San Mateo 15

1Bal be'nn fariseo ka', na' be'nn ka' llsedre ke ley dan' bzoj da Moisésen' bza'a ake' Jerusalén na', bllin ake' gan' zo Jesúsen', llnnab akre' Le'e: 2—¿Bixchen bi llon be'nn ka' non rwe' txhen kan' ben xozxta'ollo ka', bi llna'a ake' weltze toto kwe' ake' gao ake'? 3Na'll lle Jesúsen' leake': —Leska' re', ¿bixchen bi ngo' yichjre gonre kan' ne Diosen' llaya'l gonllo, na' llonre xhen ka dan' ben be'nn gor ka' ba bde? 4Diosen' ba bne'e kan' gonllon', dan' bne'e: “Legap bara'nn xaxhna're”, na' “Noteze be'nne cha' yellie' di'll xaxhne'e llaya'l gate'.” 5Na' re' llákere wak to be'nn ye'e xaxhne'e: “Bitbi de gonna' gakrena' rwe', yeolol da de kia' ba bia'a Diosen' len.” 6Na'll nere billbi llaya'l we'e xaxhne'en cha' ka'. Dan' nere ka', llbekre ka'le dan' ne Diosen', na' naore llonre ka dan' ben be'nn gor ka' ba bde kana'. 7Re' be'nn chop rao ba llonya'nnre kan' bzoj da Isaíasen' keré, gan' nen: 8Be'nn ki llon ake' nada' xhen kon lloa' ake' naze', kere lloe'rao ake' nada' do yichj do ra'll ake'n. 9Bibi za'k dan' lloe'rao ake' nada'n, ka nak llroe' llsed akre' da bayirjla'll be'nnachzen'. 10Na'll goxhe' be'nn ka' ndop ganna', na' lle'e leake': —Lewzenay dan' yepa' re' ni, na' lechejnie'n. 11Kere da lle'j llao be'nnachen' llonen le'e gake' be'nn wen da xhinnj rao Diosen'. Di'll dan' ll-lloj lloe' na', len na' llon le'e bi gake' yall rao Diosen'. 12Na'll jabi'y be'nn ka' awllo, be'nn ka' non Le'e txhen na', lle ake' Le'e: —¿Zakbe'ro' goklla'a be'nn fariseo ka', kan' ben akre' xti'llo'n? 13Na'll lle Jesúsen' leake': —Wllin lla kate Xa' be'nnen' llia yebá na', gone' ka llon to be'nn kat ll-la'lle' no yay da bi goze'. 14Waljechaze be'nn fariseo ka', le ka to be'nn lcholen' nak ake', le to be'nn lchol kere wak ko'rene' nez ye to lwellj lchole, wa lljabix ake' do lo broj chet ka'. 15Na'll lle Pedron' Le'e: —Bzejnie'cheke neto' akxha zejen kan' bne'o na'. 16Na'll lle'e leake': —¿Rente re' bi nna chejnie're ka da ki ba bnia' ni? 17¿Bi llejnie're yeolol dan' lle'j llao be'nnache llo'n lo le'e, na' ll-llin lla lladen? 18Zan yeolol di'll da lloe' be'nnach, lo ra'llda'we'n ll-llojen. Na' cha' naken no di'll zban, len na' llonen nench ra'llda'we'n bi naken yall rao Diosen'. 19Le lo ra'llda'o ake' na'n llarjla'll ake' llon ake' da xhinnj, na' llaso'te be'nne, na' llzoa xto ake', na' llzorén lwellj ake' la'kze bi nchayna'a ake', na' llban ake', na' llyirjla'll ake' xti'll lwellj ake', na' llasnné ake' ke be'nne. 20Da kin' ll-llonen nench bi gak be'nne yall rao Dios, kere dan' bi llna'a ake' kat gao ake' na'n. 21Baza'a Jesúsen' ganna', na' bayeje' do gan' lli' yell ka' nzi'i Tiro ren Sidón. 22Na' to no'r be'nn yellen' nzi'i Canaán be'nn bi nake be'nn Israel, bze'e ralle'n, na' blline' gan' zo Jesúsen', na' jatile' Le'e, na'll besie' lle'e Le'e: —¡Xana', rwe' nako' xhi'nn dialla da rey David, baya'chra'llchga nada'! To xhi'nna' no'ren' yo' daxi'o yichjra'llda'obe', nna'stek ll-llayraobe'. 23Na' Jesúsen' bi be'la'lle' ke no'ren'. Na' be'nn ka' non Le'e txhen na', zjake' awllo, go'tyoe akre' Jesúsen' lle ake' Le'e: —Balli'i no'ren', le llakia llone' nawe' lli'o. 24Na'll lle'e leake': —Diosen' bse'le' nada' nench llakrena' be'nn Israel ka', le leake'n nak ake' ka xhi'r da'o ba llakllejla'lle. 25Na'll zej no'ren' jache'k xhibe' rao Jesúsen', na' lle'e Le'e: —¡Xana', gokrenchga nada'! 26Na'll lle Jesúsen' le'e: —Bi naken wen yeka'rizllo yel wao ke xhi'nnllo ka', na' we'rizllo be'kw gaoba'n. 27Na'll lle no'ren' Le'e: —La'kze naken ka', Xana', be'kw ka' wak yetopba' bla'a da'o ka', llexj xhan gan' llbe' xanba' llawe'. 28Na'll bayechj Jesúsen' lle'e le'e: —¡Da xhen gore nxenra'llo', no're! Gakchga kan' lle'nro'n. Na'll le bayakte xhi'nn no'ren'. 29Baza'a Jesúsen' ganna', na' byeje' nez dan' llde awlloze lloa' nisda'o Galilea na', na'll byepe' to rao ya' jachie'. 30Na' be'nn zan bllin rao ya'n gan' lli' Jesúsen', nche'e ake' no be'nn nxhinnje, be'nn bi llak sa'a, be'nn lchole ake, na' be'nn blloj ake, na' be'nn bi zo nia'na'a, na' ren be'nn llak wde wdere yillwe', na' bni't ake' leake' xhnia' Jesúsen', na'll bayone' yeololte'. 31Na'll babane be'nn ka' kwis ka bre'e akre' banné be'nn blloj ka', na' bayak be'nn ka' bi zjazó nia'na'a, na' badá be'nn xhinnj ka', na' bare'e be'nn lchol ka'. Na'll bzorao lloe'xhen ake' Dios ke be'nn Israel ka'. 32Jesúsen' le goxhte' be'nn ka' non Le'e txhen na', lle'e leake': —Wa llaya'chra'lla' be'nn ki, le ba gok chonn lla lla'rén ake' nada' ganni, na' bibi de da gao ake'. Na' bi lle'nra' yesán ake' ka'ze, le kere ba bdao ake'n, nench ke chaz ake' da xchol do tnez. 33Na'll lle ake' Le'e: —Gan' zollo ni naken to latj dach, ga bibi dekze chras. ¿Ga llélello da gao yeolol be'nn ki? 34Na'll lle Jesúsen' leake': —¿Balxha yet xtir de keré? Na'll lle ake' Le'e: —Gallze yet xtir da'o de, na' ye to chop belya' da'o. 35Na'll golle' be'nn zan ka' kwe' ake' rao yon'. 36Na'll be'xe' gall yet xtir ka', na' ren belya' da'o ka', na'll be'e yel llioxken ke Dios, na'll bxhoxhje'n be'e be'nn ka' non Le'e txhen na', na' bdislas ake'n rao yeolol be'nn ka' lla'a na'. 37Yeolol akte' bdao berj aktere'. Bayoll na' batop ake' da ka' baga'nne, na' bayaken ye gall llom. 38Na' be'nn ka' bdaon' nak ake' ka do tap mir be'nn byio, llakze kere no'r ka' ren bida'o ka'. 39Na' bayoll na', base'le' be'nn zan ka' zjayak ake', na' le bayo'te' to lo barco, na' zayeje' yell ka' gan' nbane Magdala.

will be added

X\