San Marcos 14

1Ye chop llare llin lnni paskwn', katen' llao ake' yet xtir da bi nchix kwa binn; na' be'nn ka' nak bxoz wnebia' ren be'nn ka' llsedre ke ley dan' bzoj da Moisésen', lloe' ake' di'll akre ka gon ake' siye'e ake' Jesúsen', na' go'x ake' Le'e, na' yeso't ake' Le'e. 2Na' ne ake': —Bi go'xlloe' rao lnnin' nench ke gakbe'e be'nn yell, na' gon ake' dá nne. 3Na' zo Jesúsen' Betania rill be'nnen' re Simón, be'nnen' goke yillwe' dan' ne lepra. Na' ka llie' llawe' na', bllin to no're no'xe' to lmet de yej cha'o, na' yollen ceit da la' xhix nzi'i nardo, na' za'ken da xhen; le bla'te' lmeten' le bwazjte'n yichj Jesúsen'. 4Na' bale be'nn ka' zjalla'a ganna' goklla'a ake', na'll lle lwellj ake': —¿Bixchen benditjerize no'ren' ceit xhixen'? 5Wenre chenak be'te'n ke to da llon be'nn gan chonn gayoa (300) lla llin, na' gakrene'n be'nn ya'che. Na'll bi ne bi zill ake', lle ake' no'ren'. 6Na' Jesúsen' lle'e leake': —Waljezen. ¿Bixchen llere' ka'? Da wen na' bene' ka'. 7Ka nak be'nn ya'ch ka' lla'a akse' radjren', na' wakse gakrén akre' batteze, zan ka nak nada', nna'zen' zorena' re'. 8Ka nak dan' bwazj no'ren' ceit xhixen' yichja'n, ba bentegue' ke da llaya'lkze gon ake' kat ga'cha'n. 9Di'll li nia' re', doxhen yellrio do gateze lljatixjwe' be'nn Di'll Wen dan' llzejnie' kia'n, dekz de yene be'nn ka', kan' ben no'r ni, nench lljadinra'll ake' le'e. 10Na'll Judas Iscarioten' be'nnen' ren radj be'nn chllinn ka', byeje' rao bxoz wnebia' ka', na' bchebe' gone' Jesúsen' rallna'a ake'. 11Ka ben akre' ka', bawé akre' kwis, na'll bcheb ake' we'e ake' le'e mell. Na'll Judasen' bzorawe' llayirjla'lle' akre gone' gak latje' gone' Jesúsen' rallna'a ake'. 12Bllin lla nell lnni kat llao ake' yet xtir dan' bi nchix kwa binn, leska' llot ake' xhi're nench lljasa'ra'll ake' kan' babej Diosen' xozxta'o ake' ka' gan' nzi'i Egipto. Be'nn ka' nao Le'en lle ake' Le'e: —¿Gaxha lle'nro' lljasinia'llo da gaollo ke lnni paskwn'? 13Na'll bse'le' chop be'nn ka' non Le'e txhen, lle'e leake': —Lechej yellen', na' kat cho're na', le walláytere to be'nn zanzoa leo nis xhichje', na' le nnaotere'. 14Na' gan' wayoe' na', na' cho're, na' yere xan yo'n: “Maestron' ne'e ki: ¿Gan' zo yo' gan' gaorena' be'nn ka' non nada' txhen ke lnni paskwn'?” 15Na'll le wroe'tere' re' to yo' da zo ye to kwia yichje ba zon xhnid. Ganna' le wsinia'tere dan' gaollon'. 16Na'll byej chop be'nn ka', ka byo' ake' yellen' gokte doxhen kan' golle' leake'n, na' bsinia' ake' ke lnni paskwn'. 17Ka betj lle' na', bllin ren Jesúsen' be'nn chllinn ka' gan' zo yo'n. 18Na' bllie' gan' gao ake'n, na' lle'e leake': —Di'll likze nia' re', to re' llaorenre nada' txhen, gonre nada' rallna'a be'nn ka' llwie nada'. 19Na'll bzorao gok akre', na' twej twej ake' llnnab akre' Le'e: —¿Kere nada'n gonriza' ka' lla? 20Na'll lle'e leake': —To re' rao be'nn chllinn ki, llrabjrenre nada' yet xtir kerén' lo ye'nnen', le'en gonre' nada' ka'. 21Ka nak nada', Be'nn Gorj Radj Be'nnach, ka nyojkze kia'n got ake' nada', zan ¡nya'chraz naken ke be'nnen' gon nada' rallna'a be'nn ka'! Wenre chenak bi bzokze' yellrion'. 22Na'll ka ba llao ake' na', bxhie' yet xtiren', na' benla'ye'n, na' bxhoxhje'n be'en leake', na' bne'e: —Lesi'n, len na' naken kwerp kia'. 23Na'll bxhie' leo da'on, na' be'e yel llioxken ke Dios, na'll be'e leake' xis uvan' we'e yeolol ake'. 24Na' lle'e leake': —Da ni naken xchena', na' larjen ni ke be'nnach, na' llroe'n sorao to da kobe dan' bcheb Diosen' gone' gakrene' be'nnach. 25Di'll likze nia', bill ye'ja' xis uvan' llinte lla kat yeye'ja'n da yobre gan' llnebia' Diosen'. 26Bayoll bel ake' da be'rao ake' Diosen', na'll bllach ake' zjake' gan' zo ya' gan' nzi'i Ya' Olivos. 27Na'll lle Jesúsen' leake': —Nna' lle' yeololre gakgánere, na' wkwa'nnre nada', gak kan' nyoj xti'll Diosen' nen: “Gota' be'nnen' llap xhi'r ka', na' gaslas xhi'r ka'.” 28Na' kat wasbán Diosen' nada' radj be'nn wat ka', wabiarawa' raore waya'a Galilean'. 29Na'll lle Pedron' Le'e: —La'kze cha' yeolol be'nn ki wkwa'nn ake' rwe', nada' bi wsanra'lla' rwe'. 30Na'll lle Jesúsen' le'e: —Da li kwis llepa' rwe', za kwellre lekwn' da wllope nna' lle', kat gak chonn ras, ni ke wchebzo' cha' nombia'o nada'. 31Na' Pedron' yezikre lle'e Le'e: —La'kze cha' gatrena' rwe', kbat nnia' bi nombia' rwe'. Na'll toz ka' bne yeolol akte'. 32Bllin ake' gan' nzi'i Getsemaní, na' lle Jesúsen' be'nn ka' non Le'e txhen na': —Gannize lekwe', chak llje'rena' Diosen' di'lle. 33Na' bche'e Pedron', ren Jacobo ren Juan na', na' ba bzorao llakya'chre'. 34Na' lle'e leake': —Wa ba llakya'ch ra'llda'wa'n kwis, llaka' ka be'nn le gatte, na' gannize lega'ye, lewnna' yere. 35Na'll bdie' ye ra'te, na' bche'k xhibe', blle'ke' jano'pte' rao yo, na' bzorawe' llalwille' Dios bnnabe' cha' wak ten ka'ze, bi gak ke'e kan' ba zo gak ke'e na'. 36Ka llalwille' Dios na'n, bne'e: —Xa Dios, rwe' llak llono' yeololte, benchga bi sa'kzia' kan' ba zo gak na', zan bi gak ka lle'nra' nada', kon ka nnekzo' rwe' gak. 37Na'll le zayejte' jawie' be'nn ka' nkwa'nne'n, na' jadi're' leake' tas ake' kwis. Na'll lle'e Pedron': —Simón, ¿bixchen le taso' kwis? ¿Bi gok wchacho' bichgalen' choll da'ozen'? 38Bi tasre, lewalwill Dios nench ke gon da xhinnjen' re' gan. Nnezra' lo yichjra'llda'oren' lle'nere wnna'renre nada' yere, na' kwerp kerén' bi zoen. 39Na'll zeje' da yobre, je'rene' Diosen' di'lle kan' ba bnekze' da nell na'. 40Ka balline' da yobre, leska' tas ake', le lliacha' bichgalen' ko'll rao ake'n, ni ke bi llallel akzre' bi ye ake' Le'e. 41Da wyonn rase zayeje', na' jadi're' leake' tas ake', na'll lle'e leake': —¡Letas, lewazi'ra'll! Ba gok to kat, ba bllin lla, nada', Be'nn Gorj Radj Be'nnach, gaka' rallna'a be'nn wen da xhinnj ka'. 42¡Lewayas, lewayo'o! Gannize ba ze be'nnen' gon nada' rallna'a be'nn ka'. 43Na' zete Jesúsen' lloe' di'll na', kat bllindo Judas be'nnen' ren rao be'nn chllinn ka', nche'e be'nn zan be'nn no'x no spad no yay, be'nn bse'l bxoz wnebia' ka', na' be'nn ka' llsedre ke ley dan' bzoj da Moisésen', na' be'nn gor brao ka'. 44Na' Judasen' be'nnen' bde Le'e rao na'a be'nn ka', golle' leake' akren' gone' wroe're' non' go'x ake'. Na'll lle'e leake': —Kon be'nnen' wno'pa' na', lekze'n. Na' lego'xe', lewcheje', na' lewache'e. 45Na'll kate blline'n, le jabi'yte' gan' ze Jesúsen' lle'e Le'e: —Maestro. Na' le bno'pte' Le'e. 46Na' be'nn ka' nche'e Judasen', le be'x akte' Le'e, na'll bchej ake' Le'e. 47Na' to be'nn ka' ze ganna', le brejte' spad ke'en bdine'n be'nnen' nak be'nn wen llin ke bxoz braon', bchoyte' chla' naye'. 48Na' bne Jesúsen', lle'e be'nn ka': —¿Bixchen llonre nada' ka to be'nn wan, za're zadxi're nada' kone spad, na' ren yay? 49Rencha' yeo lla bzorena' re', broe'ra' re' lo yoda'o braon', na' bi be'xre nada' kana'. Na' ka nak llak da ki, llak ka' nench llak kan' nyoj xti'll Diosen'. 50Kana' yeolol be'nn ka' nao Le'en, baxhonnj ake' bsanra'll ake' Le'e. 51Na' to bi we'o naobe' Jesúsen', na' llelbe' toze xchan, na' be'xrén akebe'. 52Bixha to ballojzbe' lo xchan, na' bsanra'llbe'n baxhonnjbe' gal yidzbe'. 53Na'll jwa'a ake' Jesúsen' rao bxoz braon', na'll badope' bxoz wnebia' ka', na' be'nn gor brao ke be'nn Israel ka', na' ren be'nn ka' llsedre ke ley dan' bzoj da Moisésen'. 54Pedron' nawe' zi't zi'te, ka byo' ake' rill bxoz braon', na' rene' byo', na' blle'rene' txhen be'nn ka' llap yoda'o braon', balle're' lloa' yi'n. 55Na' bxoz brao ka' ren be'nn wnebia' ka', llayirjla'll ake' bi da gao ake' xhia ke Jesúsen', na' chan di'll ke'e, na' got ake' Le'e. Na' bibi ballel akre'. 56Bal ake' ziye'e ake' ll-lliayi'll ake' Le'e, na' bill dile xti'll ake' ka ne ake'. 57Na'll bzolla'a be'nn lloe' ak di'll wxhiye'e, ne ake': 58—Neto' ba béneto' bne'e: “Nada' yechinnja' yoda'on dan' ben be'nnache, na' chonn llaze wayontia' ye to yoda'o da bi gon be'nnach.” 59Na' bi llakse toz di'lle ka ne yeolole'. 60Na'll bzolla'a bxoz braon' rao be'nn zan ka', na'll lle'e Jesúsen': —¿Bibi nnekzo' ka nak dan' ll-lliayi'll be'nn ki rwe'n? 61Na' Jesúsen' bi balli'kze' xti'lle'n, zeteze lliteze, na'll lekze bxoz braon' da yobre lle'e Le'e: —¿Bixha rwe'n nako' Criston', Xhi'nn Dios be'nn le zeraoze nak la'ye? 62Na'll lle Jesúsen' bxozen': —Nada'n, na' re're nada', Be'nnen' Gorj Radj Be'nnach, lljallia' kwit Xanllo Dios be'nnen' nap yel wak xhen, na'll re're' katen' yeda' yetja' le' yebán' radj bejen'. 63Na'll bxoz braon' bche'z xhara'ne' nench wroe're' da xhinnj kwisen' bne Jesúsen', na'll lle'e be'nn ka': —Bill yálljello be'nn se gawe' xhia ke be'nn ni. 64Ba bénere kan' bnne'e ke Diosen'. ¿Akre ka llákere? ¿Akre gonllo ke'e? Na' yeolol be'nn ka' bchoy ake' ke'e gate'. 65Na' bal ake' bzorao ake' llxi't ake' xhe'n yichjrawe', llsej ake' rawe'n, na' llba'll ake' Le'e, na'll lle ake' Le'e: —¡Bnneya'chk noxhan' bra'll rwe'! Na'll be'nn ka' llap yoda'on llgap ake' lloa'rawe'. 66Na' Pedron' llie' lia'te radj be'nn ka', ka bllinkze to no'r wet ke bxoz braon'. 67Ka bre're' Pedron' lli'rene' be'nn ka' lloa' yi'n llayaye', na'll llwiaya'nne' le'e, na' lle'e le'e: —Ren rwe'n nakreno' Jesúsen' txhen be'nn Nazareten'. 68Na' Pedron' bi bchebe', na' bne'e: —Bi nombie', ni ke nnezzra' bin' ne'o. Na'll jazedoe' lloa' yo' na', na' le bllellte lekw. 69Na'll no'r weten' llwiaya'nnkze' le'e da yobre, na' lle'e be'nn ka' lla'a na': —Ren be'nnen' ze ganna' nake' be'nn ka' txhen. 70Na' da yobre bi bchebkze Pedron'. Gok ye choll kat be'nn ka' zjalla'a ganna' da yobre lle ake' le'e: —Li nakreno' be'nn ka' txhen, da lijen', le lekze be'nn Galilea rwe', nakbie'ze nne'o kan' nne be'nn Galilea ka'. 71Na' le bzoraote bnne'e znia, lle'e be'nn ka': —Da li rao Dios bi nombia' no be'nnen' nere ka'. 72Na' le bllellte lekwn' da wllop rase. Kana'll jadinra'll Pedron' kan' goll Jesúsen' le'e: “Za kwellre lekwn' da wllope, gak chonn ras bi wchebo' cha' nombia'o nada'.” Kana'll jadinra'lle', na'll bllelle' kwis.

will be added

X\