Filipenses 2

1Cha' re' zore nbaraz dan' llonlira'llre Criston', na' cha' yel nllie' ke Criston' llonen llakxhenra'llre, na' cha' zorén Spíritu ke'en re', na' cha' nllie' lwelljre, na' cha' llaya'chra'llre be'nne, 2wawellra' cha' nnezra' naksre toze, yeololte re' ren lwelljre, na' ka' toze ka zore llie' lwelljre, na' toze ka gonre xhbab, na' toz ka ye'nere gak. 3Bibi llaya'l gonre da llroe' llaxhe're be'nne, na' gonxhen kwinre, zan llaya'l yexjra'll-llo wayonllo xhbab za'kll be'nn lwelljllo ka' kere ka lli'o. 4Na' bi llaya'l kwek yichjllo chraoze ke kwinllo, llaya'lkze kwek yichjllo ka gakrenllo be'nn lwelljllo ka'. 5Llaya'l gonllo xhbab, ka xhbab da ben Xanllo Jesucriston'. 6Le la'kze nake' ka Dios na'kze, bzanre' yel llnebia' ke'en, na' yel bara'nn xhen ke'e dan' nape', dan' nake' toze ren Xe'e Diosen'. 7Bkwase' ka'le yeolol da ka' za'k da go't ke'e, na' ben kwine' ka to be'nn wen llin ke Dios, kan' bede' gorje' radj be'nnach. 8Na' ba nake' be'nnachen' bxhexj yichje' nench bene' kon kan' bne Xe'e Diosen'. Bzoe' xti'lle', na' bzane' yel nban ke'en gote' le' yay cruzen'. 9Ke len na' ben Diosen' Le'e xhen kwis, na' bene' Le'e be'nn brao rao yeolol be'nne, 10nench na' kat yen akre' ra Xanllon', yeolol ake' wzoa xhib ake' rawe'n, ka be'nn lla'a yebá, ren be'nn lla'a yellrio, na' be'nn zjalla'a xhanre yellrio. 11Na' yeolol ake' nne ake' Jesucriston' nake' Xanllo, gak ka' nench Xallo Diosen' sie' yel bara'nne. 12Be'nn bi'che, kan' ba bzore bzenayre xti'lla' kan' bzorena' re', ka' legonkze nna' la'kze bill zorena' re'. Na' lesó legón kan' lle'ne Dios be'nn ba basrá re', do xhizre do llebre. 13Le Dios na'n llgoe' yichjra'llda'ore dan' lle'nre' gonre da llayazra'lle', na' lekze' Dios na' llakrene' re' llonren'. 14Na' kat bi da gonre, bi gaore xhia, na' bi gakyollrén lwelljre, 15nench nneze be'nne llzoare xti'll Diosen', na' bibi do'l keré ga'te, na' gakre dogarje xhi'nn Dios, radj be'nn ka' nna yo' da xhinnjen' lo ra'llda'o ake', na' nna llon ake' krere. Na'llen' gakre ka to berj da llseni' ke be'nn lla'a yellrio ni. 16Lesoteze lesó wxenra'llre di'll ke Cristo da nsa'a yel nban zejlikane, nench kate yed Criston' da yobre, yewera' kwis kan' benren', na' nnezra' bi bendadza' xchin Diosen'. 17Re' nxenra'llre Diosen' llonre xchine'n. Ke len na' llawera', na' zanra' yel nban kia'n biteze gak kia', ni ke dan' lloa'a xti'll Jesucriston' nench gak doxhen kan' lle'ne Diosen'. Na' dan' llak kia'n naken ka to da llrarj ake' rao Dios kate llon ake' Le'e xhen. 18Leyewerene nada', na' lesó nbaraz kan' zoa' nada'. 19Llbexha' gakrén Xanllon' nada', na' le wse'ltia' Timoteon' gan' zore na', nench yewera' kat yenra' di'll ke re' ka wen na' llonre. 20Le nollre no zo be'nn yobre wse'la', be'nn kwe' yichje' gak wen keré kan' llon Timoteo na'. 21Le nollre be'nn yobre kon lli' yichj ake' chraoze ke leake', na' bi llon ake' kan' lle'ne Xanllo Criston'. 22Na' ba nnézkzere zo Timoteon' llone' da za'ke, na' kan' gokrene' nada' bdixjwe'ra' xti'll Diosen' gateze. Na' ba gokrene' nada' ba bzoe' ka to xhi'nna'. 23Ke len na' llona' rez gak wse'le' gan' zore na', kat ba bnnezra' akre gak kia' ganni. 24Na' nxenra'lla' Xanllo Criston' gakrene' nada', gonne' latj le yedtia' yedwia' re'. 25Llakra' lekze llonen bien wase'la' be'nn lwelljllon' re Epafrodito gan' zoren', le ba gokrene' nada' llonto' xchin Diosen', na' txhen ba gokdilrento' da xhinnjen'. Re' bse'lre' ganni gokrene' nada' ren bi da yalljra'. 26Lle'nre' kwis re're' re', le llakre' dan' bnnézere llake' yillwe'n. 27Da likzen' goke' yillwe', ye ra'tze ka gote', zan baya'chra'll Diosen' le'e, na' kere toze le'en baya'chra'll Diosen', renkze nada' baya'chra'lle' bayone' le'e, le biteze ba gok kia', na' nya'chraz zoa' chenak gote'. 28Na'llen' lle'nra' wse'le' gan' zore na', nench yewere re're' da yobre, na' bill gákere ke'e. Na' rente nada' bill soya'cha'. 29Lewrebe' na' leyewerene' dan' nake' lli'o txhen dan' nxenra'll-llo Xanllo Criston', na' llaya'l gapre' bara'nne noteze be'nn llon kan' llon le'e na'. 30Le ye ra'tzen' ke gote' gokrene' nada' bento' xchin Criston', bzane' yel nban ke'e, ka' gonkze re' chenak zorenre nada' ganni.

will be added

X\