San Mateo 24

1Na' ka ba llaza'a Jesúsen' yoda'o braon', zayeje' ga yobre, jabi'y be'nn ke'e ka' non Le'e txhen na' gan' ze'en, na' bzorao llroe' akre' Le'e yoda'on katken' naken na'. 2Na'll balli'i Jesúsen' xti'll ake'n, bne'e: —¿Llre're katken' naken na'? Da li nia' re', ni to yej ki zjankwa'a ganni, no'x lwellje bi yega'nnen. Yeololen yeyinnj aken. 3Na' lli' Jesúsen' rao ya' gan' nzi'i Ya' Olivos, jabi'y be'nn ka' non Le'e txhen na' kwite'n, na' lle ake' Le'e: —Lle'neto' nnézeto' baten' gak da ka'. Na' ¿akre gak nnézeto' katen' ba zo bawze yedo', na' ba rez yeyoll yellrion'? 4Na'll balli'i Jesúsen' xti'll ake'n: —Lewiá kwasro nono siye'e re'. 5Le zan be'nne llach yellrio ni, be'nn ye'ne wlan ake' latj kia' ni, na' nne ake': “Nada'n Cristo.” Na' be'nn zan gore siye'e ake'. 6Na' sorao yénere llak wdile do gateze, na' yénere wak wdile, na' bi llebre, le ka' llaya'lkze gaken. Na' kere le wayollte yellrion'. 7Le til toto yell, yell xhen ren ye to yell xhen, na' kwe' yillwe', na' ga't win, na' xo' do gateze. 8Yeolol da ki gaken, na' naken ka ga zorao yel lley llra. 9’Na' be'nn ka' lla'a gateze yell, wie akre' re' dan' llonlira'llre nada'n, na' gon ake' re' rao na'a be'nn ka' llwie re', na' wsa'kzi' ake' re', na' got ake' re'. 10Na' kana' be'nn zan be'nn ba llonlira'll ake' nada', kwej yichj ake' bill gonlira'll ake' nada'. Na' leska' wayechj ake' gon lwellj ake' rao na'a be'nn ka' llwie leake'n. 11Na' be'nn zan siye'e ake' ne ake': “Xti'll Diosen' llyixjwe'ra'”, nench siye'e ake' be'nn zan. 12Na' ka naken ba llak da ke nxhia na', be'nn zanll be'nn ka' yeso'n da xhinnjen', na' wsan ake' bill llie' lwellj ake'. 13Na' noteze gonzidra'lle, na' bi kwej yichje' dan' llonlira'lle' nada'n llinte gate', le'en yerá. 14Na' lljak be'nne doxhen yellrion', lljatixjwe' akre' Di'll Wen na', nench nneze be'nnachen' llaya'le wzenaye' ke Dios, nench nnebie' lo ra'llda'o ake'n, na' kate ba bnneze be'nne lla'a do gateze, kana'llen' yeyoll yellrion'. 15’Daniel be'nnen' bdixjwe're xti'll Diosen' kana', bzoje' ke da zban kwis, dan' wxinnj latjen' gan' llonlira'll-llo Diosen'. Na' kat re're ba bllin dan' gan' zo yoda'o braon' (be'nne llrabe da ni llaya'le chejnie're'n), 16kana' be'nn lla'a gan' nbane Judea, llaya'l wxhonnj ake' lljake' do ya' da'ore. 17Na' be'nn dá do yichjo ke'e, bi yeyetje' yetop xchinraze da de lo yo' rille'n. 18Na' be'nn dá yi'xe, bi yeyeje rille' lljaxhie' xhara'ne. 19¡Nya'chraz naken ke no'r ka' nna noa' bda'o, na' no'r ka' llwa'll bda'o lo lla na'! 20Lennabe rao Dios bi wxhonnjre kat llak zay, na' rao lla nba'nne. 21Le wa't yel zi' yel ya', ka bi nna ga'ten rao yellrio ni, na' yeyoll na', billbi ga'te ye to ka len. 22Na' chenak Xanllo Diosen' bi yeza'che' llan' gak ka', nono yerakze; zan waza'che'n, ni ke dan' nllie're' be'nn ka' ba breje' llonlira'll Le'e na'. 23’Kana' cha' no ye re': “Lewiá, ni zo Criston' be'nnen' brej Diosen' nnebie'”, na' “Lewiá, na' zoe'”, bi chejle're. 24Le chas be'nn wxhiye'e, be'nn gakra'll ake' wlan ake' latj kia' ni, na' gon ake' ka be'nn lloe' xti'll Dios. Na' gon akte' yel wak da re'e be'nne, na' billre da yebán akre', nench siye'e ake' leake'. Na' rente be'nn ka' ba brej Diosen' nak Xhi'nne', ye'ne be'nn wxhiye'e ka' siye'e ake', cha' gak siye'e ake' leake'. 25Ba nnézere kan' gaken, le bakze bdixjwe'ra' re' yeolol dan' gaken. 26Na' cha' no ye re': “Latj dach na' zo Criston'”, bi chejle're, na' cha' ye ake' re': “Zot Criston' lo yo' na'”, bi chejle're ke ake'. 27Kan' llak kat llep yes llseni'n doxhen le' yebán', lekze ka'n gak kat llin lla yeda' da yobre, nada' Be'nnen' Gorj Radj Be'nnach yeda' da yobre, na' yeolol be'nne re'e akre' nada'. 28Ni llonen ka ke be'nnen' ne: “Gan' de ba wat na'n ll-llay chod ka'.” 29’Na' kat yeyoll yel llza'kzi' ke be'nnachen', willen' yeyaken xchole, na' beon' bill wseni'n, na' berj ka' ra'll aken le' yebán', na' yeolol da llre'llo le' yebán', gak aken ka llak yellrion' kat llxho'. 30Kana'll be'nn lla'a yellrion' re'e akre' nada' Be'nnen' Gorj Radj Be'nnach, llia' radj bej ren yel wak xhen kia'n ren yel be'nn za'k kia'n, na' be'nn lla'a gateze yell ka' zjalla'a rao yellrion' kwell ake' kwis. 31Na' katen' yeda'n, kwell to trompet zillje, na' llach angl kia' ka', yetop ake' be'nn ka' doxhente yellrio, be'nn ka' ba breja' nak ake' nada' txhen doxhente yellrio, na' ga zeraoze nak zi'te. 32’Lewzenay ke wsa'krebra'n ka to yay higo: Kate llaga' xhla'yen', llaga'n la'y lle'ne, ba nnézere ba zo nez yera' yej. 33Na' leska' kat re're ba llak da ke nxhia, ka'n ba bnia' na', kana'll nnézere ba zo rez yeda' da yobre. 34Da li nia' re', be'nn ka' lla'a nna', nna nban akte' kate sorao gak da ki. 35Ka nak yebán' ren yellrion' wllin lla kat te ke, zan ka nak xti'lla'n kere da te ke ka'zen'. 36’Zan nono nneze bi llan', bi horen' gak ka', ni angl ka' ni't yebá na', ni nada'. Toze Xa' Dios na' nnezre'. 37’Kan' gok ka llan' bzo da Noén', kan' gakse katen' yeda' nada' da yobre, naka' Be'nn Gorj Radj Be'nnach. 38Le kan' gok kan' za yerabj ake' nisen', kan' bzo da Noén', lla'a ake' lle'j llao ake', na' llchayna'a ake' lloe' ake' yel wachayna'a ke no xhi'nn ake', nna llon akte' ka'n bllin lla byo' da Noén' lo barcon'. 39Ni ke gokbe'e akzre' bin' gak, ka gokll yejsi'o xhen na', na' babia nisen', kana'll gokbe'e akre'. Lekze ka'n gakze kat yeda' da yobre, kana'llen' yeyakbe'e akre'. 40Kana'n chop be'nn ni't yi'xe, toe' yezia' na' ye toe' yekwa'nna'. 41Na' chop no're ze llot ake', toe' yezia' na' ye toe' yekwa'nna'. 42’Ke len na' lesó lekweze, le bi nnézere bi lla ya'nne yeda' da yobre, nada'n naka' Xanre. 43Legón xhbab ke da ni, cha' nneze xan yo'n do bi hor ya'nnen' llin be'nn wan na' rille'n, na' bi taskze' nench bi we'e latj cho' be'nnen' rille'n kwane' xchinraze'. 44Ke len na', lesó lekweze batkren' yeda' da yobre, le katen' bi llonre xhbab yeda', kana'n yeda' nada', Be'nnen' Gorj Radj Be'nnach. 45’Notezre cha' zore rez batteze, nakre ka to be'nn wen llin be'nn nak be'nn si'n, na' be'nn llon da llaya'l gone'. Na' cha' to be'nn wen llin llone' wen kwis, na'll gon xane'n rallne'e rille'n, na' we'e da yesa'o be'nn wen llin ka', kat llaya'l gao ake'. 46Na' cha' be'nn wen llin ke'en, llonteze' kon kan' goll xane'n le'e, nbaraz soe' kat yellín xane'n. 47Di'll li nia' re', xane'n gone' rallne'e yeolol da de ke'e. 48Zan cha' nake' be'nn wen llin xhawatraz, na' gone' xhbab ne'e: “Ba ll-llere xana'n, bi yeyedze'.” 49Na'll sorawe' tilrene' be'nn lwellje' ka', na' ye'j gaoxene' ren nollre be'nn wazó. 50Na'll yellín xane'n to lla bi nnezre', na' yedo'lre' le'e. 51Na' dan' bi llone' wen na', xane'n chintate' le'e, na' lljazoe' le'e radj be'nn chop rao ka', ganna' lljallell ake' to gaoxoxj lay ake'.

will be added

X\