San Mateo 7

1’Bi wlliayi'llre be'nne, nench ke wlliayi'll Diosen' re'. 2Kon kan' llonre llchoybia're ke be'nne, ka'kze gon Diosen' wchoybie' keré. Na' kan' llónere be'nne, ka' gonkze Diosen' ke re'. 3¿Bixchen llwiazo' beb da'on yo' lo rao be'nn bi'cho'n, na' bi llwia'o beb xhen na', yo' lo rao rwe'? 4¿Bixchen yezo' bibi'cho'n: “Anchk wabejkera' beb da'on yo' lo rao'n?” ¿Bixha dan' yo' lo rao rwe'? 5¡Be'nn chop rao! Zga'tek babej beb xhen na', yo' lo rao rwe', na'llen' yere'ro' kwasro, na' gak wabejo' yixh beben' yo' lo rao be'nn bi'cho'n. 6’Na' bi we'rentezre xti'll Diosen' be'nn ka' bi llazra'll len na', nxholl gon akre' re' znia ka llon be'kw wxhoxhjtinba' be'nne. Bi gonre ka be'nn wza'lze' da cha'o ak rao kuch ak, nxholl wrejchekw akba'n. 7’Lewnnab, cha' bi wnnabre, gonnkze Diosen' len; lechirj, cha' bi chirjre, wllelkzen; lewse'kw, na' wyarjkze cho're. 8Le noteze be'nne bi da llnnabe', wzi'kze'n; na' be'nn llyirje', wllelkzere'n; na' be'nn llnne'e, llsarj akse' ke'e. 9’Ka' re', cha' xhi'nnre nnábebe' re' to yet xtir, kere we'rebe' to yej. 10Na' cha' nnábebe' re' to bel gaobe', kere lloe'rebe' to bele znia. 11La'kze naktere be'nn wen da xhinnj ak, nnézkzere lloe're xhi'nnre ka' to da wen. Na' bixha Xallo Diosen' zo yebá na', gonlle' wen ke be'nn llnnabe Le'e bi dan' yalljre'. 12’Na' yeolol dan' lle'nere gon be'nnach keré, ka'kze llaya'le gonre ke ake', le ka'n llak ka nyoj le' leyen', na' dan' bzoj be'nn ka' be'e xti'll Diosen' kana'. 13’Lecho'o nez dan' nak cho'pze, le da ra'y nak nez dan' lljasán be'nn ka' gan' kweyi' ake'. Na' be'nn zan lljak nez ra'yen'. 14Le cho'pze nak nezen' dan' lljasán lli'o gan' de yel nban zejlikanen', na' to chopze be'nn ake za'k akre' lljake' nez cho'pen'. 15’Llaya'l wiare nench ke chejle're xti'll be'nn wenra'll ka', be'nn ka' ne lloe' ake' xti'll Dios, non ake' ka xhi'r maxh da'o, na' loere nak ake' ka be'kw yi'o, ba llao xhi'r da'o ka'. 16Ka nak da llbia toto yay nnézello bi yayen'. Ka nak yay ye'chen' bi llbian uvas, na' ni yay yixen' bi llbian higo. Ka'n llaya'l gakbe're ke be'nn ka' ziye'e re', kat re're bi dan' llon ake' na'. 17Yay dan' nak yay wen na', daxhix wenkze llbian. Na' yay dan' bi nak wen na', lekze daxhix bi nak wen kwian. 18Le bi gak to yay xhix wen kwiazen daxhix bi nak wen, leska' yayen' bi nak wen na', bi gak kwiarizen daxhix wen. 19Yeololte yay da bi llbia daxhix wen, llchoy xane len na' llzeye'n. 20Na' ka nak dan' llon toto be'nne, nnézello cha' nake' be'nn wen o cha' nake' be'nn wen da xhinnj. 21’Kere yeolol be'nn ka' llalwill nada'n, ne ake': “Xanto', Xanto'”, yellín yebán' gan' llia Diosen' llnebie'. Kon be'nne gon kan' lle'ne Xa' Dios be'nne llia yebá na', leakze' yellín gan' llie' na'. 22Kat llin lla gona' yel koxchis ke be'nn ka', be'nn zan ye ake' nada': “Xanto', ba be'to' xti'llo'n, na' kone ra'on, babejto' daxi'o ka' zjalla'a yichjra'llda'o be'nne, na' leska' kone ra'o na', bento' da zan yel wak ake.” 23Na' kana' yep ake': “Bi nombia' re', ka'le lelljayak, re' be'nn wen da xhinnje.” 24’Be'nnen' llzenay xti'lla'n, na' llone' kan' nia' na', llone' ka to ke be'nn si'n be'nn ben rill, na' bxie' ranen' to rao yej war. 25Na' ka gok yejsi'o xhen, na' bda to be' war, na' blloj yeo da xhen bayechjte gan' zo rille'n. Na' bi bzoen wzalen len, le lli' ranen to rao yej war. 26Na' be'nn llenre' xti'lla' ni, na' bi llone' kan' nia' na', llone' rebze ka to be'nn bi bwia gan' gon rille'n, na' bene'n to rao yoxh. 27Ka gok yejsi'o xhen na', blloj yeon' bayechjten gan' zo yo' ke'en, na' bda be', na' bzoen bzalen len blleyi'tekazen. 28Na' ka bayoll be'e Jesúsen' di'll ka', na'll llabane be'nn ka' lla'a na', kan' broe' bsedre' leake'n. 29Le kan' bzejnie're'n, nakbie'kze nape' yel llnebia', kere bzejnie're' kan' llzejnie' be'nn ka' llsedre ke ley dan' bzoj da Moisésen'.

will be added

X\