1 Gok chop chonn lla bza'a Jesúsen' Capernaum na', kat balline' da yobre, na' bnneze be'nn ka' zoe' yo'. 2 Le bdopte be'nn zan kwis bllinte lloa' yo'n bayichochjten to nollno llakse cho'. Na' bdixjwe're' leake' xti'll Diosen'. 3 Kat le bllinte tap be'nn nlen ake' to be'nn bi dá nia'ne'e. 4 Na' bi gok cho'rén ake' le'e, llin ake' rawe'n le lla'a be'nn zan kwis. Na'll blep ake' le'e yichjore, na' bsarj ake' to latj ga bletj ake' le'e do ka nak gan' xhoe'n, na' blline' rao Jesúsen'. 5 Na' gokbe'e Jesúsen' nxenra'll ake' Le'e, na'll golle' be'nn xhinnjen': —Xhi'nna', ni llazi'xhena' da xhinnj ko'on. 6 Lo yo' na' zjalli' bal be'nn llsedre ke ley dan' bzoj da Moisésen', kate ben akre' kan' bne Jesúsen', ben ake' xhbab: 7 “¿Bixchen nez be'nnen' ka'? Wakadi' ke Diosen' llone'. Nollno gak yezi'xhen da xhinnj ke be'nne, le zeraoze Dios.” 8 Na' Jesúsen' bayakbe're' kan' llon ake' xhbaben', na'll lle'e leake': —¿Bixchen llonre xhbaben' ka'? 9 Llákere bi napa' yel llnebia' na' yepe': “Ni llazi'xhena' da xhinnj ko'o”, na' bi za'k xti'lla'n. ¿Bixha cha' yepe': “Bayas, bazi'i gan' xhoa'o na' bayej”? 10 Ni nnézere, nada', Be'nnen' Gorj Radj Be'nnach napa' yel llnebia' rao yellrio nench yezi'xhena' da xhinnj ke be'nne. Na'll golle' be'nn xhinnjen': 11 —Ni llepa' rwe', bayas, bazi'i gan' bxhoa'on na' bayej rillo'. 12 Le bayasdote be'nnen', zanlene' gan' bxhoe'n, llwiate be'nn ka' balloje'. Na' llabane be'nn ka', na' lloe'rao ake' Dios ne ake': —Gatga nna re'llo ka dan' gok nna' lla. 13 Bde na', byej Jesúsen' lloa' nisda'on da yobre, na' be'nn zan bdop, na' broe' bsedre' leake'. 14 Na' bdie' ga lli' to be'nn re Leví, nake' xhi'nn be'nnen' re Alfeo, llie' gan' llchixhje' dan' llaya'l wayej yell gan' llnebia' leake'. Na'll lle Jesúsen' le'e: —Da nao nada'. Na'll bzolle'e, na' bnawe' Le'e. 15 Na' bde na', lli' Jesúsen' llaorene' leake' txhen rill Levín', na' ren be'nn zan be'nn wachixhj, na' yezikre no be'nn wen da xhinnj, na' ren be'nn ka' non Le'e txhen, le be'nn zan na' nao Le'e. 16 Na' be'nn ka' llsedre ke ley dan' bzoj da Moisésen', na' be'nn fariseo ka', bre'e akre' Jesúsen' llaorene' be'nn wachixhj ka' txhen, na' be'nn wen da xhinnj ka' yela', goll ake' be'nn ka' non Jesúsen' txhen: —¿Bixchen llaorene' wachixhj ka', na' ren be'nn wen da xhinnj ka' txhen? 17 Ka bene Jesúsen' ka', na'll golle' leake': —Be'nn bibi yillwe' llake, bi yalljre' be'nn wen rmell, zan be'nnen' llak yillwe'n, le'en yalljre' be'nn wen rmellen'. Kan' naken kia' nada', kere za'a zadyexha' be'nn wen aken', zan za'a zadwia' be'nn wen da xhinnj aken'. 18 Bixha gok to lla be'nn ka' non Juan na' txhen, na' be'nn ka' non be'nn fariseo ka' txhen non ake' was, na' bal be'nn ka' jak ake' rao Jesúsen', na' lle ake' Le'e: —¿Bixchen be'nn ka' non Juan na' txhen, na' be'nn ka' nao be'nn fariseo ka' llon ake' was, na' be'nn ka' non rwe' txhen na', bi llon ake' was? 19 Na'll lle Jesúsen' leake': —¿Bixha wak gon be'nn ka' was, be'nn ka' llon ake' yexh ga llak yel wachayna'a chak lli'rén be'nnen' llchayna'n leake'? Chak nna zo be'nn byion', llon ake' le'e txhen, ker wak gon ake' was. 20 Zan wllin lla kat waga'a be'nn byion', kana'llen' gon ake' was. 21 ’Ni to be'nn kat wade'e ra'll, si'ze' to ra'll kobe wade'en da goren'. Cha' ka' gone', ra'll koben', kat chiben, wabe'n, na' da goren' yezikre che'zen. 22 Leska' nono ka'cha'oze xis uva koben' to lo blloy yid gore, le xis uva koben' wche'zen blloy yid goren' na' larjen. Ke nak xis uva koben' llaya'l ka'cha'we'n lo blloy yid kobe. 23 Bixha gok to lla nba'nne ke be'nn Israel ka', bde Jesúsen' ga naz ake' trigo, na' be'nn ka' non Le'e txhen na', bzorao ll-lechj ake' dao ke trigon'. 24 Na' be'nn fariseo ka' lle ake' Le'e: —Bwiake kan' llon be'nn ka' non rwe' txhen na', ¿bixchen llon akze' ka'? Llon ake' da bi llaya'l gonllo lla nba'nne. 25 Na' Jesúsen' golle' leake': —¿Bixha bi nna golre kan' ben da rey Daviden' kana'? Ka bdone' ren be'nn ka' zejrene' txhen na'. 26 Kan' byoe' gan' nak rill Diosen', na' be'nnen' re Abiatar nake' bxoz, Daviden' bdawe' yet xtir ke Diosen' da bi de latj gao noteze be'nne, toze bxoz ka' gak gao len; Daviden' bdawe'n, na' leska' bdaorén be'nn ka' zejrén le'e txhen na' len. 27 Leska' lle'e leake': —Ni ke be'nnachen' brej Diosen' lla nba'nne nench sie'n banez, kere breje' be'nnachen' nench gonchie' lla na'n. 28 Llaya'l nnézere nada', Be'nnen' Gorj Radj Be'nnach, naka' xan llan' llapre bara'nne.
