San Mateo 16

1Le jabi'yte bal be'nn fariseo ka', na' ren be'nn saduceo ka' gan' ze Jesúsen', gokra'll ake' kwej ake' Le'e di'll, nench na' ga't da wakw ake' Le'e xhia chole. Na' bnnab ake' gone' to yel wak da re'e akre' da za'a yebá. 2Na'll lle Jesúsen' leake': —Kat llwiare le' yebán' do ba wlle', na'll nere: “Walla'a wxe, le ba llaxhná le' yebán'.” 3Na' kate llre're llazé bej xhna le' yebán' kat lleni', na'll nere: “Wak yejw zay, le ba ze bej xhna le' yebán'.” Be'nn chop rao ake, re' nnézkzere cha' wak yejw zay, na' cha' wak ze'ye katen' llre're akre nak le' yebán', na' bi llayakbe're bi zejen da ka' llon Diosen' ka llan' ba zollo nna'. 4Re' yo' da xhinnj lo ra'llda'ore, na' ba bsanra'llre Diosen'. Na' llnnabre gona' ye to yel wak da re'tere, zan bi gona' ka dan' llnnabren', zeraoze ka dan' broe' Diosen' re', ka dan' benrene' da Jonás, be'nnen' be'e xti'll Diosen' kana'. Na'll bayoll bne'e ka', baze'e gan' ze ake'n. 5Na'll ka ballín ake' ye chla're nisda'o Galilean', be'nn ka' non Le'e txhen na', bi jadinra'll ake' yeyo'x ake' yet xtir da gao ake'. 6Na'll lle Jesúsen' leake': —Lewiaya'nn ke kwa binn ke be'nn fariseo ka', na' ke be'nn saduceo ka'. 7Na'll lle lwellj ake': —Dan' bibi yet xtir no'xllo na'n, na'llen' ne'e ka'. 8Jesúsen' gokbe're' ka di'llen' lloe'rén lwellj ake'n, na'll lle'e leake': —¿Bixchen llakrizere dan' bi no'xre yet xtir na'? ¿Bi llonlira'llre nada' napa' yel wak wawa' re'? 9¿Bi nna chejnie'ren? ¿Bi lljadinra'llre kan' bwawa' ga'y mir be'nne kone ga'yze yet xtir da'o? Na' lekze, ¿bi za'ra'llre ye bale llomen' baga'nn dan' batopren'? 10Leska' ¿bi zara'llre bwawa' ye tap mir be'nne, kone gallze yet xtir da'o? ¿Za'ra'llre ye bale llom da goxhj batopre da baga'nne? 11¿Bixchen llákere dan' bi no'xre yet xtir na'n, llepa' re' ka', lewiaya'nn kan' nak kwa binn ke be'nn fariseo ka', na' ke be'nn saduceo ka'? 12Na'll bayakbe'e akre', kere be'e di'll ke kwa dan' llonrén ake' llin dan' llaslli'o yet xtir na', be'e di'llen' ka', nench ke gakchixe lo yichjra'llda'o ake'n ka nak dan' llroe' llsed be'nn fariseo ka' ren be'nn saduceo ka'. 13Ka bllin Jesúsen' ren be'nn ka' non Le'e txhen, gan' nzi'i Cesarea de Filipo, na'll golle' leake': —¿Bixha llasné be'nn ka' noxha nada'? 14Na'll lle ake' Le'e: —Bal ake' ne ake' nako' da Juan be'nnen' bchoa nis. Na' ye bale' ne ake' da Elías rwe', be'nnen' be'e xti'll Dios kana'. Na' ye bal ake' ne ake' da Jeremíasen', na' ye bale' ne, kon to be'nn ka' be'e xti'll Diosen' kana'ten'. 15Na'll lle'e leake': —¿Bixha re'? ¿No nere naka'? 16Na'll Simón Pedron' lle'e Le'e: —Rwe'n nako' Cristo be'nnen' brej Diosen' nnebie', na' nako' dogarje Xhi'nn Dios be'nn zo ke chnare. 17Na'll lle Jesúsen' le'e: —Simón, xhi'nn Jonás, nbaraz ko'o rwe' dan' bne'o ka', notno be'nnach bzejnie' rwe' kan' bne'on. Toze Xa' be'nnen' llia yebá, Le'en bzejnie're' rwe'. 18Na' nada' nia', rwe'n re'o Pedro, na' ra'o na', lle'nen nen to yej war. Ka to be'nn llon yo' llbie' da nak yej war, nench gonrene'n llin kat kweke' ran yo' ke'en, ka'kzen' llbeja' rwe' gono' xchina', gako' be'nn lliarao lljatopo' be'nn gon ake' nada' txhen. Ni ke bi deze gon yel wak ke yel goten', nench gonen leake' gan. 19Na' gona' rallna'o yel llnebia' dan' za'a yebá. Yeololte da wchejo' rao yellrion', llejten yebá, na' yeololte da yesello' rao yellrion', wayellten yebá. 20Na'll lle'e leake' nono ye ake' cha' Le'en nake' Criston'. 21Kana' bzorao Jesúsen' bzejnie're' be'nn ka' non Le'e txhen na', llaya'l cheje' Jerusalén na'. Na' ne'e be'nn gor brao ka', na' bxoz wnebia' ka', na' be'nn ka' llsedre ke ley dan' bzoj da Moisésen' wsa'kzi' ake' Le'e, na' yeso'te Le'e, na' yeyónn lla na', yebane' radj be'nn wat ka'. 22Na'll bche'e Pedron' Le'e ga yobre to wraze, na'll bzorao lloe'rene' Le'e di'll, bdile' Le'e, lle'e Le'e: —Xana', Dios gakrene' rwe' bi gak ko'o ka di'llen' lloe'o ganni. 23Na' Jesúsen' bayechje' bwie' Pedron', na'll lle'e le'e: —¡Kwas ka'le, daxi'o! Llko'yelro' nada' nench bi gona' kan' nllia Diosen' bia'a gona'n, kere xhbab ke Diosen' nsa'o, xhbab ke be'nnachen' nsa'o. 24Na'll lle Jesúsen' be'nn ka' non Le'e txhen na': —Noteze be'nn cha' lle'nre' gake' nada' txhen, llaya'l wsanra'll kwine', na' gone' ka to be'nn noa' cruz ke'e, na' nnawe' nada'. 25Noteze be'nn lle'nre' yesrá yel nban ke kwine' yellrio ni, wnite'n, na' noteze wnit yel nban ke'en ni kia' nada', le'en ga't yel nban zejlikane ke'e. 26¿Bixha za'ken na', cha' to be'nne gone' gan doxhente da de rao yellrio, na' kweyie', bi ga't yel nban zejlikane ke'e? ¿Bi kone ga'we' yel nban na'? 27Nada' Be'nnen' Gorj Radj Be'nnach kat yeda' da yobre yellrio ni nsa'a yel za'k xhen ke Xa' Diosen', na' wchia' angl kia' ka', kana' gona' ke toto be'nnach so ake' nbaraz o cha' wsa'kzi' ake', kon da ben totoe'. 28Da li nia' re', balre lla're ganni bi nna gatre, kat llin lla re're nada' yedrena' yel llnebia' kia'n, nada' Be'nn Gorj Radj Be'nnach.

will be added

X\