San Marcos 9

1Leska' lle Jesúsen' leake': —Di'll li nia' re', balre lla'a ganni nna', nna nbanre kate llin lla re're Diosen', wroe' yel wak xhen ke'en kan' llnebie'n. 2Bde xop lla, goxh Jesúsen' Pedron', na' Jacobon', na' ren Juan na', na' bche'e leake' to rao ya' sibe, na' nollre no bche'e ake'. Na' llwia akte' na', kate blla'a yichjrao Jesúsen'. 3Na' xhara'ne'n goken llaktit, goken llich kwis ka'kze beye, ni to nono gakse gon len kan' goken na', la'kze llebraz chiben. 4Na' bre'e akre' da Elías ren da Moisés lloe'rén ake' Jesúsen' di'lle. 5Na'll Pedron' lle'e Jesúsen': —Maestro, le wen zollo ganni. Na' gonto' chonn yo' de yixh, to ko'o rwe', na' to ke Moisés, na' ye to ke Elías na'. 6Na' ni ke llakbe'zre' bin' ne'e, do llebtit ake' dan' llre'e akre'n. 7Kat blle' to bej gan' lla'a ake'n byechjen leake', na' lo bej na', ben akre' bne Diosen': —Be'nn nin', xhi'nna' nllie'ra', llaya'l wzenayre ke'e. 8Ka bwiado ake' da yobre nollno bre'e akre'. Ye toze Jesúsen' ze. 9Ka llayetj ake' le' ya' na', golle' leake' bi we'e ake' di'll ka dan' bre'e akre'n, lle'e leake': —Kat yebana' radj be'nn wat ka', nada' naka' Be'nn Gorj Radj Be'nnach, kana'll wak we're di'll ka'. 10Na' ka' ben ake', bi be'e ake' di'll, na' bi byejnie' akre' dan' golle' leake' dan' yebane' radj be'nn wat ka'. 11Na'll bnnab akre' Le'e: —¿Bixchen nerize be'nn ka' llsedre ke ley dan' bzoj da Moisésen', zga'tek da Elías na'n de yede' yellrion' ka za yedre Criston'? 12Na'llen' ballie' xti'll ake'n, lle'e leake': —Da likzen' zga'tek da Elías na'kze yede' nench yewe' xhnneze dan' llak rao yellrio; leska' nyojen ka nak Be'nnen' Gorj Radj Be'nnachen' wsa'kzi' ake' Le'e, na' gon ake' Le'e kaze. 13Ni nia' re', ba bedkze da Elíasen', na' ben akre' le'e kon ka nen ke ake', le kan' ba nyojkzen gak ke'e. 14Bixha ka ballín Jesúsen' gan' lla'a be'nn ka' yela' non Le'e txhen na', bre're' be'nn zan nechj leake', na' zjazé be'nn ka' llsedre ke ley dan' bzoj da Moisésen' llakyollrén ake' leake'. 15Kate bre'e akre' Le'en llabán akre', na'll jakdoe' jawap ake' Le'e lliox. 16Na'll bnnabre' leake': —¿Bi ken llakdilrenre be'nn ka'? 17Na' blloj to be'nne radj be'nn zan ka', lle'e Jesúsen': —Maestro, ganni nchia' to xhi'nna' yo'be' daxi'o, na' nonen lebe' blloj. 18Kon ka zezbe' llo'xen lebe' llxizen lebe', llarj pep blli'n lloa'be', na' llaoxoxj laybe', na' zjazé llyechbe'. Na' golla' be'nn ka' non rwe' txhen na', cha' yebej ake' daxi'on, na' bi gok ake'. 19Na'll lle Jesúsen' leake': —¡Re' nakre be'nn zid bi llejle're! ¿Bate zerena' re'? Na' nara'chk ye arte soera' serena' re'. Ledá wa'a bida'on ganni. 20Na'll jwa'a ake' bida'on, bixha daxi'on yo' bida'on, ka bre'en Jesúsen' bxizen bida'on res kwis, bzalen lebe' lltolen lebe', llalj pep blli'n lloa'be'. 21Na'll llnnabe' Jesúsen' xabe'n: —¿Artxha ba gok llonen lebe' ki? Na'll lle'e Le'e: —Ka nakbe' bida'ote. 22Na' da zan ras ba bzalen lebe' do lo yi' do lo nis, to lle'nen wlleyi'n lebe'. Cha' rwe' wak wayonobe', na' baya'chra'll neto' bayonbe'. 23Na'll lle Jesúsen' le'e: —Wakse kon cha' llonlira'llo', be'nnen' llejle'n wakse dan' llnnabe'n. 24Le balli'te xa bida'on xti'lle'n, lle'e Le'e: —¡Llejlia'; gokrén nada' gonlira'lla' yezikre! 25Ka bre'e Jesúsen' ba lla'll be'nn zanlle, na'll bdile' daxi'on yo' bida'on lle'en: —Daxi'o, rwe'n nono' bida'on blloje na' nkwellbe', na' llepa' rwe' yellojo' chras lo yichjra'llda'o bida'on. Bsanbe', na' bill wayo' yichjra'llda'obe'n da yobre. 26Daxi'on besia'n, na' ye to bxizen bida'on zi'llo, na'll ballojen; ka'kze bi wat bkwa'nnen lebe'. Ka bre'e be'nn ka' lla'a na', na'll ne ake': —Baje gotbe'n. 27Na' Jesúsen' be'xe' ta'kbe'n balisebe', bazolla'tebe'. 28Na'll ka byo' Jesúsen' lo yo', be'nn ka' non Le'e txhen na', jannab akre' Le'e to wraze', lle ake' Le'e: —¿Bixchen bi gok netzto' yebejto' daxi'on? 29Na'll lle'e leake': —Nench gak yebejre ka daxi'on llon ki, llaya'l we'la'llre yelwillre Diosen' na' gonre was. 30Ka baza'a ake' ganna', badé ake' gan' nbane Galilea, na' Jesúsen' bi gokra'lle' no nneze cha' de'e ganna'. 31Le llzejnie're' be'nn ka' non Le'e txhen na', lle'e leake': —Nada' Be'nnen' Gorj Radj Be'nnach, dekz de gaka' rallna'a be'nne ka' llwie nada' got ake' nada', na' yeyoll got ake' nada', na' yeyónn lla yebana'. 32Na' be'nn ka' chras bi byejnie' aksere' bi ken ne'e ka', to lleb akze' wnnab akre' Le'e. 33Na' bllin ake' Capernaum, ka ba zo ake' yo' na', bnnabe Jesúsen' leake': —¿Bi di'llen' lloe'zre beche? 34Leake'n bibi bne akse', to bze ake' llize llak zban akre', le ka bechre za'ke tnez na'n, llakdil ake' noren' nakll be'nn brao. 35Na'll blle' Jesúsen', na' goxhe' be'nn chllinn ka', na' lle'e leake': —Kon to re' cha' lle'nere gakre be'nn brao, llaya'l gakre ka to be'nn bibi za'ke ga zeraoze, na' gakre be'nn wzenia'na'a lwelljre. 36Na'll goxhe' to bida'o, bze'ebe' kllol ake'n, na' bde'lebe' lle'e leake': 37—Noteze be'nne gonre bida'o wen, ni kia' nada', nadkza'n llonre' wen chet ka', na' be'nne llone' wen ren nada', kere nada'n llonre' wen, be'nnen' bse'l nada'n llonre' wen. 38Na'll Juan na', lle'e Jesúsen': —Maestro, bre'to' to be'nn llabeje' daxi'o yo' yichjra'llda'o be'nne kone ra'o rwe', na' bi none' lli'o txhen, na' golltoe' bi gone' ka', le bi nawe' lli'o. 39Na'll lle Jesúsen' leake': —Bi wllonre gone' ka', cha' to be'nne llone' yel wak llwa'le' ra'a, zeje di'll txhen na' llone' nada', bi gak nne'e krere kia'. 40Cha' to be'nne bi llwiere' lli'o, txhenkzen' nake' lli'o. 41Noteze be'nne cha' gonne' la' txhi'yze nis ye'jre, ni ke dan' nonre nada' txhen, da li nia' re', bi nnitrao ka nake dan' gon ake'n. 42Leska' bne Jesúsen': —Noteze be'nn gone' bix to bida'o ki nxenra'll nada' gonbe' da xhinnjen', naktere wen wchej ake' yene' to yej yich, na' lljaza'l ake' le'e lo nisda'o, kerke da gone' bix to bida'o ki. 43Cha' to ta'kre llxhoben re' gonre da xhinnjen', wenre chenak wchoyren, kerke da gonre da xhinnjen', wenre yellinre gan' de yel nban na', yallj chla' ta'kren', kerke da zo llopten wayejre lo gabil ga lla'lnninn yi' da nono soekze yesor len. 44Ganna' lla'a wara'o ba bi llat, leska' yi' da bi llayore. 45Cha' nia'ren' llxhoben re' gonre da xhinnjen', wenre chenak wchoyren, kerke da gonre da xhinnjen', wenre yellinre gan' de yel nban na', yallj chla' nia're, kerke da zo llopten wayejre gabil ga lla'lnninn yi' da nono soekze yesor len. 46Ganna' lla'a wara'o ba bi llat, na' yi' da bi llayorkze. 47Cha' dan' llre'e raoren' llxhoben re' nench gonre da xhinnjen', wenre chenak kwejre yejraoren', kerke da gonre da xhinnjen', wenre yedo'lere gan' llnebia' Diosen' kon ren chla'ze raoren', kerke da zo llopten yese'le' re' gabil. 48Ganna' lla'a wara'o ba bi llat, na' yi' da bi llayore. 49’Yeolol be'nne te ake' gak ake' prueb, na' yeololte be'nn wayón kwine' rallna'a Dios, gak ake' ka da nwe'e ze'de. 50Da wen ze'den', zan cha' nit yel zna' ken, billbi de gonre nench wayaken zich. Na' legón re' ka ze'd na', legón da wen, na' lesorén lwelljre wen.

will be added

X\