San Mateo 9

1Jesúsen' bayoe' lo barcon', bala'ye' ye chla're nisda'on, na' balline' rao ralle'. 2Na' bllin txhonnj be'nn nlen ake' to be'nn, bi dá nia'ne'e, nxoa ake' le'e to rao bray. Ka gokbe'e Jesúsen' kan' nxenra'll ake' Le'e, na'll lle'e be'nn we'en: —Bawé xhi'nna', ni llazi'xhena' ke da xhinnj ko'o ka'. 3Na'll bale be'nn ka' llsedre ke ley dan' bzoj da Moisésen', ben akre' kan' goll Jesúsen' be'nn we'en, bza'ra'll ake' to lo yichjra'llda'o ake', na'll bne ake': “Be'nn ni llkadie' ke Diosen' ne'e ka'.” 4Jesúsen' gokbe're' ka dan' za'ra'll be'nn ka', na'll golle' leake': —¿Bixchen llza'ra'llrizre da xhinnj lo ra'llda'ore? 5Llákere bi napa' yel llnebia' na' yepe': “Ni llazi'xhena' da xhinnj ko'on.” ¿Bixha cha' yepe': “Bayas na' bayej”? 6Nada' naka' Be'nn Gorj Radj Be'nnach wroe'ra' re', na' zoa' yellrio ni, napa' yel llnebia' nench yezi'xhena' da xhinnj ke be'nnachen'. Na'll golle' be'nn xhinnjen': —Bayas, bayoa' gan' bxhoa'o, na' bayej rillo'. 7Na'll bayas be'nnen' zayeje' rille'. 8Na' be'nn ka' bre'e kan' goken blleb ake' kwis, na'll be'rao ake' Diosen' kan' bene' be'e yel wak ke'en Jesúsen'. 9Ka bde Jesúsen' gan' lli' Mateon' llchixhje' dan' llaya'l wayej yell gan' llnebia' leake'n, na' bre'e Jesúsen' le'en, na'll lle'e le'e: —Da nnao nada'. Na'll bzolla'a Mateon' zejrene' Le'e. 10Ka goken bllin Jesúsen' rill Mateon', na' lli' ake' llao ake' txhen ren ye zan be'nn wachixhj ak, na' ren yela' be'nn wen da xhinnje, na' renkze be'nn ka' non Le'e txhen na'. 11Ka bre'e be'nn fariseo ka' lli' ren Jesúsen' leake' txhen, na'll lle ake' be'nn ka' non Le'e txhen na': —¿Bixchen be'nnen' llroe' llsede re'n llaorene' txhen be'nn wachixhj ka', na' ren be'nn wen da xhinnj ka'? 12Na' ka bene Jesúsen' xti'll ake'n, na'll lle'e leake': —Be'nn bibi yillwe' llake, bi yalljre' be'nn wen rmell, zan be'nnen' llak yillwe'n, le'en yalljre' be'nn wen rmellen'. 13Lelljased bi zej xti'll Diosen' dan' nyoj: “Lle'nra' yeya'chra'llre be'nne, kere kon gotre bayi'x gákere nada' nxenra'llre.” Kere za'a zadyexha' be'nn wen aken', zan za'a zadwia' be'nn wayatre ke da xhinnj ba ben ake'. 14Na'll be'nn ka' nao Juan be'nnen' bchoa nis, jabi'y ake' rao Jesúsen', lle ake' Le'e: —¿Bixchen bi llon be'nn ka' was be'nn ka' nao rwe'n, na't neto' llonto' was, leska' be'nn fariseo ka' llon ake' was? 15Na'll lle Jesúsen' leake': —¿Bixha wak so be'nn ak yel wan, be'nn llon ake' yexh ga llak yel wachayna'a chak lli'rén wachayna'n leake'? Bi gak sorene' leake' yel wan. Zan wllin lla waga'a be'nn byion', kana'llen' gon ake' was. 16’Gaga zo be'nne gonrene' llin ra'll kobe, yede'en xhe'e gore, le ra'll koben', yebe'n kat chiben, na' wche'zen xhe'e goren', yezikre yarj gan' nlle'zen. 17Na' leska' nono zo be'nn ka'cha'orize' xis uva koben' to lo blloy yid gore, le xis uva koben' wche'zen blloy yid goren', na' llopten kweyi'. Zan ka'cha'we' xis uva koben' lo blloy yid kobe, nench bi kweyi' xis uvan', na' ka' llopten bi kweyi'. 18Nna lloe'te Jesúsen' di'll na', bllindokze to be'nn wnebia', bche'k xhibe' rao Jesúsen', lle'e Le'e: —Le bayollte got to xhi'nna' no're. Cho'do na' wxoa nao'n yichjbe' nench yebanbe'. 19Na'll bzolla'a Jesúsen' ren be'nn ka' non Le'e txhen na', na' byejrén ake' be'nn wnebia'n. 20Na' ka zjake' na'n, bnao to no're leake', ba gok chllinn (12) iz llzoe' wa'a, na' bene' bien jabi'ye' awllo ko'll Jesúsen', jatane' xhe'en. 21Le kan' bza'ra'lle' to lo ra'llda'we', bne'e: “Kon cha' ba bdana' xhe'en, wayaksa'n.” 22Na' bayechj Jesúsen' bwie' no'ren', na'll lle'e le'e: —Bendipra'llo' xhi'nna'. Ba bayakso' dan' llonlira'llo' nada'. Na' le bayakte no'ren'. 23Ka bllin Jesúsen' rill be'nn wnebia'n, na' bre're' ba zjalla'a be'nn zan, llon ake' txhen, na' llasbell ake', na' ba lla'a be'nn llkwell bllej. 24Na'll lle'e leake': —Lelljayak. Kere got bida'o no'r nin', taszbe'n. Na'll be'nn ka' lltitj akre' Le'e. 25Na'll bayoll bachache' yeolol be'nn ka', na'll byoe' be'xe' ta'k bida'o waten', na'll le bayástebe'. 26Na' yel waken' bene'n goslas di'llen' yeolol yell ka' zjalli' do na'. 27Na' ka badé Jesúsen', bnaodo chop be'nn lchol Le'e, na' besia' ake' zillje, goll ake' Le'e: —¡Rwe'n nako' xhi'nn dialla da rey David, baya'chra'll neto'! 28Na' ka bayo' Jesúsen' lo yo'n, na' byo' be'nn lchol ka', na'll lle Jesúsen' leake': —¿Llonlira'llre nada' gak gona' nench yere're? Na'll lle ake' Le'e: —Awa' xanto', llejle'to'. 29Na'll bdan Jesúsen' yej rao ake'n, lle'e leake': —Yere'chgare kon kan' nxenra'llre nada'. 30Na'll le bayakte yej rao ake'n, bare'e aktere'. Na'll goll Jesúsen' leake': —Bi we're di'll kan' gok bayak yejraoren'. 31Bixha kate baza'a ake' na', jadá ake' doxhen gan' nzi'i Galilea, lloe' ake' di'll ka dan' ben Jesúsen' ke ake'n. 32Na' ka ballach be'nn ka', le bllinte be'nn yob akre', nche'e ake' ye to be'nn blloje yo' daxi'o yichjra'llda'we'n. 33Na'll Jesúsen' le babejte' daxi'on, le bannete be'nnen'. Na' be'nn zan bre'e kan' goken, na'll babán akre' kwis, na'll ne ake': —Lli'o be'nn Israel, da nellen' bre'llo yel waken' nak ka'. 34Na' be'nn fariseo ka' ne ake': —Xan daxi'o ka'n llakrenen le'e, nench llabeje' daxi'on zjayo' yichjra'llda'o be'nn ka'. 35Jesúsen' jate'e toto yell, na' toto yell da'o zjalli' do na', jazejnie're' be'nn Israel ka' lo yoda'o ke ake'n, na' bdixjwe're' leake' Di'll Wen kan' nnebia' Diosen', na' bayone' be'nn ka' llak biteze yillwe', na' biteze da llak ke ake'. 36Na' ka bre're' ba bllay be'nn zan, na' baya'chra'lle' leake'. Ka gokbe're' llakllejla'll ake', akre gon ake', na' nono llra' gakrén leake' ka dan' llallayrao ake'n. Ni't ake' ka xhi'r da'o, ba nono llra' gap leakba'. 37Na'll lle'e be'nn ka' non Le'e txhen na': —Da li nia' re', ka be'nn gon wrapen' gonllo, da xhen llin na' de, na' to chopze be'nn wrap ka' nak. 38Lennabe Dios be'nnen' nak xan llin na', wse'le' yezikre be'nn wen llin rao llin na'.

will be added

X\