Filipenses 4

1Na' nna' be'nn bi'che, nllie'ra' re', zera'lla' re'e lwelljllo da yobre. Re'n nakre ka to da benn Diosen' nada', na' nbaraz zoa' ni ke re'. Lesoteze lewxenra'll Xanllo Jesucriston'. 2Na' lla'tyoera' rwe' Evodia, leska' rwe' Síntique, toz ka legón xhbab, legak txhen gonlira'llre Xanllon'. 3Na' ka nak rwe' be'nn lwellja', rwe'n benreno' nada' xchin Diosen' do yichj do ra'llo' kana', na' llnnaba' rwe' gakreno' no'r ki, le leake'n ba benrén ake' nada' xchin Diosen', na' ren Clemente na', na' ren yezikre be'nn lwelljllo ka'. Na' le' yich gan' llia ra be'nn ga't yel nban ke chnare, ganna' ba nyoj ra be'nn ki. 4Lesoteze leyewé dan' nxenra'llre Xanllo Jesucriston'. Ni nnia' re' da yobre leyewé. 5Legón nench yeolol be'nne gombia' akre' re', nakre be'nn cha'o, le ba rez yed Xanllon' da yobre. 6Bi gak zozé lo yichjra'llda'ore cha' bi llak keré, legonen rallna'a Diosen', leyelwille' lewnnab gakrene' re', na' lewe'e yel llioxken ke'e. 7Na'llen' wzoa Diosen' re' nbaraz, to yel nbaraz da ni ke chejnie'zere gonn Diosen' re', na' billbi da zed cho' yichjra'llda'oren', dan' ba nakllo txhen Xanllo Jesucriston'. 8Na' da zerawe llepa' re' be'nn bi'che, lekwek yichjre di'll lin', na' da nak zi gap be'nn re' bara'nne, na' da zeje lixheje, na' da bi nsa'a da xhinnj, na' da wayazra'll noteze be'nne, na' da za'k yewé noteze be'nne. Na' biteze da nak da wen da llazra'll Dios, yeolol da ka'n lekweken yichjre. 9Da ka' ba bzejnie'ra' re', na' yeolol dan' ba bénere bnia' na', na' da ka' ba bre're llona', yeololen legón. Na' Dios be'nnen' llon nench so yel nbarazen' lo yichjra'llda'oren', sokze' gakrene' re'. 10Llawera' rao Xanllo dan' lli' yichjre llakrenre nada' da yobre. Nnezra' bzere llonre xhbab kia', na' bi go't latj gakrenre nada'. 11Kere nia' da ki, le yalljra' billre da yobren', le ba llejnie'ra', zoa' nbaraz kate deteze da yalljra', na' kate bibi de. 12Yo'rawa' yel ya'ch yel zi', na' yo'rawa' yel cha'o. Na' Diosen' ba bzejnie're' nada' soteza' nbaraz biteze da llak kia', kate de da ye'j gawa', na' kate bil dona', kate de billre da yalljra', na' kat bibi de. 13Llak llona' biteze da llaya'l gona', le zo Criston' llakrene' nada'. 14Na' benre wen bse'lre da gokrén nada', nench na' gokre nada' txhen ka nak dan' ll-llayrawa' ni. 15Na' re' be'nn Filipos, nnézkzere, kan' bzorawa' llroe'ra' xti'll Diosen' ga yobre, kan' baza'a Macedonia na', nollno be'nn bi'chllo ka' llonlira'll Criston' gokrén nada', zeraoze re' bse'lrenre nada' bi da byalljra'. 16Kan' nna zoa' Tesalónica na', da zan ras bse'lre bi da byalljra'. 17Na' kere lle'nra' bi da gonnre nada'n, lle'nra' gonre ka' nench ga't yel wnia' keré rao Diosen'. 18Na' ba bxhia' dan' bse'lre kia', na' ba benre da xhenllre ka to da llaya'l gonre. Na' billbi yalljra', le ba bayónn Epafroditon' dan' bse'lre kia'n, naken ka to llen yar da la' xhix da llzey bxoz ka' rao Dios, le Dios na'n llawere' kan' benre na'. 19Na' Dios kia' na'n gonnkze' yeololte da yallje re' dan' nxenra'llre Xanllo Jesucriston', le yeololten yo' rallne'e. 20Na'll we'raollo Xallo Diosen', le Le'en llaya'l si'i yel bara'nnen' ke chnare. Ka'n gakchga. 21Lewap lliox yeolol be'nn ka' yo' rallna'a Diosen', na' nxenra'll ake' Xanllo Jesucriston'. Be'nn lwelljllo ka' zjazorén nada' ganni llwapto' re' lliox. 22Leska' yeolol be'nn ka' nak rallna'a Dios llwap ake' re' lliox, ren be'nn ka' llon llin ke César, be'nnen' nak le zerawe be'nn wnebia' llia Roma. 23Na' llnnabto' Xanllo Jesucriston' gakrenchgue' re'. Ka'n gakchga.

will be added

X\