San Mateo 18

1Na'll jak be'nn ka' non Jesúsen' txhen jabi'y ake' kwite'n, lle ake' Le'e: —¿Nore neto' gakllto' be'nn brao kat gon Dios be'nnen' llia yebán' nnebia'o? 2Na'll goxh Jesúsen' to bida'o, na' bze'ebe' kllol ake'n. 3Na'll lle'e leake': —Da li nia' re', notezre cha' bi wcha'a yichjra'llda'ore, na' wayakre ka to bida'o, kbat gakre Diosen' txhen be'nnen' llnebia'n. 4Noteze be'nne cha' yeyake' ka bida'o ni, na' waxhexjra'lle' rao Diosen', na'llen' gake' be'nn brao ke Diosen' be'nnen' llnebia'. 5Na' noteze be'nne gonre' bida'o ak wen ka bida'o ni, dan' llonlira'llbe' nada', nadkza'n llonre' wen. 6’Noteze be'nne gone' bix to bida'o ki nxenra'll nada' gonbe' da xhinnj, nakteren wen na', wchej ake' yene' to yej yiche, na' wza'l ake' le'e lo nisda'o, kerke da gone' nench gon to bida'o ki da xhinnj. 7Nya'chraz naken ke be'nnach dan' de da zan yellrio ni, da llko'yelen be'nnachen' gon ake' da xhinnj, zan nya'chraz ke be'nn llko'yele' be'nne nench gone' da xhinnje. 8’Ke len na', cha' nia'na'ren' llxhoben re', gonre da xhinnj, wenre chenak wchoyren, kerke da gonre da xhinnjen'. Wenre yellinre gan' de yel nban na', yallje chla' ta'kre, na' nlloy chla' nia're, kerke da yeyejre lo yi' gabilen' nya'tezre. 9Na' cha' yejraoren' llxhoben re', gonre da xhinnj, wenre chenak kwejre raoren' kerke da gonre da xhinnjen'. Wenre yellinre gan' de yel nban na', yallje chla' yejraoren', kerke yeyejre lo yi' gabilen' zo chop la'te yejraoren'. 10’Lewiachga bi gónere bida'o ki nxenra'll nada' kaze. Ni nia' re', angl ka' llap aksebe', na' ni't akse' llwia ake' rao Xa' Diosen' llia yebán'. 11Le nada' Be'nn Gorj Radj Be'nnach, za'a nench wasra'a be'nn ka' ba nbeyi'. 12’¿Akxha gákere? Cha' zo to be'nn nape to gayoa (100) xhi'r da'o, na' cha' nnit toba', ¿bi wkwa'nne' ba tapralj twalj ka' (99), na' lljadirje' bada'on bnit do radj ya'n? 13Da li nia' re, kat yellélereba'n, yewere' kwis ba balleleba', kerke ba tapralj twalj ka', nna ni't na'. 14Ka'kzen' naken ke bida'o ki. Xallo Dios be'nnen' llia yebá na', bi lle'nre' kweyi' ni tobe'. 15’Cha' to be'nn lwelljre gone' to da xhinnj keré, lechej lellje'rene' di'll llopzre. Na' cha' wayakbe're' da xhinnjen' bene', na' wzenaye' keré, ba bayono' be'nn bi'cho'n gan na', chet ka'. 16Na' cha' bi llejle' di'llen' llje'renre'n, wenre lewche'e ye to chop be'nn lwelljre nench na' re'e akre' ba go'tyoere be'nnen' yecha'a yel kan' llon ke'en. 17Na' cha' bi wzenaykze' keré, na' lewe'e di'll kan' llone'n rao yeololre kan' nakre lldop ll-llayre lloe'raore Diosen'. Na' cha' bi wzenaykze' ke yeololre, bill gonre' txhen. Wenre legone' ka to be'nn bi nxenra'll Dios, ka no be'nn wachixhje be'nn llon da xhinnj. 18’Da li nia' re', yeololte da wchejre rao yellrio, wllejten yebá, na' yeololte da yesellre rao yellrion', wayellten yebá. 19’Na' da yobre nia' re', cha' ntil chopre rao yellrio ni, na' gonre toze di'll bi dan' nnábere Diosen', Xa' Dios be'nnen' zo yebán' gonnkze' dan' nnáberen'. 20Le gan' nllay chop chonnre llonre nada' xhen, ganna' zorenkza' re' txhen. 21Na'll jabi'y Pedron' lle'e Jesúsen': —Xanto', bixha cha' to be'nn lwellja' bi da gone' kia' da wlleyi' nada', ¿bale ras llaya'l yezi'xhena' ke'e? ¿Zerao gall ras? 22Na'll lle Jesúsen' le'e: —Kere nia' zerao gall ras yezi'xhen ke lwelljren', ni nia' re' wyon chi (70) ras de gall ras wejen', yezi'xhenre'. 23’Yel llnebia' ke Dios be'nnen' llia yebán' za'kreben ka ben to be'nn wnebia', na' llba'y be'nn wen llin ke'e ka' xhmelle', na' gokra'lle' we'rene' leake' di'll arken' llba'y ake' ke'e. 24Ka bzorao llwie' arken' llba'y totoe', na' bllin be'nn nell be'nnen' nak be'nn wen llin ke'en llba'ye' chi mir mell dan' nzi'i talento, na' naken mell xhen kwis. 25Na' be'nn na' bibi xhmelle' de da yeyixhje'n. Na'll be'nn wnebia'n golle' be'nn wen llin ke'e ka' llje't ake' le'e ren xho're' na', na' ren xhi'nne' ka', na' ren yeolol da zjadé ke ake' nench yeyaxhj dan' llba'y ake'n. 26Na'll bche'k xhib be'nn wen llin ke'en rawe', go'tyoere' le'e lle'e le'e: “Xana', bdapchga yel llxhenra'll kia', wayonnkza' doxhente dan' llba'ya' ko'on.” 27Na'll baya'chra'll be'nn wnebia'n le'e, bazi'xhene' dan' llba'ye' ke'en, na'll bsane' le'e. 28Bixha ka balloje' rill xane' na', le balláytere' ye to be'nn lwellje', be'nn llba'y ke'e ra'te. Na'll le be'xte' le'e, be'xe' yene', lle'e le'e: “Bayónn dan' llba'yo' kia'n nna'steke.” 29Na'll be'nn lwellje'n leska' le bche'kte xhibe' rawe', lle'e le'e: “Bdapchga yel llxhenra'll kia', wayonnkza' doxhen dan' llba'ya' ko'on.” 30Bixha le'en bi bxhi'xhene' ke be'nn lwellje'n, le gollte' be'nn ka' go'x ake' le'e ko' ake' le'e rill ya, na' golle' be'nn ka' bi yebej ake' le'e cha' bi nna yeyixhje' ke'en dan' llba'ye'n. 31Na'll be'nn wen llin ka' yela', ka bre'e akre' kan' benre' be'nnen', na' gok akre' kwis. Na'll byej ake' rao xan ake'n, jell ake' le'e kan' benre' be'nn lwellje'n. 32Na'll goxh be'nn wnebia'n le'e da yobre, na'll lle'e le'e: “¡Be'nn wen da xhinnj kwis nakkazo'! Nada' bazi'xhena' ko'o doxhente dan' llba'yo' kia'n, le go'tyoero' nada' yezi'xhena'n ko'on. 33¿Bixchen bi baya'chra'llo' be'nn lwelljo'n llba'y ko'on kan' bena' nada' baya'chra'lla' rwe'?” 34Na'll goklla'a be'nn wnebia'n kwis, na'll golle' be'nn ka' bro' ake' le'e lo rill ya ga yellayrawe', na' bi yellojkze' cha' bi nna wayixhje' doxhen dan' llba'ye'n. 35Na'll goll Jesúsen' be'nn ka' non Le'e txhen na': —Kan' gon Xa' be'nnen' llia yebán' keré, cha' bi llazi'xhenre ke lwelljre do yichj do ra'llre biteze da gon akre' re'.

will be added

X\