San Marcos 15

1Kate byeni' na' badop bxoz wnebia' ka', na' be'nn gor brao ke be'nn Israel ka', na' ren be'nn ka' llsedre ke ley dan' bzoj da Moisésen', na' yeololte be'nn ka' llnebia' Israel, na' bchej ake' Jesúsen', na'll jwa'a ake' Le'e rao Pilaton'. 2Pilato na' bnnabre' Le'e: —¿Rwe'n nako' Rey ke be'nn Israel ka'? Na'll ballie' xti'll be'nnen', bne'e: —Kan' ba bnekzo' na' naka'. 3Na' bxoz wnebia' ka', llaral akre' ll-lliayi'll ake' Le'e. 4Na'll da yobre llnnabe Pilaton' Le'e: —¿Bibi nekzo'? Bwiake da zan dan' ll-lliayi'll ake' rwe'n. 5Na' Jesúsen' chras billbi bnekze'. Na'll llabane Pilaton' kwis. 6Na' de to da llon ake' yeo iz, yesán Pilaton' to be'nn yo' rill ya kat lla'l lnni Paskwn', kon be'nn nnab be'nn yell. 7Na' to be'nn re Barrabás yoe' rill yan', lla'rene' be'nn yob akre' le bxe ake' to wdile, na' baso't akte' be'nne. 8Be'nn zan badope, na' jake' jannab ake' wasán Pilaton' to be'nne kan' llonkze' yeo iz. 9Na'll lle Pilaton' leake': —¿We'nere wasana' Rey kerén', re' nakre be'nn Israel? 10Pilaton' bne'e ka' le gokbe're' dan' llaxhé' bxoz wnebia' ka' Jesúsen', na'llen' bde ake' Le'e rao ne'en. 11Na' bxoz wnebia' ka', llko'yel akre' be'nn zan ka' nench bnnab ake' wasane' Barrabás na'le. 12Na'll lle Pilaton' leake' da yobre: —¿Akxha gona' ke be'nnen' nere Rey ke be'nn Israel ka'? 13Na'll llosia' ake' ne ake': —¡Bde'e le' yay cruz! 14Na'll lle Pilaton' leake': —¿Bixha da xhinnj ba bene' na'n? Na' leake'n llosia' ake' yezikre zillj kwis, ne ake': —¡Bde'e le' yay cruz! 15Na'll basán Pilaton' Barrabásen' nench baga'nne' wen rao be'nn ka'. Na' golle' be'nn ka' bdintat ake' Jesúsen', na'll bene' Le'e rallna'a ake' wda'a ake' Le'e le' yay cruzen'. 16Na'll waka'a ya ka', le bche'e akte' Le'e llyo' yora'on gan' lli' Pilaton', na' goxh ake' waka'a ya ka' yela'. 17Na'll bwakw ake' Le'e to ra'll morad, na' bti'x ake' ye to de lba ye'che, na' bliz ake'n yichje'n. 18Na'll bzorao ake' lltitj akre' Le'e, ne ake': —¡Sechga ke be'nn wnebia' ke be'nn Israel ka'! 19Na' bdin ake' yichje'n to xhis, na'll llxi't ake' xhe'n rawe', na' llche'k xhib ake' rawe'n lltitj akre' Le'e. 20Bayoll btitj akre' Le'en, na'll bayalj ake' ra'll tonnen', na'll bawakw akse' Le'e xhakze', na'll bche'e ake' Le'e gan' wda'a ake' Le'e le' yay cruzen'. 21Ka zjake' na', to be'nn zaza'a lyi'xe be'nn Cirene be'nn re Simón xa Alejandro ren Rufo, na' bchie' akre' le'e nench blene' cruzen'. 22Na'll nche'e ake' Jesúsen' latjen' nzi'i Gólgota lle'nen nen Latj ke Yichj Llit Wat. 23Na'll be'e ake' Le'e xis uva da nchix nell dan' nzi'i mirra, na' bi we'je'n. 24Na'll bda'a ake' Le'e le' yay cruzen'. Na' waka'a ya ka', bditjen ake' xhara'ne'n, llwia ake' nara'chk noren' llaya'l toto ake'. 25Ka lladá gan' bda'a ake' Le'e le' yay cruzen'. 26Na' yichj yay cruz na', bllia ake' bi ken de'e ganna', na' llian: “Rey ke Be'nn Israel ka'.” 27Leska' kwite' na', bzo ake' ye chop cruz, na' bda'a ake' chop be'nn wan ake chla' weje', toe' cha'we ye toe' rbese. 28Na' dan' ben ake' ka', bzoa di'll kan' nyoj xti'll Diosen' gan' nen: “Ben ake' Le'e ka be'nn wen da xhinnj.” 29Na' be'nn ka' llde gan' nda'a ake' Le'en, ll-lol yichj ake' llchachrén ake' Le'e, lle ake' Le'e: —Rwe'n ne'o yechinnjo' yoda'on, na' chonn llaze wayonte'on. 30Basrachk kwino', na' bayetjchk le' yay cruzen'. 31Na' leska' bxoz wnebia' ka' ren be'nn ka' llsedre ke ley dan' bzoj da Moisésen', lltitj akre' Le'e, na'll lle lwellj ake': —Basre'e be'nn yobre, na' bi llasrá kwine' na'. 32Cha' le'en Cristo, rey ke lli'o be'nn Israel, wayetjchke' le' yay cruzen' nench re'llo, na'll chejle'llo. Leska' be'nn ka' zjada'a chla' wej kwite'n lltitj akre' Le'e. 33Ka bllin wa willen', bachol doxhen yellrio bllinte lladá chonne. 34Ka bllin lladá chonn na'n, besia' Jesúsen' zillje bne'e: —Eloi, Eloi, ¿lama sabactani? —da ni lle'nen nen: Dios kia', Dios kia', ¿bixchen ba bsanra'llo' nada'? 35Na' bal be'nn ka' zjalla'a ganna', ben akre' kan' bne'en, na'll ne ake': —Lewiake llalwille' Elías, be'nnen' be'e xti'll Dios kana'. 36Na'll zejdo to be'nnen', jaxie' to da bza'llen zo zichje, bzoe'n to rao yia na' jaze'en lloa' Jesúsen', na'll bne'e: —Ledachk wiallo cha' yed Elíasen' yedletje' Le'e. 37Na'll besia' Jesúsen' zillj kwis, na' gote'. 38Na' ra'llen' ze lo yoda'on blle'zen goken chopre, bxhi'zen yichjte bllinte xhnie'. 39Na' xan waka'a yan' ze'e rao Jesúsen', bre're' doxhen kan' besie' gote'n, na'll bne'e: —Da likze Xhi'nn Dios be'nnen'. 40Leska' zjazé no'r ak llwia ake' zi'tre, na' zerén María Magdalena, na' María xhna' Jacobo be'nnen' nak be'nn na'ch, na' José na' ren Salomé. 41No'r ki bnao ake' Jesúsen' ka nna zote' Galilean', na' llakrén ake' Le'e kat bi da yalljre', ren no'r yob akre' bnao ake' Le'e bze'e Galilean' zeje' Jerusalén na'. 42Ka ba wlle' na', na' naken lla llsinia' ake', zeje di'll lla vispr ke lla nba'nne ke be'nn Israel ka'. 43Na' to be'nn re José be'nn Arimatea, nake' be'nn brao radj be'nn ka' llnebia' Israel na'; leska' ba llone' rez baten' sorao nnebia' be'nnen' wse'l Diosen'. Le'e bene' ra'll-lloy byeje' rao Pilaton', na' bnnabe' kwerp ke Jesúsen'. 44Ka bene Pilaton' ba got Jesúsen', na'll llabanre', na'll goxhe' be'nn xan waka'a ya ka' nench bnnabre' le'e cha' da li ya'nnen' ba gote'. 45Na' be'nn waka'a yan' lle'e le'e, da likzen' ba gote', na'll be'e Pilaton' latje' waletj Josén' kwerp ke Jesúsen'. 46Josén' we'we' to xchan, da bara'lle' Le'e, ka baletje' Le'e le' yay cruzen'; na'll jakwa'ch ake' Le'e to lo ba da bche'nne' le' yej. Na'll btole' to yej xhen lloa' brojen' nench bsejen len. 47María Magdalena na' ren María xhna' Josén', ze ake' llwia ake' gan' bro' ake' Jesúsen'.

will be added

X\