San Mateo 17

1Bde gok xop lla bche'e Jesúsen' Pedron' ren Jacobo, na' ren Juan, bi'ch Jacobo na', na' zre akze' jake' to rao ya' sibe. 2Na' llwia akte' kat blla'a yichjrao Jesúsen', gok llaktit kwis lloa'rawe'n kan' nak will na', na' xhara'ne'n goken llich kwis, goken ka beni'. 3Rawe na' bre'e akre' da Moisés ren da Elías lloe'rén ake' Jesúsen' di'lle. 4Na'll lle Pedron' Jesúsen': —Xanto', le wen zollo ganni. Cha' lle'nro', na' gonto' chonn yo', to ko'o, na' to ke Moisés, na' ye to ke Elías na'. 5Nna lloe'te Pedron' di'll ka', kat byechjze to bej llaktit leake', na' lo bej na' ben akre' bne Diosen': “Be'nn nin' nak xhi'nna' nllie'ra' llayazra'lla', llawera' kwis ke'e. Ke Le'en wzenayre.” 6Ka bene be'nn ka' nche'e Jesúsen' ka', to blleb akze', na' byal ake' slloa're rao yon'. 7Na'll jabi'y Jesúsen' jaxoa ne'en yichj ake', na' lle'e leake': —Lewayas. Bi llebre. 8Na' ka balis yichj ake'n, nollno llra' ye toze Jesúsen' ze'e. 9Bayoll na', ka llayetj ake' le' ya' na', lle Jesúsen' leake': —Ka nak dan' bre're ni, bi we're di'll ka'. Kat nada' Be'nn Gorj Radj Be'nnach yebana' radj be'nn wat ka', kana'll wak we're di'll ka'. 10Na'll be'nn ka' non Le'e txhen na', lle ake' Le'e: —¿Bixchen be'nn ka' llsedre ke ley dan' bzoj da Moisésen', lle ake' neto' zga'tek da Elías be'nn bzo kana'n llaya'l yede' da yobre? 11Na'll lle Jesúsen' leake': —Da likzen' zga'tek da Elías na'n yede', na'll yeyoncha'we' yeololte. 12Zan ni llepa' re', ba bedkze Elíasen', na' nono bayombia' cha' le'en, na' ben akre' le'e ka lle'n akre'; na' ka'kzen' wsa'kzi' ake' nada' Be'nnen' Gorj Radj Be'nnach. 13Na'll gokbe'e be'nn ka' non Le'e txhen na', lloe' di'll ke da Juan be'nnen' bchoa be'nne nis. 14Na' ka bllin ake' gan' lla'a be'nn zan kwis, to be'nn jatile' Jesúsen', jache'k xhibe' rawe'n, na' lle'e Le'e: 15—Xanto', baya'chra'llchga xhi'nna' ni, le llazbe' xhgot, na' llallayraobe', na' da zan ras ba byalbe' do lo yi' leska' lo nis. 16Na' ba badwa'be' rao be'nn ko'o ka' non rwe' txhen na', na' bi gok ake' yeyón akebe'. 17Na'll lle Jesúsen' leake': —¡Re', be'nn bi llonlira'lle, na' llonre ka nen keré! ¿Ye art serena' re'? Lla ledá wa'a bida'on ni. 18Na'll Jesúsen' bdile' daxi'on, na' ballojen lo yichjra'llda'o bida'on. Na'll le bayaktebe'. 19Bayoll gok ka', na'll jak be'nn ka' non Le'e txhen na' awllo, goll ake' Le'e: —¿Bixchen bi gokto' yebejto' daxi'on? 20Na'll lle Jesúsen' leake': —Bi gokre yebejren le bi byejle're ke Diosen' wak gone' yellojen. Da li nia' re', chenak dan' llejle'ren' naken ka to nak nbaz ke mostaz, na' yere ya' ni: “Bakwas ganni, na' jazó ganna'te”, na'll gakte kan' neren'. Gaga de da bi gak gonre kon cha' llejle're ke Diosen'. 21Nench sa'ke yebejre daxi'o ka', ka da ka' babeja' yichjra'llda'o bida'on, llaya'l gonre was, na' yelwilltezre Diosen'. 22Na'll ka zayej Jesúsen' Galilea na', ren be'nn ka' non Le'e txhen na', golle' leake': —Nada' Be'nnen' Gorj Radj Be'nnach, dekz de gaka' rallna'a be'nne ka' llwie nada', 23got ake' nada', na' yeyoll got ake' nada' na' yeyónn lla yebana' radj be'nn wat ka'. Na' gokya'che be'nn ke'e ka', ka ben akre' xti'lle'n. 24Ka ballín ake' Capernaum na', jak be'nn ka' llchixhj ke gaxt ke yoda'o braon' rao Pedron', na' goll ake' le'e: —¿Bi yixhj maestro kerén' da llaya'l chixhje' ke yoda'o brao ni? 25Na'll lle Pedron' leake': —Llyixhjkze'n. Na'll Pedron' kan' byoe' lo yo'n, le gollte Jesúsen' le'e: —¿Akre llakro' Simón? Ka nak be'nn wnebia' ka' zjalla'a yellrio ni, ¿noxhan' llakro' llchixhj ake'? ¿Be'nn wrall ke ake'n o cha' be'nn zi'ten'? 26Na'll lle Pedron' Le'e: —Be'nn zi'ten' llchixhj ake'. Na'll lle Jesúsen' le'e: —Na' lli'o naktello be'nn wrall ke ake' bi llaya'l chixhjllo ke yoda'on. 27Zan nench nono bi nne kello, byej lloa' nisda'on, na' bza'l yixj ko'on, na' bel nellen' seno' na', lo lloa'ba' na' llelro' to mell. Na' yeyo'xo'n, na' lljatixhjo' ke lloptello.

will be added

X\