San Mateo 2

1Ka llan' llnebia' rey Herodes, gorj Jesúsen' gan' nzi'i Belén, to yell gan' nbane Judea. Na' Jerusalén na' bllin to chop be'nn si'n be'nn nzi'i magos, za'k ake' do gan' llra' willre. 2Na' bnnab akre' be'nn rao yell ka', lle ake' leake': —¿Gann rey ke be'nn Israel ka', be'nnen' ne ake' ba bra'? Nnézeto' ba gorje', le bre'to' berj ke'en gan' llra' willre, na'llen' za'to' zadye'raotoe'. 3Ka bene rey Herodesen' ka', to bitkra'n gokre', leska' yeolol be'nn Jerusalén ka'. 4Na'll batop reyen' yeolol bxoz wnebia' ke be'nn Israel ka', na' leska' yeolol be'nn ka' llsedre ke ley dan' bzoj da Moisésen'. Na' bnnabre' leake', garen' ne ake' garj Criston'. 5Na'll goll be'nn ka' Herodesen': —Belén na' garje' gan' nbane Judea, le ka'n llia dan' bzoj to be'nn be'e xti'll Diosen' kana': 6Ka nak yell Belén gan' lla'a dialla ke da Judán', naksen yell da za'ke rao yell wnebia' ka' zjalli' gan' nbane Judean'. Le to be'nn Belén na' gake' be'nn wnebia', na' Le'e gake' be'nn braon' rao yeololte be'nn Israel, le leake'n nak be'nn kia'. 7Na'll goxh Herodesen' be'nn si'n ka' nzi'i magos llillize nench jake' rawe'n, na'll bnnabre' leake' batya'nnen' bre'e akre' bra' berjen'. 8Na'll bse'le' leake' Belén na', lle'e leake': —Lechejchk, lelljawiá, lelljadirj bida'on to lloa'. Na' kate yellélerebe'n, yeddixjwe're nada', nench na' cha'a llje'rawabe'. 9Bayoll bene be'nn si'n ka' nzi'i magos kan' goll reyen' leake'n, na'll bro' ake' nez. Na'll berj dan' bre'e akre' gan' llra' willen', zejen le' yebán' lliaraon rao ake'n, bllinten yo' gan' zo bida'o na', na' jasén. 10Na'll llawé be'nn si'n ka' kwis ka bre'e akre' berjen' da yobre. 11Na'll ka bllin ake' yo' gan' zo bida'on ren xhna'be' Marían', na'll bche'k xhib ake', ben akebe' xhen. Na'll bsarj ake' dan' no'x ake'n, na' brej ake' ya cha'o dan' nzi'i oro, na' yare, na' to da la' xhix da nzi'i mirra, na' be'e ake'n kebe'. 12Na' ka nna ni't be'nn si'n ka' Belén na', bdixjwe' Diosen' leake' rao bichgale, bill yedé ake' gan' zo Herodesen'. Na'll baka'a ake' ye to nez yobre, ballín akte' rall ake'. 13Na' ka ba zayej be'nn si'n ka', to angl ke Xanllo Dios broe'rawe' Josén' rao bichgale, na' lle'e le'e: —Byas, bche'e bida'on ren xhna'be'n, lelljak gan' nzi'i Egipto, na' ganna' sore, na' kate netella', kana'll wak wayedre, le Herodes na' llayirjebe' nench gotebe'. 14Na'll le byaste Josén', bche'e bida'on ren xhna'be', na' zjake' Egipton'. 15Na'll bzo ake' Egipto na'ze chak bllin lla got Herodesen', na' ka' gok kan' bne Diosen' dan' bzoj to be'nn be'e xti'll Diosen' kana', bne'e: “Gan' nzi'i Egipto na', bayaxha' xhi'nna'n.” 16Na'll ka gokbe'e rey Herodes kan' bene be'nn si'n ka' le'e, ka nak bill badé ake' gan' zoe'n, na'll goklle'e kwis. Na' bse'le' be'nn waka'a ya ke'e ka' nench jet ake' yeolol bida'o byio zerao bi de chop ize, le ka't byi bsa'ke nak bida'on llayirje'. Na' jet ake' bi ka' gorj ak Belén na', na' yezikre yell da'o ka' nechj Belén na'. 17Na' dan' bet ake' bida'o ka', bzoa di'll kan' bzoj da Jeremías, be'nnen' be'e xti'll Diosen' kana' llian: 18Nente chi'i be'nn Ramá, ka llasbell ake' ni't ake' yel wan. No'r ka' nake xhi'nn dialla da Raquel llaya'chra'll ake', llak akre' ke xhi'nn ake' da'o ka', na' bi lle'n akre' no yeyoe' leake' yel llxhenra'lle, le ba wasa't akbe'n. 19Ka bde got Herodesen', to be'nn nak angl ke Xanllo Dios broe'rawe' Josén' rao bichgale ka nna zoe' Egipton', na' lle'e le'e: 20—Nna' byas bache'e bida'on ren xhna'be' na', na' lelljayak Israel na'. Ba got be'nn ka' llayirj bida'on nench yeso'tebe'. 21Na'll bayas Josén', bache'e bida'on na' ren xhna'be', na' jayake' yell ke ake' Israelen'. 22Bixha ka bene Josén' ba zo Arquelaon' llnebie' roraz da xe'e Herodes na', na'll bllebe' wayeje' do gan' nbane Judea. Na'll bdixjwe' Diosen' le'e rao bichgale, bi llaya'le' lljayake' Judean', na' lljayake' gan' nzi'i Galilea na'le. 23Na' ke len na' ballín ake' Nazareten', na' jazó ake' ganna'. Na' ka' bzoa di'll kan' bzoj be'nn ka' be'e xti'll Diosen' kana', bne ake': “Wsi'i ake' Le'e be'nn Nazaret.”

will be added

X\