Filipenses 1

1Nada' Pablo na' ren Timoteo, nakto' be'nn wen llin ke Jesucriston', llzojto' re' lla'a Filipos na', yeolol re' nak rallna'a Dios nxenra'llre Xanllo Jesucriston'. Leska' llzojto' re', ze llwia llap be'nn ka' lldop ll-llay llonlira'll Le'en, na' re' nbej ake' llakrén akre'. 2Llnnaba' rao Xallo Diosen' ren rao Xanllo Jesucriston' gakrenchgue' re', na' wzoa ake' yichjra'llda'oren' so kwezre nbaraz. 3Yo'y ras kate lljadinra'lla' re', lloa'a yel llioxken ke Diosen' ba llonre txhen nxenra'll-lloe'. 4Na' yo'y ras kat llalwilla' Diosen' llawera' llnnaba' gakrene' re'. 5Le nakllo txhen llejle'llo Di'll Wen ke Jesucriston', bzoraozen kan' benlira'llre, na' bllinte nna' lla. 6Na' da ni nnezra', Diosen' bzorawe' llone' to da wen lo yichjra'llda'oren', na' ka'kze gone' nench yeyoll yeyak yichjra'llda'oren' kan' llazra'lle'n, llinte lla yed Jesucriston' da yobre. 7Ka'n llaya'lkze gona' xhbab keré, le bi llanra'lla' re'. Le kan' jachoa' rill ya na', na' kan' bdixjwe'ra' Di'll Wen ke Criston' rao be'nn bi byejle' ke'e, na' bzejnie' akre' naksen da li, zerenkzre nada' dan' ba yo' yel nllie' ke Diosen' lo yichjra'llda'ore. 8Nneze Diosen' nllie'ra' re' kwis yeololtere, le Jesucriston' llone' nench nllie'ra' re'. 9Na' llnnaba' rao Diosen' llie'llere', na' gonne' re' yel si'n ke'en, nench chejnie're bixhan' llazra'lle' gonre. 10Ka'n llnnaba' nench na' nnézere bin' llaya'l gonre kan' llazra'll Diosen', na' gak yall yichjra'llda'oren', na' bibi do'l keré de katen' llin lla yed Criston' da yobre. 11Na' gakrén Jesucriston' re' gonre da wen, na' ka' si'i Diosen' doxhen yel bara'nnen'. 12Be'nn bi'che, lle'nra' nnézere yeolol dan' ba gok kia'n, ba gokrenen nench be'nn zanll bzenay ake' Di'll Wen ke Criston'. 13Na' dan' yoa' rill ya ni, ba gokrenen nench ba bia'a xti'll Xanllo Jesucriston' rao yeololte be'nn waka'a ya ke be'nn wnebia'n, na' noteze be'nn yobre. 14Na' be'nn zan be'nn lwelljllo lla'a do ni, ba bxhi'ltip ake', ba llonlira'll aklle' Xanllo Criston', dan' ba bre'e akre' kan' llak kia' yoa' rill ya ni. Na'llen' ba llayaxhj akre' lloe' ake' xti'll Diosen', bill lleb ake'. 15Da li bal ake' lloe' ake' xti'll Criston' dan' llaxhé' akre' nada', na' dan' lle'n akllre' gak ake' be'nn braoll ka nada', zan ye bal be'nn ak llyixjwe' akre'n do ra'll ake'. 16Ka nake be'nn ka' lloe' ake' xti'll Criston' nench gak ake' xhen, kere llon ake'n do ra'll ake'n. Lle'n akre' wzoaya'ch aklle' nada' lo rill ya ni, na'llen' llon ake' ka'. 17Na' yezikre be'nne llyixjwe' akre'n dan' nllie' akre' Criston', na' nllie' akre' nada', le nnez akre' yoa' rill yan', ni ke dan' llzejnie'ra' be'nn bi llejle' Di'll Wen ke Criston', llep ake' naken di'll li. 18¿Bixha gonen kia' nada' cha' llyixjwe' akre'n do ra'll ake' o cha' bi llon ake'n do ra'll ake'n? Kon dan' llawera' lloe' ake' xti'll Criston' dan' nak di'll li na'. Na' llawellra', 19le nnezra' yelloja' wen kan' llak kia'n, ni ke dan' llnnabre gakrén Diosen' nada', na' ren dan' llakrén Spíritu ke Jesucriston' nada'. 20Len na' zoa' nxenra'lla' gakrén Diosen' nada', na' bi gona' krere da gakzbanra', le lle'nra' si'i Criston' yel bara'nnen' chak nbana' o la'kze cha' gata'. 21Le cha' nbana', lle'nra' wa'a Criston' yel bara'nne, na' cha' gata' wenren' gak kia' chet ka'. 22Na' cha' dan' solla' yellrio ni, gona' xchin Xanllo Criston', wyanll be'nn gonlira'll Le'e, bi nnezra' noren' na' nakll da wen chet ka'. 23Naken to bni' nnezra' noren' na' nakll wen, to llakra' nakllen wen waya'a lljazorena' Criston', na' gaklle nbaraz kia' nada' chet ka'. 24Na' leska' llona' xhbab, yálljere nada', na'llen' llaya'l bana'. 25Ke len na', nnezra' wzorenlla' re' ye to chi'i nench gakrena' re' chejnie'llere, na' sore nbaraz gonlira'llre Criston'. 26Na' katen' ba zorena' re' da yobre, kana'll yezikre yewere, na' we'raore Xanllo Jesucriston'. 27Na' lesoteze legón da wen kan' llaya'l gonllo lli'o ba nneze Di'll Wen ke Criston'. Legón da wen ka', nench cha' yeda' yedwia' re' o cha' la'kze zoa' zi'te, yenra' di'lle keré, naksre toze ren lwelljre, llonre ga zerao za'kere nench wzenay yezikre be'nne xti'll Criston' dan' ba nxenra'llre na'. 28Bi llebre cha' bi gone be'nn llwie re'. Na'll gakbe'e akre' ba rez kweyi' ake', na' sa'kzi' ake'. Na' leze ka'kzen' gakbe'e akre' Diosen' yesre'e re'. Le Dios na'n gone' kan' ba bne'en. 29Diosen' bene' wen keré, dan' benne' latj benlira'llre' na', na' kere dan' benlira'llre' na'zen', renkze dan' wallayraore, ni ke Le'e na'. 30Le toz ka dan' llakdilrenkzllo. Ba bre'kzere kan' gok kia' kana', na' nnézkzere kan' llak kia' nna'.

will be added

X\