San Mateo 23

1Jesúsen' bzorawe' be'rene' be'nn ke'e ka' di'll, be'nn ka' non Le'e txhen na', ren be'nn ka' bllay gan' zoe' na', na' bne'e: 2—Be'nn ka' llsedre ke leyen' na', ren be'nn fariseo ka', ba zjalan ake' latj ke da Moisésen'. 3Na' wzenayre kat we'e ake' di'll, kan' ne xti'll Dios na', na' gonre kan' ne ake'n. Zan bi gonre kan' llon leake'n, le bi llon ake' kan' ne ake' na'. 4Le ley ke ake'n naken ka to yoa' zi', da nono soe wa'a, len na' lle'n akre' wa'a be'nn yobre len, na' bi llwa'a ake'n leake', na' ni ke llda'ba'y akze' gon ake' kan' ne ake' na'. 5Ka nak be'nn ki yeolol dan' llon ake'n, llon ake'n ga re'e be'nne leake', nench gon ake' leake' xhen. Da xhen non ake' yich ka', nchej ake' do na'a ake', do roxhga ake' gan' llia xti'll Diosen'. Na' da tonn xhen non xha ake'n. 6Na' llawé akre' lljache' ake' ga lljache' be'nn brao ka', katen' lljake' ga llak no lnni, na' kat llej ake' yoda'o ke ake'n. 7Llawé akre' gap be'nne leake' bara'nne kate llallay akre' leake' do lao ya'a. Na' llawé akre' ye be'nne leake': “Rabí, Rabí” (da ni lle'nen nen be'nn llzejnie' be'nne). 8’Zan re' bi yewere ye be'nne re' Rabí, le toze nada' Criston' naka' be'nn llzejnie' be'nne. Na' yeololre nakre ka bi'ch lwelljre. 9Na' leska' bi yezre' noteze be'nne: “Xa”, le toze Dios be'nnen' zo yebán' nak Xallo. 10Na' bi yewere cha' ye be'nne re': “Xana'”, le toz nada' Criston' naka' ka be'nn lliarao raore. 11Cha' nol re' nakre be'nn brao, llaya'l wxhexjra'llre gakrén lwelljre. 12Le noteze be'nne llayone' xhen kwine', Dios na' gone' sie' to zdo', na' be'nne llxhexjra'll rawe', Dios na' gone' gake' xhen. 13’Zan ¡nya'chraz naken keré llroe' llsedre ke leyen', na' re' be'nn fariseo! ¡Nakre be'nn chop rao! Llonre ka'kze be'nn llsej yebá ke Xanllo Diosen'. Na' ni ke lldez re', na' ni ke lloe'zre latj te be'nn yobre. 14’Na' ¡nya'chraz gak keré llsedre ke ley dan' bzoj da Moisésen', na' re' be'nn fariseo! ¡Nakre be'nn chop rao! Llka're no yo' ke no'r wazeb ka', na' da llde're kat llalwillre Diosen', scha llzere lloe're di'll. Wallayraollre kerke nollre be'nn llon da xhinnj. 15’Na' ¡nya'chraz gak keré llsedre ke ley dan' bzoj da Moisésen', na' re' be'nn fariseo! ¡Nakre be'nn chop rao! Llejteze llejre, lljatirjre be'nn zi'te, be'nn gonrén re' txhen; ke chop rasre wallayrao ake', ka nak bazi'i ake' dan' llroe' llsédere na', na' llak aklle' be'nn wen da xhinnj ka re'. 16’¡Nya'chraz gak keré! ¡Nakre ka be'nn lchol, be'nn llgo' ye to be'nn yobre nez! Nere noteze be'nne cha' ne'e: “Yoda'o braon' llzoa'n, di'll lin' lloa'a”, na' nere kere bi zejen kan' bne'en. Zan cha' ne'e: “Yeolol bi da nak de ya cha'o nzi'i oro dan' de lo yoda'on llzoa'n, di'll lin' lloa'a”, na'll nere llaya'l gone' kan' bne'en. 17¡Re' nakre' ka to be'nn lchol bi llejnie're! ¿Llákere cha' dan' nak de ya cha'o dan' nzi'i oro, za'kllen kerke yoda'o gan' xhoan nak la'yen' na'? 18Na' leska' nere cha' to be'nn ne'e: “Rao bkoy gan' llxoa ake' dan' lloe'rao ake' Dios llzoa'n, di'll lin' lloa'a”, na' nere bi zejen kan' bne'en. Zan cha' ne'e: “Dan' xhoa rao bkoy lo yoda'o na', llzoa'n, di'll lin' lloa'a”, na'llen' nere llaya'l gone' kan' bne'en. 19¡Re' nakre ka be'nn lchole bi llejnie're! ¿Llákere cha' za'kll dan' xhoa rao bkoyen', kerke bkoy ke Diosen' gan' xhoan nak la'yen' na'? 20Le cha' to be'nne ne'e: “Rao bkoy dan' zo lo yoda'on llzoa'n, di'll lin' lloa'a”, renkze dan' xhoa rao bkoy na', ba llzoe' chet ka' ne'e ka'. 21Na' cha' be'nne ne'e: “Yoda'on llzoa'n, di'll lin' lloa'a”, lekze ka' Diosen' llzoe' chet ka', le na'kzen' zo Diosen'. 22Na' cha' to be'nn ne'e: “Yebán' llzoa'n, di'll lin' lloa'a”, Dios na'kzen' llzoe' chet ka', le na'n zo Diosen' llnebie'. 23’¡Nya'chraz gak keré llsedre ke ley dan' bzoj da Moisésen', na' re' be'nn fariseo! ¡Nakre be'nn chop rao! La'kze lloe'tere Diosen' ra't wej toto kwen yi'x da llazre, da ka' nzi'i anis, na' comino, na' menta, na' billre yi'xe, na' llsanra'llre, bill llzenayre ke da ka' nak da lliaraoll gonllo, kan' ne xti'll Diosen' gan' nen llaya'l gonre da nak wen rao Dios, na' llaya'l yeya'chra'llre lwellj be'nnachre, na' llaya'l gonre dan' ba bnere gonre. Na' da kin' nakll da llia bia'll gonre, na' bi kwej yichjre bi we're da ka' lloe'kzre Dios na'. 24¡Nakre ka be'nn lchol, be'nn llgo' ye to be'nn yobre nez! Rebze llonre ka to be'nne llabej bebe da'o riz yo' loe dan' lle'je'n, na' bi llakbe're' cha' lle'je'n, na' llebe' da xhenll. 25’¡Nya'chraz naken keré llsedre ke ley dan' bzoj da Moisésen', na' re' be'nn fariseo! ¡Nakre be'nn chop rao! Nakre ka ye'nn da to ko'llze llyibe', bi llyibe' loe. Na' llake be'nne re' nakre be'nn wen, rencha' lo yichjra'llda'oren' zera'llre bi da de ke be'nne, na' llawere llaka'ren. 26¡Re' be'nn fariseo, nchol yichjra'llda'ore! Leyeyate da xhinnj kerén', nench gakre be'nn wen. Na'll gakre ka to ye'nn dan' yibe ko'lle ren loe. 27’¡Nya'chraz naken keré llsedre ke ley dan' bzoj da Moisésen', na' re' be'nn fariseo! ¡Nakre be'nn chop rao! Nakre ka to ba, da none' nbaraz ko'llre, na' loere lla'n llit ke be'nn wat, na' yeolol da bi nak yall. 28Ka'n llonren', na' llake be'nn re', nakre be'nn wen, rencha' lo ra'llda'oren' nakre be'nn chop rao, na' be'nn wen da xhinnj kwis. 29’¡Nya'chraz naken keré llsedre ke ley dan' bzoj da Moisésen', na' re' be'nn fariseo! ¡Nakre be'nn chop rao! Lloncha'ore lloa' ba ke be'nn ka' be'e xti'll Dios kana', na' lloncha'ore lloa' ba ke yezikre be'nn gok be'nn wen. 30Na' nere: “Chenak lli'o ba zollo kan' bzo xozxta'ollo ka', bi benrén aklloe' txhen, got ake' be'nn ka' be'e xti'll Diosen' kana'.” 31Na' dan' llonren' llroe'n toz ka naksren' kan' gok da xozxta'ore ka', bet be'nn ka' be'e xti'll Diosen' kana'. 32¡Lewzeraochaze legón bi ka da zban ka', bill go'le gon da xozxta'ore ka'! 33’¡Re' nakre be'nn zban, na' be'nn wxhiye'e, llonre ka bele! ¿Akre gonre nench gak yerare lo yi' gabil, gan' ba nwia Diosen' wase'le' re'? 34Ke len na', wse'la' be'nn we'rene' re' xti'lla'n, na' no be'nn si'n, na' nollre be'nn wzejnie're re' xti'lla'n. Na' re' gotre bale', wda'a akre' le' yay cruz, na' ye bale' chintatre do lo yoda'o keré na', na' ye bale' wrayre, lljake' gateze yell. 35Na' dan' gonre ka', gapre do'l ke yel got ke be'nn wen ka', ba got rao yellrio ni, bxhi'zen kan' brarj xchen da Abel, be'nnen' gok be'nn wen rao Dios, na' bayollten ke da Zacarías xhi'nn da Berequías. Le Zacaríasen' bet xozxta'ore ka' le'e radj yoda'o za llinl-llo gan' zo bkoyen'. 36Di'll li nia' re', re' nbanre nna', ko'llre xhoa yel got ke yeolol be'nn ka' baso't xozxta'ore ka'. 37’Re' be'nn Jerusalén, llotre be'nn ka' ba bse'l Diosen' lladzejnie're re' xti'lle'n, na' ba bchekwre leake' yej. Da zan ras gokra'lla' yetopa' re', ka llon to bellj ba nche'e xhi'nne, llatobba' leakba' lo xirba'n, na' bi gokra'llre. 38Na' yell kerén' yega'nnchgan ka to dan' nzanra'll. 39Na' ni llepa' re', bill re're nada' llinte lla nnere': “Nbaraz ba za'a be'nnen' nse'l Xanllo Diosen' ganni nnebie'.”

will be added

X\