San Mateo 4

1Na' Spíritu ke Diosen' benen nench byej Jesúsen' latj dachen' gan' gokra'll daxi'on wko'yelen Le'e gone' da xhinnj. 2Na' bi bdaokze' rao choa (40) lla choa yere, na' ka bde choa lla na', bdone'. 3Na' jabi'y daxi'on gan' ze Jesúsen', llen Le'e: —Cha' rennro' nako' dogarje Xhi'nn Dios, benchk yej ki yeyak aken yet xtir. 4Na'll lle Jesúsen' len: —Nyoj xti'll Diosen': “Kere toze yet xtir dan' gaollo na', llonn yel nban ke lli'o be'nnach, renkze di'll dan' ll-lloj lloa' Diosen' nbanrenllo.” 5Na'll bche'e daxi'on Le'e Jerusalén na', gan' nak yell ke Dios. Na' bche'n Le'e yichjo yoda'o gan' nak zeraoze sibe, 6na'll llen Le'e: —Cha' rennro' nako' dogarje Xhi'nn Dios, bxhi'tchek ganni, lljasote'o lle'le, le nyoj xti'll Diosen': Diosen' wse'le' be'nn ka' nak angl ke'e gakrén ake' rwe', na' go'x ake' rwe' nench ke lljache'o yej. 7Na'll lle Jesúsen' len: —Leska' nyoj xti'll Diosen': “Bi llaya'l nnabro' Diosen' cha' rennre' kan' ne'en.” 8Da yobre bche'e daxi'on Le'e to rao ya' da nak sib kwis, na' broe'n Le'e yeolol yell da zjalli' doxhen yellrio, na' ren yel za'k yel nbaraz ke ka'. 9Na' gollen Le'e da yobre: —Yeolol da ki llre'ro' ganni, gona'n rallna'o cha' rwe' wche'k xhibo' rawa', na' gono' nada' xhen. 10Na'll lle Jesúsen' len: —Bayej ka'le, daxi'o, nyojkze le' xti'll Diosen': “Llaya'l gonlira'llo' Dios, na' toze Le'en we'ra'o.” 11Na'll bakwas daxi'on ka'le, na' le bllinte angl ke Diosen' jakrén ake' Le'e. 12Na' baza'a Jesúsen' gan' nbane Judean', na' bayeje' gan' nbane Galilea, ka benre' ba yo' Juan na' lo rill ya. 13Na' bze'e yell Nazareten', jasoe' yellen' nzi'i Capernaum, dan' lli' lloa' nisda'on awllo gan' nzi'i Zabulón, na' gan' nzi'i Neftalí. 14Na' gok kan' bne da Isaías be'nn be'e xti'll Diosen' kana', ka bzoje' dan' llia: 15Ka nak gan' ne Galilean' gan' lla'a zan be'nn bi nak be'nn Israel, gan' nzi'i Zabulón, na' Neftalí gan' nban akre' lloa' nisda'o ye chla' yeo Jordán na', 16nchole yichjra'llda'o be'nn ka' lla'a ganna'. Bixha Diosen' bse'le' to beni' xhen lo yichjra'llda'o be'nn ka', gok ake' ka be'nn wat, na' Diosen' ba bache'e lo yichjra'llda'o ake'n. 17Kana' bzorao Jesúsen' bdixjwe're', na' bne'e: —Lewayate ke da xhinnj ba benre, le ba zo rez nnebia' Dios be'nnen' zo yebán'. 18Jesúsen' zeje' lloa' nisda'o ke Galilea, ka bre're' chop be'nn wxhen bel nzi'i Simón Pedro, na' ren bi'che' Andrés, llza'l ake' yixj dan' zenrén ake' bel ka' lo nisen'. 19Na'll lle'e leake': —Ledá gonre nada' txhen, na' gona' nench re' wtopre be'nne, na' yelloj ake' rao da xhinnj ke ake' ka'. 20Na'll le bsanra'llte yixj bel ke ake'n, jannao ake' Jesúsen'. 21Na' Jesúsen' bze'e ye ra't, na' bre're' Jacobo xhi'nn Zebedeo, na' ren bi'che' Juan, yo' ake' to lo barco ren xa ake'n, llayoncha'o ake' yixj ke ake'n. Na' leska' goxh Jesúsen' leake', lljannao ake' Le'e. 22Na'll le ben akte' barcon' rallna'a xa ake'n, na' jannao ake' Jesúsen'. 23Jesúsen' byeje' yeolol yell ka' zjalli' do gan' nbane Galilea, broe' bsedre' be'nn ka' zjalla'a toto yoda'o ke be'nn Israel ka'. Na' bdixjwe're' Di'll Wen na', kan' nnebia' Diosen'. Na' bayone' be'nn ka' llak biteze yillwe'. 24Na' doxhente yellrio gan' nbane Siria bllirj di'llen', yeolol ke da wen ka' bene'n. Na' be'nn Siria ka' jwa'a ake' yeolol be'nn we'e ka' rawe'n, be'nn llak biteze yillwe', be'nn lley llra, be'nn yo' daxi'o yichjra'llda'o ake' ren be'nn llak xhgot, na' be'nn bi dá nia'na'a ak, na' bayone' leake'. 25Na' zan be'nne bnao Le'e, be'nn lla'a gan' nbane Galilea, na' ren be'nn yell ka' nzi'i Decápolis, na' be'nn za'k Jerusalén, na' be'nn za'k yezikre yell da'o ka' zjalli' do Judea, na' be'nn za'k do chla' yeo Jordán.

will be added

X\