San Mateo 25

1Leska' bne Jesúsen': —Nna' wa'a di'll kan' gak kat nnebia' Dios, be'nnen' zo yebán', llonen rebze kan' gok ke chi no'r we'o. Na' zjano'x ake' twej da llseni' ke ake', jake' jalexh ake' yelloj be'nn byion' llchayna'n. 2Na' ga'y no'r ka' bza'a nak ake' be'nn llejnie', na' ye ga'ye nak ake' be'nn xhawatraz. 3No'r xhawatraz ka' bi be'x ake' lmet ceit da gonrén ake' llin, kat yebill dan' yoll lo dan' llseni' ke ake'n. 4Na' no'r ka' llejnie'n, no'x ake' da wseni' ke ake'n, rente lmet ceit da gonrén ake' llin, kat yebill dan' yoll lo dan' llseni' ke ake' na'. 5Na't blle wachayna'n, na' no'r ka' brezen' btas ake' chak bez ake'n. 6Na' to be'nn bnne'e zillj, ka do llere lle'e leake': “Ba llalloj wachayna'n, lecho'o lljenrenlloe' txhen.” 7Ka golle' leake' ka', yeolol no'r ka' bazella', na'll bayoncha'o ake' dan' llseni' ke ake'n. 8Na' no'r xhawatraz ka', lle ake' be'nn ye ga'y ka': “¿Bi gonn ra't ceit kerén' neto'? Le ba llabill keto' ni.” 9Na' no'r ka' lle ake' leake': “Bi gak gonnto'n, le nxholl bi gaken ke yeolol-llo. Zan lelljaxi'n gan' llo'te'n.” 10Bixha no'r xhawatraz ka', jake' jaxi'i ake' ceiten'. Na' chak zjake' na'le, ballín be'nn wachayna'n, na' no'r ka' non xhniden', bayo'rén ake' le'e txhen gan' llak lnnin', na' be'nn wen llin ka' basej akte' yo'n. 11Ka ballín no'r ka' bi ben xhniden', jazé ake' lloa' yo'n, na' llnne ake' be'nn ka' lla'a lo yo'n: “¡Be'nne, bsarje ganni cho'to'!” 12Na' le'en lle'e leake': “Di'll li nia', bi wsarja' cho're le bi nombia' re'.” 13Na'll lle Jesúsen' be'nn ke'e ka' non Le'e txhen na': —Kan' llaya'l sore rez baten' yednnebia', le bi nnézere bi llan', na' baten' yeda' yellrio ni da yobre, nada' Be'nn Gorj Radj Be'nnach. 14’Yel llnebia' ke Diosen' be'nnen' zo yebán', llonen ka ke to be'nne byeje' to yell zi'te. Na' llan' bze'e na', goxhe' be'nn wen llin ke'e ka', na' bkwa'nne' rallna'a ake' xhmelle' da nape'. 15Toe' bkwa'nnrene' le'e ga'y mellen' nzi'i talento. Na' ye toe' bkwa'nnrene' le'e chop mellen'. Na' be'nnen' ye to bkwa'nnrene' le'e to mellen'. Kon kan' llwie' llon totoe' be'e leake'. Bayoll na' bze'e broe' nez. 16Na' be'nnen' bkwa'nnrene' ga'y mell na', le bzoraote' llonrene'n llin, na' bene' gan lekze ye ga'yen. 17Lekze ka' be'nnen' bkwa'nnrene' chop mellen', na' bene'n gan ye chopen. 18Na' be'nnen' be'e ye to mellen', byeje' jakwa'che' xhmell xane'n ga bche'nne' lo yo. 19’Gok scha kat ballín xan ake'n, na'll goxhe' leake', nench na' wannabe' dan' bkwa'nne' rallna'a ake'n. 20Na' bllin be'nn wen llin ke'e be'nnen' bkwa'nnrene' ga'y mellen', na'll lle'e le'e: “Xana', ni de ga'y mellen' benno' nada', na' ba bena' gan ye ga'yen.” 21Na' xane' na', lle'e le'e: “Ba beno' da wen. Nako' be'nn wen llin wen, ba beno' ka llaya'l gono' kone da da'on bkwa'nnrena' rwe'n, ke len na', gona' rallna'o da xhenlle. Byo' nench soreno' nada' nbaraz.” 22Na'll ka bllin be'nnen' bkwa'nnrene' chop mellen', na'll lle'e le'e: “Xana', ni de da chop mell dan' bkwa'nno'n, na' bena' gan ye chopen.” 23Na'll lle'e le'e: “Da wen beno' nako' be'nn wen llin wen. Ba beno' ka llaya'l gono' kone da da'on bkwa'nnrena' rwe'n. Na' nna' gona' rallna'o da xhenlle, byo' nench soreno' nada' nbaraz.” 24Na' ka bllin be'nnen' bkwa'nnrene' to mellen', na'll lle'e xane'n: “Ni de xhmello'n bkwa'nnreno' nada'n. Nnezra' nako' to be'nn znia, na' llarapo' to ga goz be'nn yobre, na' llatopo' ga goz be'nn yob akre. 25Ke len na', jache'nna' lo yo, na' bkwa'cha' xhmello'n, le blleba' wnita'n. Ganni de xhmello'n, bazi'n.” 26Na'll lle xane'n le'e: “¡Be'nn wen llin ke nxhia, be'nn ria! Nnéztero' llarapa' ga goz be'nn yobre, na' llatopa' ga goz be'nn yobre. 27Na' cha' nnéztero' ka', ¿bixchen ke brejo' xhmella'n be'nn yobre, nench yezia'n, na' ren yichje da gonen gan?” 28Na'll golle' be'nn wen llin ka' yela': “Leyeka'a mell dan' bkwa'nnrena' be'nn ni, na' we'rén be'nnen' ba no'x chi mell na'. 29Le noteze be'nn gon wen kone dan' we'e xane'n le'e, na' xane'n we'lle' le'e da xhenlle. Na' noteze be'nne bi llonrene' llin dan' we'e xane'n le'e na', xane'n yeke'e da da'on be'e le'en. 30Na' ka nak be'nn wen llin ria ni, leyebeje' lewza'le' gan' nak xchole, na' lljachelle' na' gaoxoxj laye'.” 31’Katen' yeda' da yobre nada'n Be'nnen' Gorj Radj Be'nnach, nsa'a yel za'k xhen kia'n, na' nchia' yeolol angl kia' ka', na' kwia' gapa' yel llnebia' xhen. 32Na' be'nn ke yeolol yell, yedop ake' rawa'n. Na' kat ba ni't yeolole'n, na' sorao yela' ake', ka llon to be'nn gop xhi're, kat llabeje' to kere xhi'r ka', na' kere chib ka'. 33Na' be'nn ka' nak ka xhi'r da'o, wni't ake' kwita'n chla' cha'we, na' be'nn ka' nak ka chiv, wni't ake' kwita'n ye chla' rbese. 34Na' nada' naka' rey yepa' be'nn ka' ni't chla' cha'wen': “Ba ben Xa' Diosen' sore nbaraz, ledá ganni nench nnebia'renre nada', kan' ba nllia Diosen' bia'a, kan' bxhe yellrio na'te. 35Le ka bdona', bennre da bdawa'; na' wilra' nis, na' bennre da we'ja'; na' ka goka' be'nn zi'te, na' brebre nada' rillre. 36Na' ka bi de xhara'na', na' bennre da goka'; na' ka goka' yillwe', na' badra'nnre nada'; na' ka byoa' rill ya, na' badwiare nada'.” 37Na' be'nn wen ka' ye ake' nada': “Xanto', ¿bat bre'to' rwe' dono', na' bennto' da bdao'? Na' ¿baten' wilro' na' bennto' da we'jo'? 38Na' ¿baten' goko' ka be'nn zi'te na' brebto' rwe' rillto'? Na' ¿baten' bre'to' rwe' bi de xhara'no' na' bennto' da goko'? 39Na' ¿baten' goko' yillwe' na' byo' rill ya, na' badwiato' rwe'?” 40Na'll yep ake': “Da li nia' re, ka nak baya'chra'llre be'nn lwelljre ka', le leake'n nak ake' ka bi'cha', ka zana', la'kze bibi za'k akteke' rao be'nnach, nadkza'n baya'chra'llre.” 41’Na' be'nn ka' ni't ye chla' rbesre, yep ake': “Lekwas ka'le, ba llia bia'a keré kweyi're, lelljayak lo yi' gabil, dan' bi llayolkze gan' ba nak xhnid ke daxi'on ren angl ke ka'. 42Le ka bdona', bi bennre da gawa', ka wilra', na' bi bennre da ye'ja'. 43Ka goka' be'nn zi'te, bi bennre ga tasa'; ka bi de xhara'na', bi bennre da gaka'; ka goka' yillwe', na' ka byoa' rill ya, bi badra'nnre nada'.” 44Na'll nne ake': “Xanto', ¿baten' bi baya'chra'llto' rwe', ka bdono', na' wilro', na' goko' be'nn zi't, na' bi de xhara'no' na' goko' yillwe', na' byo' rill ya?” 45Na'll yep ake': “Da li nia' re', dan' bi baya'chra'llre be'nn lwelljre ka', la'kze bibi za'k ake' rao be'nnach, renkze nada'n bi baya'chra'llre.” 46Na'll sa'kzi' be'nn wen da xhinnj ka' ke chnare, na' be'nn wen ka' so akse' nbaraz ke chnare.

will be added

X\