San Mateo 5

1Ka bre'e Jesúsen' be'nn zan ba ndop rao ya'n, na' bllie' na'ze, na' be'nn ka' non Le'e txhen na', jabi'y ake' gan' llie'n. 2Na'll bzorawe' bzejnie're' leake', bne'e: 3—Nbaraz ke be'nn ka' llakbe'e akre' yallj akre' gakrén Diosen' leake', le leake'n nak Diosen' txhen be'nn llnebia'. 4’Nbaraz ke be'nn ka' llakya'ch akre', le leake'n we'e Diosen' yel llxhenra'll ke ake'. 5’Nbaraz ke be'nn ka' llexjra'll ake', le leake'n gon Diosen' rallna'a ake' doxhen dan' bchebe' gone' ke ake'. 6’Nbaraz ke be'nn ka' llon ka be'nn llbil don, nench gak ake' be'nn wen rao Diosen', le Dios na'n gon kan' zera'll ake'n. 7’Nbaraz ke be'nn ka' llaya'chra'll ake' be'nne, ka'kze gon Diosen' ke leake' yeya'chra'lle' leake'. 8’Nbaraz ke be'nn ka' ba bayib lo ra'llda'o ake', le leake'n yere'e akre' Diosen'. 9’Nbaraz ke be'nn ka' llabeklli ake' be'nn dile, le Diosen' waza'kre' leake' ka xhi'nne'. 10’Nbaraz ke be'nn ka' cha' llallayrao ake', na' llsa'kzi' ake' leake' ni ke da wen na' llon ake' rao Diosen', leake'n gak Diosen' txhen be'nnen' llnebia'n. 11’Nbaraz ke re' cha' dan' llonlira'llre nada'n zi'chi'll be'nne re', na' wsa'kzi' ake' re', chirjla'll ake' di'll wenra'll keré. 12Leyewé lesó nbaraz, le Dios na'kze gone' da wen keré kate yellinre gan' llie'n. Kan' llon aksre' re' na', ka'kze ben xozxta'o ake' ka' ren be'nn ka' be'e xti'll Diosen' kana'. 13’Re' nakre ka ze'de rao be'nn ka' lla'a yellrion'. Ze'den' naken wen, bixha cha' ze'd na' ba bde ke bill naken zna', ¿akxha gonllon nench yeyaken zna' da yobre? Billbi de gónellon, na' cho'nnllon wrej wchekw be'nn len. 14’Na' re' nakre ka beni' da llseni' ke yeolol be'nne. Na' nakre ka to yell da lli' to rao ya', na' yeololte be'nne llre'e akre'n. 15Notno wa'l to da wseni', na' si'ze' to da wdo'se'n, zan wze'en sibe nench wseni'n ke yeolol be'nn lla'a lo yo'. 16Na' ka nak re' llaya'l soteze sore gonre da wen nench re'e be'nne, na' ka' we'rao ake' Xallo Dios be'nn zo yebá. 17’Bi gákere cha' nada' za'a walana' ley dan' bzoj da Moisésen', na' dan' bzoj yezikre be'nn ka' be'e xti'll Diosen' kana'. Za'a nench gok kan' llia yeolol xti'll Diosen' dan' bzoj be'nn ka'. 18Da likzen' te ke yellrio ni, ren da ka' llre'llo le' yebá na', na' nia', ni ra't dan' nyoj le' ley na', bi gak yeranen, gaktelle yeolol dan' nllia Diosen' bia'a gak. 19Ke len na' notezre cha' bi gonre kan' llian na', la'kze cha' naken le zerao da da'o, na' leska' cha' wroe're be'nn yobre bi chejle' ke leyen', bi nakre be'nn brao ke gan' llia Diosen' llnebie'. Na' notezre cha' gonre kon kan' llian na', lekze ka' cha' wroe're be'nn yobre gon ake' kan' nen na', Dios be'nnen' zo yebá na' llnebie', nne'e nakrenre be'nn brao. 20Nia' re', cha' bi wcha'a yichjra'llda'oren' nench gakllen wen rao Diosen', kerke kan' nak ke be'nn fariseo ka', na' be'nn ka' llsedre ke ley dan' bzoj da Moisésen', bi yellinre yebá gan' llia Diosen' llnebie'. 21’Bakze nnézere kan' bzejnie' da Moisésen' be'nn ka' blla'a kana', bne'e: “Nono gotre. Na' cha' no gote lwellj be'nnache, koxchis ka' wchoy ake' akre gon ake' ke'e.” 22Na' nada' llepa' re', cha' llaklla're lwellj be'nnachre, Diosen' gone' yel koxchis keré. Na' noteze' cha' zi'chi'll lwellje', llaya'l gon be'nn ka' llnebia'n yel koxchis ke ake'. Na' noteze' cha' lla'd di'll lwellje', wase'l Diosen' le'e lo yi' gabil. 23’Na' cha' kat zere lo yoda'on nench we're bi dan' lle'nere we're we'raore Diosen', na' lljadinra'llre bdilrenre to be'nn lwelljre, 24na'ze llaya'le wkwa'nnre choll dan' no'xre, na'll lljaye'xhenre be'nnen'. Yeyoll na' wak lljwa're dan' llaya'l we're Diosen'. 25’Kate to be'nne gawe' xhia keré rao koxchis, chak yo're nez na', lewiá akre ko're xhnneze, na' yezorenre' wen nench bi lljwe'e re' yora'o. Cha' bi bro're xhnneze rao nezen' zejren', ka llinre rao koxchisen', gone' re' rao na'a xa'y ka', na' ko' ake' re' lo rill ya. 26Di'll li llepa' re', kere wabeje' re' cha' bi chixhjre doxhen dan' llba'yre. 27’Ba bre'kzere ley dan' bzoj da Moisésen' nen: “Bi tarenre no'r yobre be'nn bi nak no'r keré.” 28Na' nada' llepa' re', noteze be'nne cha' llwie' to no're, na' llzera'lle' le'e, ba llonkze' da xhinnjen' lo ra'llda'we', rebze ba llonkze' ka be'nn ka' llzoa xto ake'. 29’Na' cha' yejraore cha'wen' llonen nench gonre da xhinnje, wenre chenak kwejre yejraoren' na' lljacho'nnren, kerke da gonre da xhinnjen'. Wenre chenak kweyi' to yejraoren', kerke da kweyi' doxhenre lo yi' gabilen' ni ke len. 30Na' cha' na'ren' cha'wen' lle'nen xoben re' gonre da xhinnje, wenre chenak wchoyren na' lljacho'nnren, kerke da gonre da xhinnjen'. Wenre chenak kweyi' to na'ren', kerke da kweyi' doxhenre lo yi' gabilen' ni ke len. 31’Lekze nnézere ley dan' bzoj da Moisésen' nen: “Noteze be'nn yera'a ren no'r ke'e, llaya'l chas to da we'e di'll bara' ake'n.” 32Na' nada' llepa' re' noteze be'nn llara'rene' no'r ke'en, na' cha' bibi do'l de ke no'ren' darene' be'nn yobre, rao da nxhollen' llzoe' le'e, llone' nench sorén no'ren' ye to be'nn bi nak xhyiwe'. Na' noteze be'nn yechayna'rene' to no're be'nn bara'a ren be'nn ke'e, rebze da xhinnjen' gonkze' ka dan' llonkze be'nnen' darén xho'r be'nne. 33’Na' leska' ba nnézkzere ka dan' bzejnie' da Moisésen' da xozxta'ollo ka' kan' golle' leake': “Góntere cha' bi dan' bchebre gonre rao Xanllo Diosen'.” 34Na' nada' nia' re', bi wa'lrizre Diosen' nere: “Yebá na' llzoa' di'll lin' lloa'a”, kat bi da gonre, le yebá na'n zo Diosen' llnebie'. 35Na' bi nnerizre: “Yellrio nin' llzoa'n di'll lin' lloa'a”, le yellrion' ke Dios na'kzen'. Na' bi nnere: “Jerusalén na' llzoa'n di'll lin' lloa'a”, le naken yell ke Dios be'nn nake le zerawe be'nne llnebia'. 36Na' bi nnere: “Yichja' ni llzoa'n di'll lin' lloa'a”, le bi gak gonre nench yich yichjren' yeyaken da lliche o cha' yeyaken da gasje. 37Kat nnere waken, waksen na'; na' cha' nere bi gaken, bi gaksen na'. Le billre di'll da nnere nench chejle' ake' ke re' bi naken wen. 38’Nnézere ley dan' bzoj da Moisésen' nen: “Cha' to be'nn gone' zi' yejraoren', wak wayonre zi' yejrawe'n, na' cha' to be'nne wxo'pe' to layren', wakse yexo'pre to laye'n.” 39Na' nada' nia' re': Bi wllonre wsa'kzi' be'nne re'. Cha' to be'nne kape' xa'yre, lewzé da ye chla'n kape'n. 40Cha' to be'nne llakyollrene' re', na' lle'nre' wke'e xhare, lewe'e latje wka'rente' xhadon kerén'. 41Na' cha' to be'nn gone' bien chejrenre' wa're no yoa' ke'en do achj hor, lechejrene' lewa'n chop ka ton ne'e na'. 42Na' cha' bi dan' llnnabe be'nne re', cha' naken zi da we're, lewe'n; lekwej cha' bi dan' llnnabe' kwejre'. 43’Na' lekze ba nnézere ley kerén' llian: “Llaya'l llie're be'nn lwelljre, na' wiere be'nn llwie re'.” 44Na' nada' nia' re', llaya'l llie're be'nnen' llwie re', na' llaya'le nnabre rao Dios gak wen ke no be'nne zi'chi'll re'. Legón wen ke be'nne llwie re', leyelwill Dios nench gak wen ke no be'nn llsa'kzi' re'. 45Cha' ka' gonre, llroe'kzere nakre xhi'nn Dios be'nnen' llia yebá. Le Le'en llone' llra' will nench llseni'n ke be'nn wen ak, na' ren ke be'nn wen da xhinnj ak. Na' leska' llone' llak yejw ke be'nn wen ren ke be'nn wen da xhinnj ak. 46Na' cha' re' llie're chraoze be'nne llie' re', na' bi llie're be'nn yobre, ¿bixha da wen gon Diosen' kerén'? Le ka'kze llon be'nn wachixhj ka'. 47Na' cha' no bi'ch lwelljre ka'ze llwapre lliox, ¿llákere cha' wen na' llonre ka'? Bi naken wen ka', le ka'n llon be'nn ka' bi nombia' Dios. 48Zan llaya'l gakre be'nn wen be'nn cha'o kon noteze be'nne, kan' nak Xallo Dios be'nn zo yebá nake' be'nn wen be'nn cha'o.

will be added

X\