San Mateo 6

1’Kat gonre to da wen, bi gonren nench re'e be'nn ka' re', na' yeyoe'rao ake' re'. Cha' ka' llonre, bibi da wen gon Xallo Diosen' keré. 2Ke len na' kat we're be'nne cha' bi da yalljre', bi we'ren nench nneze be'nn ka'. Le ka'kzen' llon be'nn chop rao ka', lloe' ake' bi da lloe' ake' do lo yoda'o, na' do tnez nench nneze be'nn ake, na' llayoe'rao ake' leake'. Da li nia' re', kone ka' llaxhj dan' llon ake', na' Diosen' bibi da wen de gone' ke ake' chet ka'. 3Zan re', cha' bi da we're to be'nne, lewe'n llillize. 4Lewe'n ga bi gakbe'e be'nne, na' bi yeyoe'rao ake' re', na'll Xallo Dios be'nnen' llre'e yeolol da ka' llonllon', gone' nench gak wen keré. 5’Kat yelwillre Diosen', bi gonre kan' llon be'nn chop rao ka', llawé akre' sellá ake' yelwill ake' Diosen' lo yoda'o ke ake'n, na' do skin do tnez, nench re'e be'nne kan' llon ake'n. Da li nia' re', ba bxhi'te raxhj be'nn ka' rao yellrio na'ze. 6Zan re' katen' yelwillre Diosen', leyeyo' lo yo' keré to wrazre, leyesejte gan' yo'ren', na'll we'renre Xallo Diosen' di'll, la'kze bi llre'lloe', zorenkze' lli'o, Lekze'n llwie' yeolol dan' llnnabren', na' gone' da wen keré. 7’Na' kat yelwillre Diosen', bi we're toz ka di'll we're kan' llon be'nn ka' bi nombia' Diosen'. Le leake'n llak akre' cha' di'll zan na' lloe' ake' na'zen', si'te Diosen' xti'll ake'n. 8Bi gonre kan' llon ake'n, le Xallo Diosen', ka za nnábtere, ba nnéztere' bin' yálljere na'. 9Kin' yelwillre Diosen': Xa, rwe' llia'o yebá, nak la'y ra'on. 10Yedchga yel llnebia' ko'on. Gakchga kan' lle'nro' rao yellrion' kan' llak yebá na'. 11Dan' gaoto' tlla tlla bennchgan nna'. 12Na' bazi'xhen keto' kan' llon neto', llazi'xhento' ke be'nne biteze da llon akre' neto'. 13Na' bi wsanra'llo' neto' yexjto' rao da xhinnjen', bkwas brekyi'll neto' rao da xhinnjen'. Le rwe'n llnebia'o, na' napo' yel wak, nako' be'nn za'k xhen zejlikane. Ka'n gakchga. 14’Na' cha' llazi'xhenre ke lwellj be'nnachre biteze da llon akre' re', Xallo Dios be'nnen' zo yebá, leska' yezi'xhene' yeolol da xhinnj keré. 15Na' cha' re' bi llazi'xhen ke lwelljre, leska'kze bi yezi'xhenkze Xallo Diosen' keré. 16’Kat gonre was, bi gon lloa'raoren' ka be'nn zoya'che, kan' llon be'nn chop rao ka'. Llon ake' nench re'e be'nn cha' bi dan' llon ake', na' wayoe'rao be'nn leake'. Da li nia' re', ba bxhi'te raxhj be'nn ka' rao yellrio na'ze. 17Zan re', kat gonre wasen', lewapa' yichjraore, lechib lloa'raore. 18Ka'n gonre nench ke gakbe'e be'nne cha' wasen' nonre, le toze Xallo Dios na'n llaya'l gakbe're', le Le'en zorene' re', la'kze cha' bi llre'lloe'. Xallo Dios na'n llre're' yeolol da llonren', na' gone' da wen keré. 19’Bi ko'cha'ore da nak yel wnia' rao yellrio ni, le weyi'n. Le balen le llteteba', na' ye balen llbia re, na' leska' llaz be'nn wan, na' kwan ake'n. 20Zan Dios na' lewxenra'lle' nench gonne' da wen da cha'o keré da bi te ke, kat yellinre yebá gan' zoe'n, naken da bi wteba', ni ke kwiaze re, ni be'nn wan bi gak kwanen. 21Le gan' ngo'cha'ore dan' llazra'llre na'n, ganna'n zokze yichjra'llda'oren'. 22’Yejraore llian naken ka to beni' nench re're. Cha' bibi llaken, llre'kzere kwasro. 23Zan cha' yejraoren' bi naken wen, doxhenre ncholen chet ka'. Na' chet ka' beni' ke Dios dan' nere zorén re' naken xchole, xchol kwisen' nak yichjra'llda'ore chet ka'. 24’Nono gak gon llin ren chopre xane' to chi'ze, le cha' ka' gone', wiere' to xan llin na', na' llie're' be'nnen' ye to; na' gone' llin ke toe' do yichj do ra'lle', na' ke be'nnen' ye to, gone'n kaze ra'lle'. Ka'kze ke re' bi gak gonre xchin Diosen', na' waráltere gonre llin, sera'llre gakre be'nn wnia'. 25’Ke len na' llepa' re', bi kwek yichjre chraoze bi da ye'j gaore chak nbanre, leska' bi kwek yichjre chraoze ke xhara'nre. Le za'kll yel nban kerén' ker ka yel waon'. Lekze ka' kwerp kerén', za'kllen ker ka xhara'nren'. 26Lewiá ke ba ka' zo xir llasdá rao lla, ni ke llaz llarap akzba', na' ni da' xhoa' ke akba' bi zo, na' Xallo Dios be'nnen' zo yebá na' llwaokzeba'. ¿Kere za'kllre ker ka ba ka' zo xiren'? 27Na' ni tore kere wak yesdón kwinre ye tchit, cha' kwe' yichjzre gakre be'nn tonne. 28’Na' ¿bixchen lli' yichjzre kwis ke xhara'nre? Lewiá ke yej da'o zjalla'a lyi'xe, llazocha'o aksen la'kze bibi llin llon aken, ni ke llab akzen yere. 29Da li nia' re', rey Salomón na', goke' ra'll wen kwis, na' ni ka' bi ballinkze xhara'ne'n katk yel nbaraz ke yej da'o ka'. 30Diosen' none' nbaraz da zjadé lyi'xe la'kze to chop llaze so aken, na' llzey ake'n. Bixha re', ¿bi llákere gonlle Diosen' wen keré cha' re' nxenra'llre'? 31Ke len na' bi kwe' yichjre ke bi dan' yálljere, nere: “¿Bi ye'j gaollo, na' bi gakllo?” 32Ke nak be'nn ka' bi nxenra'll Dios, kon lloe'la'll ake' llayirj ake' da ki. Zan lli'o, nnézkze Xallo Dios be'nnen' zo yebá na' bin' yálljello. 33Llaya'le kwe' yichjre, na' wzenayre ke Diosen' nench nnebie' yichjra'llda'ore, na' gakre be'nn wen rawe'n. Na' yeolol da ka' yálljeren', Dios na'kze gonne'n. 34Bi kwe' yichjre bi gak wxe willje, le dekze latj wxe, kwe' yichjllo da za za'a. Le tlla tlla nsa'kzen da zed ke.

will be added

X\