San Mateo 1

1Ganni nyoj ra be'nn ka' gok xozxta'o Jesucriston', be'nnen' gok Xhi'nn dialla David, na' Daviden' goke' xhi'nn dialla Abraham. 2Abraham na' goke' xa Isaac, na' Isaaken' goke' xa Jacob, na' Jacoben' goke' xa Judá ren yezikre bi'che' ka'. 3Na' Judán' ren Tamar na', gok ake' xaxhna' Fares ren Zara. Na' Fares na' goke' xa Esrom, na' Esrom na' goke' xa Aram. 4Na' Aram na' goke' xa Aminadab, na' Aminadab na' goke' xa Naasón, na' Naasón na' goke' xa Salmón. 5Salmón na', ren Rahab gok ake' xaxhna' Booz. Na' Booz na', ren Rut gok ake' xaxhna' Obed. Na' Obed na' goke' xa Isaí. 6Na' Isaín' goke' xa rey David, na' rey Daviden' goke' xa Salomón. Na' xhna' Salomón na' goke' xho'r Urías. 7Na' Salomón na' goke' xa Roboam, na' Roboam na' goke' xa Abías, na' Abías na' goke' xa Asa. 8Na' Asa na' goke' xa Josafat, na' Josafat na' goke' xa Joram, na' Joram na' goke' xa Uzías. 9Uzíasen' goke' xa Jotam, na' Jotam na' goke' xa Acaz, na' Acazen' goke' xa Ezequías. 10Na'll Ezequíasen' goke' xa Manasés, na' Manasésen' goke' xa Amón, na' Amón na' goke' xa Josías. 11Josíasen' goke' xa Jeconías ren yela' bi'che' ka' bni't, ka llan' bche'e be'nn Babilonia ka' be'nn Israel ka'. 12Bde gok ka', na'll gorje Salatiel xhi'nn Jeconías. Na' Salatielen' goke' xa Zorobabel. 13Na' Zorobabelen' goke' xa Abiud, na' Abiud na' goke' xa Eliaquim. Na' Eliaquim na' goke' xa Azor. 14Na' Azor na' goke' xa Sadoc, na' Sadoc na' goke' xa Aquim, na' Aquim na' goke' xa Eliud. 15Na' Eliud na' goke' xa Eleazar, na' Eleazar na' goke' xa Matán. Na' Matán na' goke' xa Jacob. 16Na'll Jacoben' goke' xa José be'nnen' gok xhyio María. Na' María na' gok xhna' Jesús be'nnen' nzi'i Cristo, lle'nen nen be'nn brej Diosen' sorén yel llnebia' ke'en lli'o. 17Na' bzorao kan' blla'a xhi'nn dialla da Abraham na', bllinte kan' blla'a xhi'nn dialla da David, za'a chda' (14) kwen dialla ke'e ka', na' xhi'nn dialla da Daviden' bllinte ka lla be'x ake' be'nn Israel ka', bche'e ake' leake' Babilonian', blla'a ye chda' kwen dialla ke'e ka'. Kana' bllinte ka llan' gorje Criston', blla'a ye chda' kwen dialla ke'e ka'. 18Kin' gok kan' gorj Jesucriston'. Marían' ba nak di'll si'i Josén' le'e wchayna'a ake'. Bixha ka gokbe'e Josén', ba noa' Marían' bda'o kone Spíritu ke Diosen'. 19Na' Josén' be'nnen' ba nak di'll si'i Marían', goke' be'nn wen rao Dios. Na'll bene' xhbab cha' kwej yichje' Marían' llillize, na' bi wsie' Marían' zdo'. 20Nna llonte' xhbab ka', bdekze bichgal ke'e, kate to angl be'nn bse'l Xanllo Dios, broe'rawe' le'e rao bichgal ke'en, na'll lle'e le'e: —José, rwe' gorjo' rao dialla ke rey David. Bi llebo' si'o Marían' xho'ro', ka nak bida'on so na', bida'o ke Spíritu ke Diosen'. 21Na' bida'on so na' gakbe' to bida'o byio, na' wsi'o rabe' Jesús, le Lebe'n yeka'be' do'l ke be'nn yell kebe' ka'. 22Gok yeolol da ka' nench gok kan' bne Diosen', kan' bzoj to be'nn be'e xti'lle'n kana', bne'e: 23To no'r we'o no'r nna napchi'i kwine', we'e to bida'o byio. Na' kat sobe' na', wsi'i akebe' Emanuel. Na' Emanuelen' lle'nen nen: Diosen' zorenkze' lli'o. 24Na'll babando Josén', bayoll bnere' yeren', bene' kan' goll angl ke Diosen' le'e, na'll jaxie' Marían' rille'. 25Na' bi bzorene' le'e ka to be'nn zo ren xho're', to bzoaze' le'e bdape' le'e bara'nne, bllinte lla bzo bida'o byio ke'en. Na' bsie'be' Jesús.

will be added

X\