San Marcos 7

1Bal be'nn fariseo ka', na' be'nn ka' llsedre ley dan' bzoj da Moisésen' be'nn ka' za'k Jerusalén na', jabi'y ake' gan' ze Jesúsen'. 2Ka bre'e akre' bal be'nn ka' non Jesúsen' txhen bi bna'a ake' zan ras kan' llon leake' kat gao ake', na'll bdao ake' xhia. 3(Le be'nn fariseo ka', na' yeolol be'nn Israel ka', nao ake' klle'llo dan' bsed xozxta'o ake' ka', llaya'l wna'a ake' zan ras to kwen to kwen kat gao ake'. 4Leska' kat llallín ake' lljake' lao ya'a, cha' bi wna'a ake' kwasro bi gao ake'. Leska' llayiblolj ake' no xchinraz ake' de ya, llayib ake' no tas, no leo, no ye'se de ya, na' ren ga llxhoa ake' lltas ake', da zan da ka' nao ake'n.) 5Na'll be'nn fariseo ka', na' be'nn ka' llsedre ke ley dan' bzoj da Moisésen' bnnab akre' Le'e: —¿Bixchen bi llon be'nn ka' non rwe' txhen kan' ben xozxta'ollo ka', bi llna'a ake' weltze toto kwe' ake' gao ake'? 6Na'll lle Jesúsen' leake': —¡Re' be'nn chop rao nakre! Da likzen' bzoj da Isaíasen' ke re' kana', kan' bne'e: Be'nn ki llon ake' nada' xhen kon lloa' ake' naze', kere lloe'rao ake' nada' do yichj do ra'll ake'n. 7Bibi za'k dan' lloe'rao ake' nada'n, ka nak llroe' llsed akre' da bayirjla'll be'nnachzen'. 8Ka'n llonre llkwasre di'll bia'a ke Xanllo Diosen' ka'le, na' lloe'la'llre llonre da bayirj be'nnach, ka nak llayibre zan ras no leo, no tas keré, na' lli' yichjre llonre da zan ka da ki. 9Leska' lle'e leake': —Llbej yichjre dan' ne Diosen' gonre nench nnaore dan' bayirjla'll be'nnach. 10Zan ka nak da Moisésen', ki bzoje' xti'll Diosen': “Llaya'l gap xaxhna're bara'nne”, na' “Be'nnen' yichjbie' ke xaxhne'e llaya'l gate'.” 11Zan re' nere: “Kon dan' ye ake' xaxhna' ake': Bibi de gonna' gakrena' re', le yeolol da de kia' naken dan' nzi'i Corbán” (lle'nen nen ba bena'n rallna'a Diosen'). 12Kone ka' lloe're latj bi gakrén be'nn ka' xaxhna' ake'. 13Kone ka' llbekre ka'le dan' ne Diosen', na' naore dan' bkwa'nn da xozxta'ore ka', na' llonre yela' ka nak da ki. 14Na'll goxh Jesúsen' be'nn zan ka', na' lle'e leake': —Lewzenay ke kan' nia' ni yeololre, na' lechejnie'. 15Kere da ka' lle'j llao be'nn ka', llon leake' gak ake' be'nn wen da xhinnj rao Diosen'. Da xhinnj ka' ll-lloj lo yichjra'llda'o ake' na'n, len na' llonen leake' be'nn wen da xhinnj. 16Re' zo nay da yénere, lewzenay. 17Ka baza'a Jesúsen' gan' lla'a be'nn zan ka', na' byoe' yo', na'll bnnab be'nn ka' non Le'e txhen na', akre zejen dan' bayoll bne'en. 18Na'll lle'e leake': —¿Leska' re' bi llejnie're dan' nia'? ¿Bi llejnie're kere dan' lle'j llao be'nn ka' llon leake' be'nn wen da xhinnj rao Diosen'? 19Le dan' lle'j llao ake'n kere llo'n lo yichjra'llda'ollo, llejen lo le'llo choll, na' lladeten. Bne'e ka', nench broe're' yeolol yel wao naken wen gaollon. 20Na'll bne'e da yobre: —Dan' ll-lloj yichjra'llda'o be'nn ka', len na' llon leake' be'nn wen da xhinnj. 21Le lo yichjra'llda'o ake' na'n, ll-llach da xhinnjen' llwia ake' gon ake'n, na' llzoa xto ake', na' llzorén lwellj ake' la'kze bi nchayna'a ake', na' llaso't ake' be'nne; 22na' llban ake', na' llzera'll ake' mell ke be'nn yobre, na' llon ake' da xhinnj, na' lloe' ake' di'll wenra'lle, na' llon ake' da nak zdo', na' llaxhe' akre' be'nne, na' llyirj ake' xti'll be'nne, na' nak ake' be'nn ya'ra'lle, llon ake' da ke llaya'l gon ake'. 23Yeolol ka nak da xhinnj ki, ll-llach lo yichjra'llda'o be'nnachen', na' llonen le'e be'nn wen da xhinnj rao Diosen'. 24Na' baza'a Jesúsen' zayeje' gan' nbane yell ka' re Tiro na' Sidón. Na' byoe' to lo yo' bi gokra'lle' nneze be'nne cha' ganna' blline', bixha bi gok kwa'che'. 25Le bnnezte to no're, to be'nn zo to xhi'nne' no're, bin' yo' daxi'o. Na'll zejdoe' jache'k xhibe' rawe'n. 26Na' no'r na', bi nake' be'nn Israel, nake' be'nn yell gan' nzi'i Sirofenicia; go'tyoere' Jesúsen' yebeje' daxi'on yo' xhi'nne'n. 27Bixha Jesúsen' lle'e le'e: —Zga'tek llaya'l we'llo latj yerje xhi'nnllo ka', le bi naken wen si'rizllo dan' llao akbe'n, wza'l-llon rao be'kw ak. 28Na'll balli'i no'ren' xti'lle'n, lle'e Le'e: —Ka' naksen, Xa, zan wakse gao akba' bla' da'o ka', llexj gan' llbe' xhi'nnllo ka'. 29Na'll lle Jesúsen' no'ren': —Da li kwis kan' ne'on. Bayej na', ba ballojte daxi'on yo' yichjra'llda'o xhi'nno' no'ren'. 30Bixha ka balline' rille'n, ba ballojte' daxi'on yo' xhi'nne'n, na' ba xhoatebe' wen gan' lltasbe'n. 31Bde na' baza'a Jesúsen' gan' nbane Tiron', badete' gan' nbane Sidón, na' gan' nbane Decápolis ballinte' lloa' nisda'o Galilea. 32Na' jwa'a ake' to be'nn kwell, na' be'nn ni bi llak nne'e, na'll lla'tyoe akre' Jesúsen' la' wxoaze ta'ke'n yichje'. 33Na'll brej Jesúsen' le'e toze' radj be'nn ka', na' bche'e le'e ga yobre, na'll bzeb xhbene' lo nay be'nnen', na'll bxheje' xhe'n, na' bdane' roll be'nnen'. 34Na'll blis rawe'n llwie' yebáre, llabanre', na' lle'e be'nnen': —¡Efata! —Lle'nen nen: ¡Bayarje! 35Na' le bayarjte nay be'nnen', leska' bayak rolle'n, na' gok banne'e kwasro. 36Na'll goll Jesúsen' leake' notno ye ake' kan' bayone' be'nnen'. Na' la'kze golle' leake' ka', yezikre lloe' be'nn ka' di'lle. 37Na' le llabane be'nn ka', ne ake': —Le wen ba bene', llakte' llone' nench yeyene be'nn kwell, na' be'nn ka' bi llak nne'e, llanné ake'.

will be added

X\