San Marcos 5

1Na' bllin Jesúsen' ren be'nn ka' non Le'e txhen na', chla' nisda'o gan' nak rall be'nn Gadara ka'. 2Bixha ka balloje' lo barcon', le bllinte to be'nn jatile' Le'e, be'nn blloj latj gan' lljakwa'ch ake' be'nn wat ka', be'nn yo' daxi'o yichjra'llda'we'. 3Be'nn na' ba zotekze' latj gan' lljakwa'ch ake' be'nn wat ka', na' nono llakse wchej le'e, ni kon no gden. 4Da zan ras ba bchej ake' nia'ne'e kone gden, na' ka bize llale'e gden na', na' llxhoxhjte'n, ni to nono zoekze le'e. 5Do lla do yere de'e llosie' do rao ya' ka', na' do radj ba ke be'nn wat ka', llayón zi' kwine' kone yej. 6Kate bre're' Jesúsen' zi'tre, na'll zejdoe' jache'k xhibe' rawe'n. 7Na'll besie' zillj, lle'e Jesúsen': —¿Bi de ko'o kone nada', Jesús? Rwe' Xhi'nn Dios zo yebá. ¡Ni ke Dios lla'tyoera' rwe', bi wsa'kzi'o nada'! 8Ne'e ka', le Jesúsen' ba golle' daxi'on: —¡Balloj yichjra'llda'o be'nnen'! 9Na'll bnnab Jesúsen' lle'en: —¿Bi re'o? Na'll llen Le'e: —Da Zan na' ria', le nyanto'. 10Na'll go'tyoere' Jesúsen' bi wraye' daxi'o ka' zi't gan' lla'a aken na'. 11Na' awlloze ganna' zo to ya' ga zjalla'a kuch zan ake, llao akba' yi'xe. 12Daxi'o ka' lla'a be'nnen', go'tyoe aken Jesúsen' lle aken Le'e: —Bse'l neto' gan' zjalla'a kuch ka', na' benn latje lljalla'to' lo yichjra'llda'o akba'n. 13Na'll be'e Jesúsen' latj. Ka ballach daxi'o ka' yichjra'llda'o be'nnen', jalla'a aken lo kuch ka'. Na' nake ka chop mir akba'. To gokllejla'llze kuch ka', na' bzorao bix dol akba' to le bdinnj, jabix akteba' lo nisda'on, na' wasa'tba', we'j akba' nis. 14Na' be'nn ka' llap kuch ka', baxhonnjdo ake' zayejdo ake', jadixjwe' akre' be'nn lla'a lyell, na' be'nn lla'a lyi'xe kan' goken. Na' bllach be'nn ka' jawiá ake'. 15Ka bllin ake' gan' ze Jesúsen', na' bre'e akre' be'nnen' blla'a daxi'o ka', ba babie' wen, ba bayak xhara'ne'. Na' blleb ake'. 16Na' be'nn ka' bre'e kan' goken, be'rén ake' be'nn ka' bdop na' di'lle, kan' gok bayak be'nnen' blla'a daxi'o ka', na' kan' gok ke kuch ka'. 17Na' bzorao be'nn ka' lla'tyoe akre' Jesúsen' wayeje' ga yobre. 18Na' ka bayoe' lo barcon', be'nnen' byo' daxi'on bnnabe' we'e Jesúsen' latje' lljannawe' Le'e. 19Na' bi be'e Jesúsen' latje', na' golle' le'e: —Bayej rillo' ga lla'a bi'ch lwelljo', na' be'rén ake' di'll ka yel wak xhen na', ba broe' Xanllo Diosen' rwe', na' kan' baya'chra'lle' rwe'n. 20Na' zayej be'nnen', na' yell ka' gan' nbane Decápolis bzorawe' lloe'rene' be'nn ka' di'll kan' ben Jesúsen' broe're' le'e yel wak xhen ke'en; na' yeolol be'nn ka' llabán akre' kwis. 21Ka ballín Jesúsen' ye chla' nisda'on zayoe' lo barcon', na' jaze'e lloa' nisda'on, na' bdope be'nn zan kwis. 22Na' bllin to be'nn re Jairo, nake' be'nn wnebia' ke yoda'o ke yellen'. Ka bre're' Jesúsen' le bche'kte xhibe' rawe'n. 23Na' go'tyoere' Le'e, lle'e Le'e: —Zo to xhi'nna' no're, ba llak watbe'; chenak sa'o wxoa ta'ko'n yichjbe' na' wayakbe', bi gatbe'. 24Na'll zejrene' le'e, leska' be'nn zan kwis nao, to llchi'd ake' Jesúsen'. 25Bixha radj be'nn ka' ren to no're, ba gok chllinn (12) iz llzoe' wa'a. 26Na' da xhen ba ballayrawe' ba bde'e rao wen rmell ka', gaxt xhen ba bene' bi llayakse', yezikre llak yillwe' ke'en. 27Bixha ka bénkzere' lloe' ake' xti'll Jesúsen', na'll zeje' jannawe' radj be'nn zan ka', na' jatane' xha Jesúsen'. 28Le kan' bza'ra'lle' lo ra'llda'we'n bne'e: “La' xhe'e na'ze lljatana' wayaktia'.” 29Bixha ka jatane' xhe'en, le brexhte wa'an llzoe'n, na' le gokbe'tere' ba bayake'. 30Na' Jesúsen' le gokbe'tere' ka ben yel wak ke'en llin, na'll bayechje' llnnabre' be'nn zan ka': —¿Non' bdan xha'n? 31Na' be'nn ka' nak Le'e txhen na', lle ake' Le'e: —Ba bre'kzero' kan' nao be'nn llchi'd ake' rwe'. ¿Bixchen nnabrizo' non' bdan xha'on? 32Na'll bayechje' llwie' noxhan' bdankze xhe'en. 33Na'll lleb no'ren' do xhiztite', le ba bayakbe're' bayake' kwasro, na'll zeje' jache'k xhibe' rao Jesúsen', na' be'e di'll doxhente kan' goken. 34Na'll lle Jesúsen' le'e: —Xhi'nna', dan' nxenra'llo' na'n, ba basrá rwe', ka nake nna' ba bayako', bayejchga wen. 35Na' zete Jesúsen' lloe' di'llen', ka bllindokze bal be'nn za'a rill Jairon', be'nnen' nak be'nn wnebia' ke yoda'on, na'll lle ake' Jairon': —Ba gotte xhi'nno'n, ¿bixchen nna llonllro' Maestron' zede? 36Bixha Jesúsen', ka benre' kan' bne be'nn ka', na' lle'e Jairon': —Bi llebo', kon benlira'lle. 37Na' bi be'e latj no nnao Le'e, Pedro na'ze, na' Jacobo, na' Juan, be'nnen' nak bi'ch Jacobo. 38Na' byej ake' rill be'nnen'; ka blline'n, benre' llak llakia, lla'a be'nn llasbell ake' llak akre'. 39Ka byoe' lo yo'n lle'e leake': —¿Bixchen llonre llakia bellre? Kere got bida'o no'r nin', taszbe'n. 40Na'll lltitje be'nn ka' Le'e. Na'll bachache' leake' lia're, na' bche'e xaxhna' bida'on, na' ren be'nn ka' nao Le'e na', na'll byoe' gan' xhoa bida'on. 41Na' be'xe' ta'kbe', na' lle'ebe': —Talita, cumi —da ni lle'nen nen: Bida'o no're ni llepa' rwe', bayas. 42Le bayaste bida'o no'ren', na' le badatebe', na' bida'o no'ren' nakebe' chllinn (12) iz. Na' be'nn ka' llabán akre' kwis. 43Na' Jesúsen' go'tyoere' leake' notno ye ake' ka', na' golle' leake' we'e ake' da gao bida'o no'ren'.

will be added

X\