San Marcos 4

1Da yobre byej Jesúsen' lloa' nisda'on, na' bzorao llroe' llsedre' be'nne, na' be'nn zan kwis bdop, to benen bien byoe' to lo barco da xhoa rao nis, na' bllie' loen' na' be'nn zan ka', ze akte' rao yo billre. 2Na' llroe' llsedre' leake' bsa'krebre' bi da ka', na' be'rene' leake' to di'll ke to be'nn llaz. Na' lle'e leake': 3—Lewzenay ke, to be'nn wen llin jeze' trigo. 4Bixha ka nak zeje' llose' nbaz ka', balen je'ten lloa' nez, na' betj byinn da'o, ban' dá rao lla, na' bdaoba'n. 5Na' ye balen jago'nnen rao yej ga bibi yo detek, sete bra' aken. 6Na' ka nak bi nyin roe zitj, ka bnna' willen' na' byechen. 7Na' balen jacha'a radj yay ye'che, na' blli'o yay ye'chen', na' benen len roe', na' bibi bllian. 8Na' ye balen je'ten rao yo cha'o, na' bra' ake'n, na' blli'on, na' balen bllian chilloa (30) wej, balen bllian wyon (60) wej, na' balen bllian do to gayoa (100) wej. 9Na'll lle'e leake': —Re' zo nayre, lewzenay xti'lla' ni. 10Ka ballach be'nn zan ka', na' baga'nn be'nn chllinn ka'ze, na' ye bal be'nn ka' nak leake' txhen, bnnab akre' Le'e akre zejen na', ke di'llen' be'rene' leake'. 11Na' lle'e leake': —Re' ba brej Diosen' nench nnézere kan' llone' llnebie'n, zan be'nn ka' yela' bi llejle' kia', kone da ki llsa'krebra' lloe'rén ake' di'lle. 12Llona' ka' nench gak kan' ne xti'll Diosen': la'kze wia ake' bi gakbe'e akre' bi dan', la'kze yen akre' bi chejnie' akre'n, na' bi wayat akre', na' bi yezi'xhen Dios ke ake'. 13Na'll lle Jesúsen' leake': —¿Bi llejnie're di'll ka' lloe'rena' re'? Cha' bi llejnie're di'll ki, ¿akxha gak chejnie're da ka' llsa'krebra' yela'? 14Be'nnen' llazen' nake' ka be'nn lloe' xti'll Dios. 15Nbaz ka' je't lloa' nezen' naken ka be'nn ka' llene xti'll Diosen', na' le ll-llinte daxi'on llabejen dan' yo' lo ra'llda'we'n. 16Na' bal be'nne llak ke ake' ka nbaz dan' je't rao yejen', kate llen akre' xti'll Diosen' llawé akre' zi'i ake'n. 17Na' bi nyin roe zitj, chollze llejle' ake'. Kate bi llak ke ake', na' lla'dyi' be'nn leake' ke dan' nao ake' xti'll Diosen', le llabi' akte'. 18Na' ye bale llak ke ake' ka nbaz dan' je't radj yay ye'chen'. Llen akre' xti'll Diosen' na' zi'i ake'n, 19bixha da zed ka' da de rao yellrio ni, na' yel wnia' dan' ziye'e lli'o, na' yel llzera'll billre da yobre, ll-llonen chejle' ake' kwasro, na' bi llak gon ake' kan' lle'ne Diosen'. 20Na' leska' ni't be'nn llak ke ake' ka nbaz dan' je't rao yo cha'on. Be'nn ka', ka llen akre' xti'll Diosen', llejle' ake' do yichj do ra'll ake', na' llon ake' kan' lle'ne Diosen', llon ake' kan' llak ke nbaz dan' bra'n, na' blli'on, na' balen bllia chilloa, na' wyon, na' do to gayoa wej toton. 21Leska' lle Jesúsen' leake': —Kat llwa'lre yi', ¿akre llonre? ¿Lldo'sren to llom o cha' llzoren xhanre gan' llxhoare lltasre? ¿Bi llda'ren sib nench llseni'n doxhen? 22Bibi de da nga'ch da bi wroe'rawe, na' to da llak llillize da bi nneze be'nne len. 23Re' zo nayre da llene, lewzenay xti'lla'n. 24Leska' lle'e leake': —Lewiaya'nn kan' nia' ni. Le kon kan' llonre na', ka'n gon Diosen' ke re'. Na' yezikre gone' dan' ba bénere xti'lle'n. 25Be'nn de ke'e, we'lle' le'e ye ra'te, na' be'nnen' bi de ke'e, to wake'e da da'o nape'. 26Leska' lle Jesúsen' leake': —Kan' gon Diosen' nnebie', wsa'kreba'n ka llon to be'nn llaze' xhoa' rao yellrio ke'e. 27Na' xhoa' binnen' llra'n na' ll-lli'on, na' be'nnen' kon lltase', na' llase' yeo lla, ni ke llakbe'zre' akren' llak ll-lli'on. 28Yellrio na'n llonen nench llra'n, na' llakten yer, na'll llra'n dao, na' llda'n za'. 29Na' kat ba naken yez, le llrapte'n. 30Leska' lle Jesúsen' leake': —¿Akre ka chejnie'llo kan' llon Diosen' llnebie'n, akre ke wsa'krébellon? 31Wsa'krebra'n ka nbaz ke mostaz, kat llaze'n, la'kze nakten da da'o rize kerke no nbaz yobre, 32ka llaze'n na', llra'n na' ll-lli'on, llakten da xhenll kerke yay da'o ake, na' llon xho'ze, na' lletj byinn ka' dá rao lla, llon xo'n akba' rao xo'zen'. 33Kone dan' bsa'krebre Jesúsen' broe're' be'nn ka' lldop llzenay xti'lle'n kon ka to llejnie' akre'. 34Na' kone dan' bsa'krebre' bzejnie're' leake', na'll kat bill lla'a be'nn zan ka', bzejnie're' be'nn ka' non Le'e txhen na', kan' zejen da ka' bsa'krebre'. 35Lekze lla na', ka betj lle', lle'e leake': —Wla'yllo chla're nisda'on. 36Be'nn ka' non Le'e txhen na', bkwa'nn ake' be'nn ka' lla'a llzenayen', na' bsa'a ake' barco gan' ba yo' Jesúsen', na' leska' bnao ye bal be'nn nsa'a to chop barco yobre. 37Bixha kat bzorao dá to be' xhen rao nisda'on, na' bzorao lloll nis lo barcon', na' ba llonen da yi'chen. 38Na' de Jesúsen' tase' xhnia' barcon' nkoye' to ga nxoa yichje'n, na' jasbán ake' Le'e, lle ake' Le'e: —¡Maestro! ¿Bi llakbe'ro' ka nak ba llbeyi'llo? 39Na'll byase', na' babekllie' be'n, na' golle' nisda'on: —¡Babe' lli! Le brexhte be'n ren nisda'on, bayakte lli. 40Na'll lle'e leake': —¿Bixchen llebre? ¿Bi de yel llonlira'll ke re'n? 41Na'll blleb ake' kwis, na' lle lwellj ake': —¿Noxha be'nnen'? Rente kaze be', na' ren nisda'o na' llzenayen ke'e.

will be added

X\