San Mateo 13

1Rao lla na', bza'a Jesúsen' yo' gan' zoe' na' jachie' lloa' nisda'on. 2Na'll bdop be'nn zan kwis gan' llie'n, na'll byepe' lo barcon' jachie'. Yeolol be'nn ka' bdopen' zellá ake' lloa' nisda'on ga nak yo bill. 3Na'll da zan da broe' bsedre' leake' bsa'krebre' bi da ka', bne'e: —To be'nn wen llin jeze' nbaz, 4na' ka zeje' llose' nbazen', ra't dan' llaze' na', je'ten lloa' nez, na' byinn ka' llasdá le' yebán' betj akba' jatao akba'n. 5Na' ye ra'ten' jacha'n ga nake rao yej ga lli' chde'jze yo, na' da na', byob bra'n le ra'tze yo lli' gan' je'ten na'. 6Na' ka bra' will na', bzeyen len, na' byechen le bi nyintek roe zitj. 7Ye ra'ten' jago'nnen ga nak lo yay ye'che, ka blli'o yay ye'chen', na' benen len roe. 8Na' ye ra'ten' jago'nnen ga nak yo cha'o, na' bra' aken, na' balen bllia to gayoa (100) weje toton, na' ye balen bllian wyon (60) weje, na' ye balen chi lloa (30) weje. 9Re' zo nayre, lewzenay ka'n nia'n. 10Na'll be'nn ka' non Jesúsen' txhen jabi'y ake' awllo, lle ake' Le'e: —¿Bixchen llsa'krebro' bi da ka' katen' llroe' llsedro' be'nne? 11Na'll lle Jesúsen' leake': —Nono nna nneze kan' nak yel llnebia' ke Diosen', zan nna' ba llone' nench re' ba llonlira'llre nnézeren. Zan be'nn yobre bi wroe' Diosen' leake'. 12Le noteze be'nn llzenay xti'll Diosen' wzejnie'lle Diosen' leake', nench chanll dan' chejnie' akre'n, na' noteze be'nne bi llzenay, da da'on ba nnez akre' ra'ten, yeka'a Diosen' len. 13Ke len na' llroe' llsedra' be'nn ki kone da ka' llsa'krebra', le llre'e aktere' dan' llona'n, na' bi llakbe'e akre' bi zejen na', llen aktere' xti'lla'n, na' bi llejnie' akre'n. 14Ke len na' be'nn ki ba llzoa ake' di'll kan' bzoj da Isaíasen', kan' bne'e: Da li yénere, na' bi chejnie're akre zejen da'n yéneren'. Na' re'tere, na' bi wayakbe're bi zejen dan' llre're na'. 15Nak ake' be'nn bi llzenay, ba natkze yichjra'llda'o be'nn ki. Bi llen akre' kwasro, na' nchod rao ake'n, le bill lle'n akre' re'e akre' kone rao ake' na', na' yen akre' kone nay ake' na', na' chejnie' akre' lo ra'llda'o ake' na', na' yeyat akre', na'll gak yebej ake' lo da xhinnjen'. 16’Na' re' nakre nada' txhen, nbaraz keré dan' llwiare da ka' llona'n, na' llzenayre xti'lla'n, na' llejle're. 17Da li nia' re', zan be'nn ka' be'e xti'll Diosen' kana', na' zan be'nn ka' yezikre bzenay ke Diosen' kana', gokra'll ake' kwis re'e akre' dan' llre're nna', na' bill go'le re'e akre'n. Na' gokra'll ake' kwis yen akre' dan' llénere na', na' leska' bill go'le yen akre'n. 18’Lewzenay ke, kin' chejnie'llo di'll ke be'nn wen llin na', jez nbazen'. 19Noteze be'nn llene xti'll Diosen' dan' llzejnie' ke yel llnebia' ke'en, na' cha' bi llejnie're'n, le llinte daxi'on llabejen len lo ra'llda'we'n; na' nake' ka nbaz dan' je't lloa' nezen'. 20Na' nbaz dan' jacha'a gan' nak lo yejen', na' bi bdin roe, naken ka be'nn ka' le llawete xti'll Diosen' kat llen akre'n, 21leake'n nak ka da bi nyin roe zitj, chollze llejle' ake' ke xti'll Diosen', na' kat bi da da'o llak ke ake', na' kat llwie be'nne leake' dan' llzenay ake' xti'll Diosen', le llbej yichj akte' xti'lle'n. 22Na' nbaz dan' jago'nn gan' nak lo yay ye'che dan' bi blli'o na', zejen ka be'nn ka' ba bene xti'll Diosen', na' da zed ka' da de rao yellrio ni, na' yel wnia' dan' ziye'e lli'o, bi lloe'n latje yega'nn xti'll Diosen' lo ra'llda'we'n, na' nak ake' ka nbaz dan' bibi llbia. 23Na' nbaz dan' jago'nn rao yo cha'o na', zejen ka be'nnen' llene xti'll Diosen', na' llejnie're'n na' llzenaye'n. Nak ake' ka dan' bllia to gayoa (100) weje, na' ye balen bllia wyon (60) weje, na' ye balen chi lloa (30) weje. 24Na'll be'rén Jesúsen' be'nn ka' ye to di'll, lle'e leake': —Yel llnebia' ke Dios be'nnen' zo yebán' llonen rebze ka gok ke to be'nnen' jez nbaz wen rao yellrio ke'en. 25Na' do llere ka tas ake', byej to be'nn llwie le'e, na' jaza'le' nbaz yi'x gan' ba naz be'nnen' trigon', bayoll na' na'll baze'e. 26Na' to chi'ze bra' nbaz yi'xen' ren trigon', na' ka bzorao trigon' llbian. 27Na' gokbe'e be'nn wen llin ke xan yellrion', na'll jayake' jayell ake' xan ake'n: “Ke be'nne, ¿kere nbaz wen ke trigon' gozo' rao yellrio ko'on? ¿Bixchen nchixzen yi'xe da bibi llbia?” 28Na'll lle xan ake'n leake': “To be'nn llwie nada'n jen ka'.” Na'll lle be'nn wen llin ka' le'e: “¿Akxha gonto'? ¿Wla'llto' yi'xen'?” 29Na' lle'e leake': “Bi wla'llren nench ke wla'llrentere trigo na'. 30Waljezen na' chi'o akllen txhen. Na' kat llin lla yezi're dan' gozre na', kana' nia' zga'tek yi'x na', la'llre gonren to bnok weje, na' cheyen, na'telle yetopre trigon' wlla'cha'oren.” 31Na'll be'e di'll kan' nak yel llnebia' ke Diosen', bne'e: —Yel llnebia' ke Dios be'nnen' zo yebán' rebze naken ka to nbaz ke mostaz, ka dan' goz to be'nn rao yellrio ke'en. 32La'kze nbaz ke mostazen' nakllen da da'o ka nbaz ka' yela', na' kate llra'n na', leren ll-lli'oll ka billre yay, llakllen to yay xhenlle, na'll lljallia no xo'nn byinn da'o ka' rao xho'ze na'. 33Na'll bsa'krebe Jesúsen' ye to da yobre, lle'e leake': —Yel llnebia' ke Dios be'nnen' zo yebán', naken ka kwa binn da bxhi'i to no're, na' bchixe'n trob yezj, na' baslli'on kwa ke yet xtir na'. 34Yeolol da ki broe' bsede Jesúsen' rao be'nn zan ka' bzenay ke'en gan' ze'e na'. Broe' bsedre' leake', bsa'krebre' bi da ka', bibi bzejnie're' leake' billre. 35Bene' ka' nench gok kan' bzoj be'nn ka' be'e xti'll Diosen' kana': Wroe' wsed akre', wsa'krebra' bi da ka', na' yep ake' da nono nna nneze, da nga'ch ka bxhete yellrio. 36Bayoll broe' bsedre' be'nn ka' zjalla'a na', base'l Jesúsen' leake' lljayake'. Na' byoe' lo yo' gan' zo ake' na', na'll jabi'y be'nn ka' non Le'e txhen na', awllo kwite'n lle ake' Le'e: —Bzejnie'cheke neto' akre zeje di'llen' be'on ke trigon' ren nbaz yi'x na'. 37Na'll lle'e leake': —Kin' naken: ka nada' Be'nnen' Gorj Radj Be'nnach, naka' ka be'nnen' goz nbaz wen na'. 38Na' doxhente yellrio ni, naken ka latj gan' goze' trigo na'. Na' be'nn ka' llzenay ke Diosen' nak ake' ka nbaz wen na'. Na' be'nn ka' nxenra'll daxi'on leake'n nak ka nbaz yi'x na'. 39Daxi'on naken be'nnen' goz nbaz yi'x na'. Na' llan' gak yel koxchis ke yeolol be'nn ka' naken ka llan' llon ake' wrape, na' angl ka' nak ake' ka be'nn ka' llon wrapen'. 40Na' kan' llatop ake' yi'x ka', na' llzey aken', ka'n gak ke be'nn ka' llnnerén daxi'on kat llin lla gak yel koxchis ke yeolol be'nne. 41Nada', Be'nnen' Gorj Radj Be'nnach wse'la' angl kia' ka' kat llin lla na', nench yetop ake' yeolol be'nn ka', llko'yele be'nne yobre gon ake' da xhinnj, na' yezikre be'nn llon da xhinnj. 42Na' yese'le' leake' lo yi' gabil ga cha'a ake' ke chnare chey ake', ganna' kwell ake', to gaoxoxj lay ake'. 43Kana'llen' Xallo Diosen' gone' nench be'nn ka' llon da wen na', nni'trén ake' Le'e txhen, le leake'n nak xhi'nne', na' yeyak ake' ka beni' ke will kat yellín ake' yebá gan' llia Diosen' llnebie'. Re' zo nayre lewzenay xti'lla'n. 44’Na' Yel llnebia' ke Dios be'nnen' zo yebán' naken ka to mell xhen da nga'che to rao yellrio. Na' to be'nne ballelre'n, na'll bakwa'che'n da yobre lekze rao yellrio na'kze, na' llawere' kwis zayeje', na'll jaye'te yeolol bi da de ke'e nench bazie' yellrio gan' nga'ch mellen'. 45’Na' yel llnebia' ke Dios be'nnen' zo yebán' llonen ka ke to be'nn dá llo't biteze, na' de'e yirje' yej cha'o dan' nzi'i perla. 46Na' kat ll-llelre' to yej cha'o da za'k, na' llayo'te' yeolol bi da de ke'e nench waya'we' yej cha'on. 47’Na' yel llnebia' ke Dios be'nnen' zo yebán' za'krebren ka to yixj bel. Na' bal be'nn wxhen bel ka' bza'l ake' yixj ke ake'n lo nisda'on, na' bxhenen zan kwen ba lla'a lo nisda'on. 48Na' ka ba balla'n na', babej ake'n lloa' nisda'on, na'll llabé akeba', na' ba nak wen, llalla'a akeba' lo llom. Na' ba ka' bi nak wen na', llo'nn akeba'. 49Kan' gak katen' llin lla, te ke yellrio ni. Angl ka' yebej ake' be'nn wen da xhinnj ka' zjarén radj be'nn ka' nake be'nn wen rao Diosen'. 50Na'll waza'le' leake' lo yi' gabil gan' lljallell ake' ga zeraoze to gaoxoxj lay ake' yel llallayrao ke ake'. 51Jesúsen' lle'e leake': —¿Zyejnie're yeolol da ki ba broe'ra' re'n? Na'll lle ake' Le'e: —Zyejnie'kzeto'n. 52Na'll lle'e leake': —Noteze be'nne cha' llak llroe' llsedre' ley ke Diosen' dan' byoj kana', na' cha' llzenaykze' kan' llroe' llsedra' ke yel llnebia' ke Diosen', na'llen' nake' ka to xan yo' be'nne nape' yeolol da za'ke da yalljre' llonrene' llin, balen nak da kobe, na' balen nak da gore. 53Ka bayoll be'e Jesúsen' di'll ki, na'll baze'e. 54Na' bayeje' ralle'n, na' jaroe' jasedre' be'nn wrall ke'e ka' lo yoda'o ke ake'n. Na' babán akre' kwis ke di'llen' lloe'n, na' lle lwellj ake': —¿Ga jasede' yel si'n na'? ¿Na' gaxha jaxie' yel wak ki llone'? 55¿Kere le'en xhi'nn be'nn wencha'o yayen', na' xhne'en re'e María? Na' bi'che' ka' re Jacobo, José, Simón na' Judas. 56Na' lekze ni't zane' ka' rall-llo ni. ¿Akxha llaken lloe' di'll ki, na' llakte' llone' yel wak ki? 57Na' bi gokra'll ake' chejle' ake' ke'e, na'll lle'e leake': —Yeololze be'nne lloe'rao ake' be'nn lloe' xti'll Dios, zan ka nak be'nn wrall ke'e ka', na' be'nn lo yo' ke'e bi llap ake' le'e bara'nne. 58Na'll to chopze yel wak bene' Nazareten' le nono byejle' ke'e.

will be added

X\