San Mateo 12

1To lla nba'nn ke be'nn Israel ka' bde Jesúsen' ren be'nn ka' non Le'e txhen to rao yellrio ga de trigo. Na' bdon be'nn ka' non Le'e txhen na', na' bzorao ll-lechj ake' dao ke trigon', na' bdao ake'n. 2Na' bre'e be'nn fariseo ka' kan' ben ake'n, na' lle ake' Jesúsen': —¿Bixchen llon be'nn ka' llin, be'nn ka' non rwe' txhen na', llon ake' to da bi llaya'l gonllo lla nba'nne? 3Na'll lle Jesúsen' leake': —¿Bi nna golre kan' ben da rey Daviden' to lla ka bdon ake' ren be'nn lwellje' ka'? 4Byoe' gan' nak rill Diosen', na' bdawe' yet xtir dan' nak la'y da bi llaya'l gao be'nn bi nak bxoz, na' leska' bdaorén be'nn ka' zej ren Le'e txhen na' len. 5¿Leska' bi nna golre le' ley dan' bzoj da Moisésen' gan' llian, bxoz ka' bi llazi'ra'll ake' lo yoda'o braon' lla ka' nak lla nba'nne? Na' nono ll-lliayi'll leake' dan' llon ake' llin na'. 6Ni llepa' re', nada' zoa' ganni za'klla' ye ra't ka yoda'o braon'. 7Xti'll Dios dan' nyoj nen: “Lle'nra' yeya'chra'llre be'nne kerke da gotzre no bayi'x, gákere nada'n lloe'raore.” Chenak llejnie're kan' naken na', bi wxoare do'l ko'll be'nn bibi do'l nape. 8Nia' re', nada'n naka' Be'nn Gorj Radj Be'nnach, naka' xan llan' llapre bara'nne. 9Jesúsen' baze'e ganna', na' byoe' to lo yoda'o ke be'nn Israel ka'. 10Na' lo yoda'o na', zo to be'nn nxho'n chla' ne'e, na'll lle be'nn fariseo ka' Jesúsen': —¿De latj wayonllo be'nn xhinnj to lla nba'nne? Lle ake' Le'e ka' nench kone len wlliayi'll ake' Le'e. 11Na'll lle Jesúsen' leake': —Bixha cha' re' nni't xhi'r da'o keré, na' cha' toba' lljacho'ba' to lo yell zitj lla nba'nne, ¿wsanra'llreba', bi yebejreba' rao lla na'? 12Ke len na' nia', dekze latj gakrenllo be'nne, llan' nak lla llapllo bara'nne, le za'klle to be'nne kerke to xhi'r da'o. 13Na'll lle'e be'nnen' nxho'n ta'ke'n: —Bli na'on. Na' le blite na'a be'nnen', bayakten wen ka dan' ye chla'. 14Na'll ka ballach be'nn fariseo ka' yoda'on, na' llayirjla'll ake' akre ka gon ake' got ake' Jesúsen'. 15Ka gokbe'e Jesúsen' ka', na' babe'yi'lle' bayeje' ga yobre. Be'nn zan jannao Le'e, na'll bayone' yeolol be'nn ka' llak yillwe'. 16Na'll go'tyoere' leake', bi we'rén ake' be'nn di'll non' bayón leake'. 17Bene' ka' nench bzoa xti'll Diosen' dan' bzoj da Isaíasen', kan' bne'e: 18Be'nn nin' nake' be'nn wen llin kia', be'nn breja', na' be'nn nllie'ra'. Na' llawera' dan' llone'n. Na' nada' wse'la' Spíritu kia'n sorenteze sorenen Le'e. Na' chixjwe're' yeolol be'nn ka' zjalla'a doxhen yellrio da nak da li llazra'lla' gon ake'. 19Na' bi gakyollrene' be'nn ka', ni ke gosia'ze', nono yene ka nak chie' do tnez ka'. 20Bi wzo'ye da nak lle'ne. Bi wasore' to yi' da'o, da za bzorao lla'le, llinte lla gone' gak kon ka da zjazé lilla rao yellrio ni. 21Na' be'nn lla'a yeolol yell, so ake' kwexh ake' Le'e. 22Na' zo to be'nne lchole, na' nakte' blloje, yo'nyaz daxi'o yichjra'llda'we', na'll jwa'a ake' le'e rao Jesúsen'. Na' babeje' daxi'on yoe'n, na'll le bare'tere', na' le bannete'. 23Na'll yeolol be'nn ka' bre'e kan' bene'n, babán akre' kwis. Na'll lle lwellj ake': —¿Kere be'nn nin' bezllo yede' rao dialla ke rey Daviden' lla? 24Na' ka bene be'nn fariseo ka' di'll ki, na'll ne ake': —Bitbi yel wak nap be'nnen'. Xan daxi'o ka' nzi'i Beelzebú na'n llakrén le'e, llabeje' daxi'o ka' yo' yichjra'llda'o be'nne. 25Na' ka gokbe'e Jesúsen' kan' za'ra'll lo ra'llda'o be'nn fariseo ka', na'll lle'e leake': —Yeololte da llnebia' cha' gaken chopre, kweyi'n, na' leska' to yell o to yo' rill be'nnen', cha' gaken chopre, bi sibian. 26Leska' cha' daxi'on yebejen ye to daxi'o yo' yichjra'llda'o be'nne, weyi' yel llnebia' ken, le kwinzen ba lladilrenen. 27Na' cha' re' nere xan daxi'o ka' llakrén nada' llabeja' daxi'on, cha' naken kan' nere na', ¿noxha llakrén be'nn ka' nao re'n nench yebej ake' daxi'o ka' yo' yichjra'llda'o be'nne? Na' dan' llon ake' na', llroe'n re' bi naken kan' nere na'. 28Zan ke nak nada', Spíritu ke Dios na'n llonnen nada' yel wak nench llabeja' daxi'o ka', na' ka dan' llona' na', llroe'n re' ba bllin lla nnebia' Diosen'. 29’¿Akre gak cho' to be'nn wan lo yo' ke to be'nn war nench sie' bi da de ke'e, cha' bi wcheje' le'e? Zan ka'n gone', na'll gak sie' bi da de ke be'nnen' lo yo' rille'n. 30’Be'nn bi llone' nada' txhen, llwiere' nada'n. Na' be'nn bi llakrene' nench wzenay be'nn ka' kia', yezikre llone' nench nono wzenaykze kia'. 31’Ke len na' llepa' re', yeolol da xhinnj da llon be'nnach, na' yeolol di'll ya', dan' llach lloa' ake'n, Dios na' yezi'xhene' ke ake', zan nollre be'nne, cha' nne'e ke Spíritu ke Diosen', ni ke yezi'xhenze Diosen' ke'e. 32Na' cha' no be'nne llnne'e kia' nada', naka' Be'nn Gorj Radj Be'nnach, wazi'xhenkze Diosen' ke'e; zan cha' no be'nne nne'e ke Spíritu ke Diosen', kbatlle yezi'xhen Diosen' ke'e, ni nna' ni batteze. 33’Ka nak no yay xhix ka', dan' nak yay wen na', daxhix wenkze llbian, na' yay dan' bi nak yay wen lekze daxhix bi nak wen llbian. Na' ka' llnnézello akren' nake dan' llbia toto yay ka', na' llnnézello kan' nak yayen'. 34¡Kan' nakse re', nakre be'nn zban, be'nn wxhiye'e, llonre ka bele! Bibi di'll wen gak we're ka nak yo' da xhinnjen' lo ra'llda'ore. Le yeololte di'llen' ll-lloj lloa'llon' da za'kze lo ra'llda'ollo na'n. 35To be'nn wen lloe'kze' di'll wen, le kon kan' nake lo ra'llda'we' na'n lloe' di'llen'; na' to be'nn wen da xhinnj lloe' di'll da ke za'ke, le ka'n nakse ra'llda'we'n. 36Na' ni nia' re', kate llin lla gon Diosen' yel koxchis ke yeolol be'nne, kana' yeolol be'nne wadé ake' yeolol di'll dan' ba be'e ake' da bibi za'ke. 37Na' kone di'll dan' we're, Dios na' choyrawe' keré cha' napre do'le, na' cha' bibi do'l napre. 38Na' be'nn ka' llsedre ke ley dan' bzoj da Moisésen', na' be'nn fariseo ka' lle ake' Jesúsen': —Maestro, lle'neto' gono' to yel wak da re'teto' nench nnézeto' cha' da lin' bse'l Diosen' rwe'. 39Na'll goll Jesúsen' leake': —Re' yo' da xhinnj lo ra'llda'ore, na' ba bsanra'llre Dios. Na' llnnabre gona' ye to yel wak da re'tere, zan bi gona' ka dan' llnnabren', zeraoze ka dan' broe' Diosen' re', ka dan' benrene' da Jonás, be'nnen' be'e xti'll Diosen' kana'. 40Jonásen' byoe' lo le' bel xhen na' chonn lla chonn yere. Na' ka'kze nada', Be'nn Gorj Radj Be'nnach gata', na' choa' lo ban' chonn lla chonn yere. 41Na' kat llin lla gon Diosen' yel koxchis ke yeolol be'nne, kana' be'nn Nínive ka' wabanrén ake' be'nn ki lla'a nna', na' wchoybia' ake' ke ake', le leake'n, ka ben akre' xti'll da Jonásen', bayat akre' ke da xhinnj ke ake'n, na' nada' za'ktella' kerke Jonásen'. 42Na' lekze lla na' kat gon Diosen' yel koxchis ke yeolol be'nne, no'ren' bnebia' yellen' re Sabá, wabanrene' txhen be'nn ki lla'a nna', na' wchoybie' ke ake', le le'en zi't kwis bede' badzenaye' yel si'n ke da Salomón na', na' nada' za'ktella' kerke Salomón na'. 43’Kate to daxi'o llallojen yichjra'llda'o be'nnen', na' dan llayirjen ga lljacho'n ga yobre. Na' cha' bi ll-llelen to latj ga yezi'ra'llen, 44na'll nnen: “Waya'chka' lljawia' gan' balloja'n, cha' gak lljalloa' da yobre.” Na'll llayejen lljawian gan' zo be'nnen', na' kate re'ren ra'llda'o be'nnen', naken ka to yo' da nxhi nloa, na' ndachen. 45Na'll lljatopen ye gall daxi'o da llonll ka len, na'll yella'a aken txhen lo ra'llda'o be'nnen'. Na' cha' ka' ba ben ake'n, na'll yezikre gakll ke be'nnen', kere kan' gok ke'e kana'. Na' ka' ya'nnkzen' gak ke be'nn wen da xhinnj ka', lla'a nna' lla. 46Nna lloe'te Jesúsen' di'll ren be'nn ka', ka bllin xhne'e ren bi'che' ka', na' gokra'll ake' we'rén ake' Le'e di'lle. 47Na' to be'nn ze ren ganna' golle' Jesúsen': —Xhna'o ren be'nn bi'cho' ka' ze akte' ko'lle na', lle'n akre' we'rén ake' rwe' di'lle. 48Na'll lle Jesúsen' le'e: —¿Noxhan' nak xhna', na' noxha nak bi'ch lwellja'? 49Na'll bli ne'en gan' lla'a be'nn ka' nak Le'e txhen na', na'll bne'e: —Be'nn kin' nak xhna', na' bi'ch lwellja'. 50Le noteze be'nne llone kan' llazra'll Xa' Dios be'nnen' zo yebá na', le'en nak be'nn bi'cha', be'nn zana' na' xhna'.

will be added

X\