San Marcos 13

1Ka ba llaza'a Jesúsen' yoda'o braon', to be'nn non' Le'e txhen golle' Le'e: —¡Maestro, bwia ke da xhen nak yoda'on, na' leska' da xhen nak yej ka' naken na'! 2Jesúsen' ballie' xti'lle'n, lle'e le'e: —Ka nak yo' xhen ki llwiare, wllin lla wayinnj ake'n, ni to yej ngo'd lwellje bi yega'nne. 3Na' jake' ya' gan' nzi'i Ya' Olivos, na' llga'nnen chla' gan' zo yoda'o braon', na' bllie', na'll Pedron' na' Jacobo, na' Juan, na' Andrés na', jannab akre' Le'e to wraze: 4—Bnechk neto', ¿batxhan' gak kan' ba bne'on? ¿Akxha gakze nnézello katen' ba zo rez gak yeolol da ki bne'o ni? 5Jesúsen' ballie' xti'll ake'n: —Lewiaya'nn kwasro, notno siye'e re'. 6Be'nn zan yednné ake' nak ake' Cristo. Na' siye'e ake' be'nn zan. 7’Kate yénere ba za'a wdile, ba llak wdile, bi llebre, le ka'n dekz de gak, na' kere le wayollte yellrio na'n. 8Na'll tile toto yell, na'll yell xhen ren ye to yell xhen, na' xo' do gateze, na' gak win, na' bi gak bi nne, kone ka' sorao yellayrao be'nne lla'a yellrio. 9’Lewiake, lljwa'a ake' re' do rao koxchis, na' do lo yoda'o ka', na' chintat ake' re', lljwa'a ake' re' no rao rey, no rao be'nn wnebia' ka' ni kia' nada', na' ka'n we'rén akre' xti'lla'. 10Na' llonen bien nneze be'nn lla'a doxhen yellrio Di'll Wen ke Diosen'. 11Katen' lljwa'a ake' re' rao be'nn wnebia' ka', bitbi gákere cho'rizre da zed akre nnere. Kat ba zere rawe na', gonn Diosen' di'll yelli're xti'll ake'n, na' kere re'kzen' nnere, Spíritu ke Dios na'kzen' wzejnie'n re'. 12Kana' bal be'nn wayechj ake' gon ake' be'nn bi'ch ake' ka', rao na'a be'nn got leake', na' nni't be'nn gon ake' xhi'nn ake' ka', rao na'a be'nn got ake' leakbe', na' nni't be'nn wayechj ake' gon ake' xaxhna' ake' ka', rao na'a be'nn got leake'. 13Na' yeololte be'nn wie akre' re' ni kia' nada', na' noteze be'nn se war wxenra'lle' nada' llinte lla gate', le'en yerá. 14’Daniel be'nnen' be'e xti'll Dios kana' bzoje', wllin lla so da zban da ke wayazra'll Dios. (Be'nn llol di'll ni llaya'l chejnie're'.) Na' kat re're ba zo dan' gan' bi llaya'l son, kana' be'nn lla'a Judean' llaya'l wxhonnj ake' lljake' do ya' da'ore. 15Be'nn dá yichjo rille', bi llaya'l wayetje' wayoe' lo yo', lljaxhie' no xchinraze'. 16Na' be'nn dá lyi'xe, bi llaya'l wabie' lljaxhi'i xhara'ne'. 17Naken nya'chraz ke no'r noa' xhi'nne, na' no'r ka' nka' bda'o ka lla na'. 18Lennab rao Dios katen' gak da ki bi gaken be'o zay. 19Da xhen yellayrao be'nne kate llin llan', kan' bxe Diosen' yellrio nono nna yellayrao kateken' yellayrao ake' kana', na' yeyoll na', billbi ga'te ye to ka len. 20Chenak Diosen' bi gone' kwexhen kan' llaken, ni to nono yerakze, zan ni ke be'nn ka' ba breje' na', ni ke leake'n gone' kwexhen. 21’Na' cha' kana', no yerize re': “Ledá, zote Criston' ganni”, na' “Lechej ganna' zoe'”, bi chejle're. 22Be'nn zan be'nn wxhiye'e cha'a yellrion', nne ake' leake'n nak Criston', na' leake'n lloe' xti'll Diosen'. Gon akte' yel wak, na' billre da yebane be'nn ka' kon ka siye'e ake', nxhollte wxoayay ake' be'nn ka' ba brej Diosen'. 23Na' lesó xhnid ka nak ba llepa' re' yeolol kan' gonen nna'. 24’Na' ka nake lla ka yeyoll yellayrao be'nn ka', kana' willen' yecholen, leska' be'on bill wseni'n. 25Berj ka' llia le' yebán' yexj aken, na' yel wak ke yebán' dan' nga'chen, gaken ka llak yellrion' kat llxho'. 26Kana'll re'e be'nn ka' lla'a yellrion' nada', Be'nnen' Gorj Radj Be'nnachen', za'a radj bej ka' nsa'a yel wak xhen ren yel beni' xhen kia'n. 27Na'll wse'la' angl kia' ka', yetop ake' be'nn ka' ba breja' doxhente yellrio, ga zeraoze llayollen, na' ga zeraoze llayoll yebá. 28’Lechejnie' ka di'llen' we'rena' re' ke yay higo na': Kat ba llaga' xhla'ye na', llnnézere ba rez llin lla yeyo'llo rinne. 29Na' lekze kate re're ba llak da ke nxhia kan' ba bnia' na', kana'll nnézere ba zo rez yeda' da yobre. 30Da li llnia' re', be'nn ka' lla'a nna', nna nban akte' kate sorao gak da ki. 31Ka nak yebán' ren yellrion' wllin lla kat te ke, zan ka nak xti'lla'n kere da te ke ka'zen'. 32’Zan nono nneze bi llan', bi horen' gak ka', ni angl ka' ni't yebá na', ni nada'. Toze Xa' Dios na' nnezre'. 33’Ke len na', lewiá, lesó xhnid, leyelwill Dios, le bi nnézere baten' yeda' da yobre. 34Gonen rebze ka ke to be'nne bro' nez zeje', na' bkwa'nn rille', na' bkwa'nne' da gon toto be'nn wen llin ke'e ka', na' be'nnen' bze llapen', lle'e le'e bi tase', na' wnne'e yere. 35Leska' re', lesó xhnid, le bi nnézere bi llan' wara' xan yo'n, cha' ba llze yere o cha' do llere o kat ba bell lekw o cha' do ba lleni'. 36Le nxholl kate ware'en, yeddi're' re' tasre kwis. 37Da ni llnia' re', na' lekze ka' nia' yeolol be'nne; lesó xhnid.

will be added

X\