn Israel ka' gon ake' nench gakrene' leake'. Na' bre'ra'n byep yes, gok llakia gochj, na' bxho' na' blle' yej se'de.

will be added

X\