San Mateo 3

1Bde zan iz, kate Juan be'nnen' bchoa nisen' byeje' latj dachen' do gan' nbane Judea. 2Na'll bllin be'nn ka' gan' zoe'n, na' bdixjwe're' leake', lle'e leake': —Lewayate ke da xhinnj ba benre, le ba bllin lla nnebia' Dios be'nnen' zo yebán'. 3Ke Juan na' bzoj da Isaías be'nnen' be'e xti'll Diosen' kana', na' bne'e: Be'nnen' nne zillj latj dachen', ne'e: “¡Legón xhnid, legoncha'o nez gan' te Xanllon', lewsarj yichjra'llda'ore ka llon to be'nn llsarj to nez li!” 4Na' xha Juan na' goken de yich xha camello, na' bchej lloa' le'en to yid, na' bdawe' bichsoa ren blli'nda'o ke beser yi'xe. 5Be'nn lla'a yell Jerusalén na', na' be'nn lla'a yeolol yell ka' gan' nbane Judea, na' leska' be'nn ka' zjalla'a yell ka' nechj yeo Jordán na', baza'a ake' jak ake' gan' zo Juan na'. 6Na' bxoarap ake' bi da xhinnj ka' non ake'n, na'll bchoa Juan na' leake' nis lo yeo Jordán na'. 7Leska' jak zan be'nn Israel ka' be'nn ka' nzi'i fariseo, na' be'nn ka' nzi'i saduceo. Jake' nench bchoa Juan na' leake' nis. Na' ka bre'e Juan na' leake'n, na'll lle'e leake': —¡Re' nakre be'nn zban be'nn wxhiye'e, llonre ka bele! ¿No bzejnie' re', wak warare rao dan' wse'l Diosen' katen' gone' yel koxchis ke be'nnachen'? 8Cha' rennere ba bayátere ke da xhinnjen' nonre na', llaya'l gonre da wen nench gakbe'e be'nne ba balla'a yichjra'llda'ore. 9Bi gonzre xhbab nnere: “Xhi'nn dia lla Abraham neto'.” Yej ka' ni't nga, wakte gon Diosen' wayaken xhi'nn dialla Abraham. 10Leska' ba no'xte' banchen' xhnid, yeolol yay da bi llbia daxhix wen, wchoye' do roe, gaken waye da wzeye'. 11Nada' da li llchoa' re' nis cha' wayátere ke da xhinnjen' nonre, zan za za're ye to be'nne gone' nench cho' Spíritu ke Diosen' lo yichjra'llda'oren', da llon ka llon yi'. Na' be'nnen' za za'a ko'llra' za'klle' ka nada', ni jeze da yela' xhere'n bi gak gona'. 12Katen' yede'n, gone' ka llon be'nn kate llsoe' trigo, llazie' trigon', na' llzeye' yixh bebe ken. Le'e nape' to yi' da bi wayorkze. 13Na' bza'a Jesúsen' gan' nbane Galilea, na' byeje' gan' zo Juan na' lloa' yeo Jordán na', nench choe' nis. 14Na' Juan na' bi go'nre' wchoe' Jesúsen' nis, lle'e Le'e: —Nadra'n llaya'l wchoa'o nis, na' rwe'ro' za'zo' wchoa' rwe' nis. 15Na'll lle Jesúsen' Juan na': —Bchoa nada' nis. Da na'n llaya'l gonllo nench gak yeolol dan' ne Diosen' gak. Na'tell bcheb Juan na' bchoe' Le'e nis. 16Na' ka bayoll blloa Jesúsen' nis, na'll balloje' lo nisen', le byarjte yebán' gan' llia Diosen', na' bre're' Spíritu ke Diosen', betjen ka to plom da'o, bllinen jasorenen Le'e. 17Na' ben akre' bnne Diosen' be'nnen' zo yebán', bne'e: —Be'nn nin' nak xhi'nna' nllie'ra', llawera' llayazra'lla' kwis.

will be added

X\