San Mateo 10

1Jesúsen' btope' be'nn chllinn ka' non Le'e txhen, na' be'e leake' yel wak nench wabej ake' daxi'o zjayo' lo yichjra'llda'o be'nne, na' wayón ake' biteze yillwe' da llak ake'. 2Ki re be'nn chllinn ka': Simón lekze le'en re'e Pedron', be'nnen' gok be'nn nell, na' Andrés bi'ch Pedro na', na' Jacobo ren Juan xhi'nn Zebedeo, 3na' Felipe, na' Bartolomé, na' Tomás, na' Mateo be'nnen' gok wachixhje, na' Jacobo xhi'nn Alfeo, na' Lebeo be'nnen' goll akse' Tadeo, 4na' Simón be'nnen' ben txhen be'nn ka' nzi'i cananistas, na' ren Judas Iscariote be'nnen' ben Jesúsen' rallna'a be'nn ka' llwie Le'e na'. 5Jesúsen' bse'le' be'nn chllinn ka', jatixjwe' akre' xti'lle'n, lle'e leake': —Bi chejre rall be'nn ka' bi nak be'nn Israel, leska' bi chejre yell ka' zjalli' Samaria. 6Lelljak gan' lla'a be'nn Israel ka', le leake'n nak ake' ka xhi'r da'o ba bnit. 7Lelljak lelljatixjwe' ba zo rez llin lla nnebia' Dios be'nnen' zo yebá. 8Lewayón be'nn llak bi yillwe', na' lewayón be'nn ka' llak yillwe' dan' ne lepra, leyesbán be'nn wat ak, na' leyebej daxi'o ka' yo' lo yichjra'llda'o be'nne. Bibi bchixhj Diosen' re', benne' re' yel wak ke'en nench gonre da ki, ke len na' legakrén be'nne, na' bi wchixhjre. 9’Na' bi wa're mell da nak oro, na' mell plat na' mell kobr chak ko're nez. 10Na' bi go'xre bzod, na' bi go'xre ye to xhare, ni ye to xher-re, ni xhis da wchi'chre, le ka nak re' nakre be'nn wen llin ke Dios, llaya'lkze gonn ake' re' da ye'j gaore, gan' llse'la' re'n. 11’Na' gateze yell ga llinre, zga'tek lennab cha' zo to be'nn wen, be'nn yewere wrebe re' rille'n. Na' cha' ba brebe' re' rille'n, ganna'ze lesó. Kat sa'llre chejre ga yobre, kana'll yeza're. 12Na' kat llinre rill to be'nne, lewape lliox, na' lennab so ake' wen. 13Na' cha' zjani't be'nn nak yichjra'llda'o ake'n wen, gak ka dan' nnabren', na' so ake' wen. Na' cha' nono llra' be'nn nak yichjra'llda'o ake'n wen, na' bi gak ka dan' nnabren'. 14Na' cha' zo ga bi wreb ake' re', na' bi wzenay ake' keré, leyelloj yo'n o yell gan' bllinre, na' leyebibte yo bichte llia lo labre. 15Da xhinnj xhen na', ben be'nn Sodoma ka' ren be'nn Gomorra ka' kana', zan ni llepa' re', kat llin lla gak yel koxchis ke yeolol be'nne, kana' be'nn ka' bi breb re' rille'n, da xhenll gak ke be'nn ka' kerke kan' gok ke be'nne Sodoma ka', ren Gomorra ka'. 16’Nada' wse'la' re' ka llse'le' xhi'r da'o radj be'kw yi'o, lesó xhnid ka llon to bele, na' maxhze legón ka llon to byinn da'o. 17Legap kwinre rao be'nn ka' llwie re'n. Zjani't be'nn gon ake' re' rao na'a be'nn wnebia' ka', nench bi gon bi ne akre' re'. 18Na' lekze ka' dan' llonlira'llre nada' na', zjani't be'nn wche'e re' do rao rey, do rao nollre be'nn llnebia' nench we'rén akre' xti'lla'n, leska' rao be'nn ka' bi nak be'nn Israel. 19Na' kat go'x ake' re', wche'e ake' re' rao be'nn ka', bi we'la'llre akre nnere yelli're xti'll ake'n. Rawe gan' zere na'kze wzejnie' Diosen' re', akren' nnere. 20Le kere re'n nnere, Spíritu ke Xallo Dios na'kzen' gonnen bixhan' llaya'l nnere. 21’Kana' bale be'nnache, yeyechj ake' gon ake' no bi'ch gorj ake' rao na'a be'nne, na' yeso'te leake', na' ni't be'nn gon ake' xhi'nn ake' ka', rao na'a be'nn yeso'tebe', na' zjani't be'nne gon ake' xaxhna' ake' ka', rao na'a be'nne yeso'te leake'. 22Na' ka yeololze be'nn wie akre' re', dan' llonlira'llre nada', na' noteze be'nn se war wxenra'lle' nada' llinte lla gate', le'en yerá. 23Cha' be'nn lla'a to yell lloje yeraye re', lelljazó ga yobre. Da li nia' re', bi nna wayoll tare yell ka' gan' nbane be'nn Israel ka', kat yeda' nada' da yobre Be'nn Gorj Radj Be'nnach. 24’Kat to be'nn za wsede, bi nello naklle' be'nn braoll ka be'nnen' llsede le'en, na' to be'nn wen llin bi nello naklle' braoll ka xane'n. 25Kon llaya'le yewé be'nnen' llseden', cha' yedo'lre' gake' kan' llon be'nnen' broe' le'e na', na' llaya'le yewé be'nn wen llin na', cha' yedo'lre' gake' ka xane' na'. Na' nada' naka' xanre, na' be'nn ka' llwie nada'n, llasné ake' llona' txhen Beelzebú, dan' nak xan yeolol daxi'o ak, wasné aklle' ke re' nakre nada' txhen. 26’Bi llebre be'nn biteze da gon akre' re', le bibi de da nga'che da nello bi wroe'rawe, na' bi de da nello nono yenneze len. 27Da zan da broe'ra' re' gan' nga'chre, lennén gan' lla'a be'nn zan. Na' yeolol da ka' ba béneren', lechixjwe'n, legón ka to be'nn ze yichjo llosie'. 28Bi llaya'le llebre be'nn ka' got re'n. Bitbi gak gon akre' yichjra'llda'ore. Zan llaya'le llebre Diosen', le Le'en nape' yel llnebia', wlleyie' kwerp kerén' ren yichjra'llda'oren' lo yi' gabilen'. 29’Nnézello byinn da'o ka' bibi za'k aktekba', na' Xallo Diosen' llakbe're' kate llbeyi' toba'. 30Rente yich yichjre ka' nrab Diosen'. 31Na'llen' nia' bi llebre, za'kll re' kerke txhonnj byinn da'o ka'. 32’Na' noteze be'nne cha' wchebe' nnawe' nada', lekze ka' nada' wacheba' rao Xa' Diosen' llia yebá, yepe' nak be'nnen' nada' txhen. 33Na' noteze' cha' lloe'rene' be'nnach di'll, na' bi llchebe' cha' nombie' nada', lekze ka' nada' we'rena' Xa' be'nn zo yebá di'll, yepe' bi nombia' be'nnen'. 34’Bi gákere beda' nench nni't ren lwellj be'nn ka' wen na'. Bi nni't ake' wen, le yesdil ake'. 35Ni ke dan' ba beda' na', yesdile be'nn byio ren xa ake', na' no'ren' kone xhne'e, na' no'ren' yedil ren xhorille le'e. 36Do lo yo' rill ake' na'ze lla'a be'nn wie lwellj ake'. 37’Na' noteze be'nne cha' llakllre' xe'e na' xhne'en ka nada', bi sa'ke' gone' nada' txhen. Leska' cha' llakllre' xhi'nne', ka nada' bi sa'ke' gone' nada' txhen. 38Na' be'nn bi wsanra'll kwine' na' nawe' nada', na' gone' ka to be'nn noa' cruz ke'e, bibi za'ke' gone' nada' txhen cha' ka'. 39Be'nnen' llon bien yesrá yel nban ke kwine' yellrio ni, le'en wnite'n, zan be'nnen' llnit yel nban ke'en ni kia' nada', le'en ga't yel nban zejlikane ke'e. 40’Noteze be'nn llrebe re' nadkza'n llrebe', na' be'nn llreb nada' renkze Dios be'nnen' bse'l nada'n llrebe'. 41Na' noteze be'nne wrebe' be'nn lloe' xti'll Diosen', ka da nbarazen' si'i be'nnen' lloe' xti'll Diosen', ka' lekzen sie'. Na' be'nnen' wrebe to be'nn wen, ni ke dan' wrebe' be'nnen' nak be'nn wen na', ka dan' nbarazen' si'i be'nn wen na', ka' lekzen sie'. 42Na' noteze be'nne we'e la txhi'yze nis ye'j be'nn llonlira'll nada', ni ke dan' be'e ake' be'nnen' nxenra'll nada' nis we'je', da li nia' re', bi nnitrao ka nake dan' ben ake'n.

will be added

X\