San Mateo 20

1Jesúsen' bne'e: —Yel llnebia' ke Diosen' llia yebán' llsa'krebra'n ka ke to be'nn nape' to yellrio ga naze' lba uvas. Na' bze'e rillen' to tzir da'o byeje' jatirje' be'nn wen llin gon ake' llin rao yellrio ke'en lla na'. 2Na' bga'nnrene' di'll be'nn wen llin ka', to denario chixhje' totoe', kon ka llak tlla llin. Na'll bse'le' leake' gan' de llin na'. 3Na' ka do lladá ga, byeje' gan' llak ya'an, na' bre're' nna lla'll be'nn bi de xchin. 4Na' lle'e leake': “Lechejrén gan' naza' lba uvas kia'n, lelljén llin, na' wyixhjkza' re' ka llaya'le.” Na'll jak be'nn ka'. 5Da yobre byeje' ka do wawill, na' ka do lladá chonne. Bre're' nna lla'll be'nne bibi llin de ke ake', na'll bse'le' leake' nench lljen ake' llin gan' naze' lba uvas ke'en. 6Na' ka do lladá ga'y tlle'lre byeje' da yobre, na' bre'llre' nna ni'tll be'nne bibi llin llon ake'. Na'll lle'e leake': “¿Bixchen bi byejre llin?” 7Na'll lle ake' le'e: “Notno bne neto' lljento' llin.” Na'll lle'e leake': “Lechejrén cha', lelljén llin gan' naza' lba uvas kia'n. Na' chixhjkza' re' ka llaya'lkze.” Na'll jak be'nn ka'. 8Na' ka gol na', xan lba uvas na', lle'e be'nn wen llin brao ke'en: “Bayaxh be'nn wen llin ka' nench chixhj akoe', be'nn ka' bra' kan' ba llayoll llin na', sorao' chixhjo', na'tellre chixhjo' be'nn ka' bra' da nelle.” 9Na'll bzorao be'nn wen llin braon' yixhje' zga'tek be'nn ka' bllin lladá ga'ye ba wlle'n, bdixhje' leake' twej denario totoe'. 10Na' ka bzorao bdixhje' be'nn ka' bzorao tzir na', na' llak akre' cha' chixhjlle' leake' da xhenllen'. Na' tozkze ka bdixhje' yeolol akte'. 11Na' ka bayoll bxhi'i raxhj be'nn ka', bzorao tzir na', goklla'a ake', bi byazra'll ake' kan' ben xan llin na', na' bchachrén ake' le'e. 12Ne ake': “Do lla bllayrao neto' rao ze'yen' bento' llin ko'on, na' rebze ka bdixhjo' neto' ren be'nn ka' ben llin to hor wejze.” 13Na' xan llin na' golle' toe': “Be'nn nllie'ra', bitbi da xhinnj llona' keré. ¿Kere bnetello to denario chixhja' re'? 14Ba bxhi'i raxhjo', wak wayejo', lle'nra' wa'a be'nn ki kon kan' ba benna' rwe', la'kze bra' ake' ba wlle'. 15Nada' gona' kon ka lle'nra' ren da de kia'. ¿Cha' llakxhe'ro' dan' naka' be'nn wen na'?” 16Kan' naken na', be'nn zan nak ake' ka be'nn lliarao, na' wllin lla kat yeyak ake' ka be'nn za'a xhante, na' be'nn ka' nak ake' ka be'nn za'a xhante nna', leake'n yeyak ake' ka be'nn lliarao. Le be'nn zan na' llayaxhe', na' txhonnjze'n llalloj. 17Ka bza'a Jesúsen' cheje' Jerusalén na', na' breje' kere be'nn chllinn ka' non Le'e txhen na', na'll golle' leake': 18—Nna' ba zejllo Jerusalén na', gan' gon ake' nada' rao na'a bxoz wnebia' ka', na' ren be'nn ka' llsedre ke ley dan' bzoj da Moisésen', na' wchoy ake' kia' gata', nada' naka' Be'nn Gorj Radj Be'nnach. 19Na' gon ake' nada' rao na'a be'nn bi nak be'nn Israel nench wtitj akre' nada', na' chintat ake' nada', na' got ake' nada', wda'a ake' nada' le' yay cruz, na' yeyónn lla na', yebana' radj be'nn wat ka'. 20Na'll byej xhi'nn Zebedeo be'nn ka' nzi'i Jacobo ren Juan, na' ren xhna' ake' na', na' bche'k xhib xhna' ake'n rao Jesúsen'. Na' lle'e Le'e: —Llnnabra' rwe' to okré. 21Na'll goll Jesúsen' le'e: —¿Bixha okrén' lle'nro' gona'? Na'll lle'e Le'e: —Lle'nra' llopte xhi'nna' ki, kwe' akbe' chla' weje kwito'n kate llin lla nnebia'on. 22Jesúsen' lle'e Jacobon' ren Juan na': —Re' ni ke nnézzere ka dan' llnnabren'. ¿Wchoyra'llre tere yel zi' yel ya' ka dan' tia' nada', gak keré kan' gak kia' na'? Na'll lle ake' Le'e: —Wzoekzeto'. 23Na'll lle Jesúsen' leake': —Da likze tere yel zi' yel ya' ka dan' tia' nada', na' gak keré kan' gak kia'n, zan bi naken rallna' nnia' noxhan' kwe' kwita'n kat llin lla nnebia' na', be'nn ka' ba brej Xa' Dios na'n, leake'n gak kwe' ake' kwita'n. 24Na'll ka bene be'nn ye chi ke'e ka', kan' bne be'nn ka' chop na', goklla'a ake' leake'. 25Na'll goxh Jesúsen' yeolole', na' lle'e leake': —Ba nnézkzere be'nnen' llnebia' toto yell, llon ake' wzenay be'nn ka' nak rallna'a ake', na' be'nn ka' nak be'nn brao llnebia' ake' leake'. 26Zan bi naken ka' ke re', cha' notezre lle'nere gakre be'nn brao, llaya'l wxhexjra'llre gakrenre lwelljre. 27Na' cha' notezre lle'nere gakre be'nn lliarao, zga'tek llaya'le gakre ka to be'nn wen llin ke be'nn lwelljre. 28Ka nakzen kia' nada', Be'nn Gorj Radj Be'nnach, kere za'a nench wzenia'na'a be'nne nada'n, za'a nench wzenia'na' be'nnach, na' llsanra'll kwina' got ake' nada' ni ke xto'l be'nnach. 29Na' ka baza'a ake' yell Jericón' be'nn zan ba nao Le'e. 30Na' chop be'nn lchol zjalli' lloa' nez gan' zayeje' na', na'll ka gokbe'e akre' ba zayej Jesúsen' gan' zjalli' ake'n, na'll besia' ake' ne ake': —¡Xanto', rwe'n nako' xhi'nn dialla rey David! ¡Baya'chra'llchga neto'! 31Na' be'nn zan ka' zanao Le'en bdil ake' leake' nench kwe' ake' llize. Na' leake'n yezikre bnne ake' zilljlle: —¡Xanto', rwe' nako' xhi'nn dialla rey David! ¡Baya'chra'llchga neto'! 32Na'll brexh Jesúsen', na' goxhe' leake' jake' rawe'n, na'll lle'e leake': —¿Bixhan' lle'nere gona' ke re'? 33Na'll lle ake' Le'e: —Xanto', lle'neto' yere'to'. 34Jesúsen' baya'chra'lle' leake', na' bdane' yejrao ake'n, na'll le bare'e aktere', na'll bnao ake' Le'e.

will be added

X\