San Marcos 11

1Ka ba zjake' awlloze Jerusalén na', na' bllin ake' yell ka' nzi'i Betfagé, na' Betania gan' zo ya' gan' nzi'i Ya' Olivos. Na' bse'l Jesúsen' chop be'nn ka' non Le'e txhen na', 2lle'e leake': —Lechejchk yell da'on lli' chla' na', na' kate cho're yellen', na' lljati're to burr da'a yay, ni to nono nna kwia leba', na' wsellreba', na' yedsantereba' ganni. 3Cha' lloj to be'nn nne'e: “¿Bixchen llonzre ka'?”, na' leye'e: “Xanto' na' yálljreba' choll, le wadsántetoba'.” 4Na'll byej ake', na' le jati' aktere' to burren' da'ba' yay lloa' yo' da zo lloa' nez, le bsell akteba'. 5Na' bal be'nn ka' zjazé ganna', lle ake' leake': —¿Bixhan' llonre? ¿Bixchen llsellreba'? 6Na' goll ake' leake' kan' goll Jesúsen' leake' na'. Na' be'e ake' latj bche'e akeba'. 7Na'll le bache'e akte' burren' gan' ze Jesúsen', na'll bxoa ake' no xha ake' ko'll burren', na'll bllie'ba'. 8Leska' be'nn zan zjake' llchirj ake' no xha ake' tnezen', na' ye bal ake' bchoy ake' no xho'z yay, na' llyixj ake'n tnezen'. 9Na' be'nn ka' lliarao, na' be'nn ka' nao Le'en, yeolol ake' llosia' ake' ne ake': —¡Dowe'rao Dios! ¡Nak la'y be'nnen' za'a ganni be'nn bse'l Xanllo Diosen'! 10¡Ze'e nnebie' kan' bnebia' xozxta'ollo David! ¡Dowe'rao Dios zo yebá! 11Na' bllin Jesúsen' Jerusalén, na' byoe' lia' yoda'o braon'. Na' bayoll bwie' bayechjte', na' le zayejte' gan' ne Betania ren be'nn chllinn ka', le ba nak ba wlle'. 12Bateyó ka baza'a ake' Betanian' bdon Jesúsen'. 13Na' zi'tre bre're' to yay higo da llia la'ye, na'll zeje' llwie' cha' llian higo, bixha ka blline'n kere bi llia dan', la'yze llian le bi nna llin lla kwian. 14Na'll lle Jesúsen' yay higon': —Chras nollno gaokze da xhixen' llbia'o. Na' be'nn ka' nao Le'en ben akre' kan' bne'en. 15Bde na', bllin ake' gan' nzi'i Jerusalén. Na' ka byo' Jesúsen' lia' yoda'o braon', na' bzorawe' llaraydoe' be'nn ka' llon ya'a, be'nn ka' llo't, na' be'nn ka' lla'o. Bzale' gan' nkwa'a mell dan' llcha'a ake', leska' bllo'nne' gan' llbe' be'nn we't plom ka'. 16Nollno be'e latj te lia' yoda'on, cha' bi da noe' go'te'. 17Na'll bzejnie're' leake', lle'e leake': —Kin' nyoj xti'll Diosen': “Rilla'n, naken ga lljak be'nn za'a yeolol yell yelwill ake' nada'”; na' re', ba nonren ka to lo broj ke be'nn wan. 18Be'nn ka' nak bxoz wnebia', na' ren be'nn ka' llsedre ke ley dan' bzoj da Moisésen', ben akre' kan' bne'e na', na'll llayirjla'll ake' akre ka gon ake' nench got ake' Le'e, le lleb ake' Le'e, ka nak doxhente yell, llabán akre' kan' llzejnie're' leake'n. 19Na' kate golen', le baza'te Jesúsen' Jerusalén na'. 20Tzir bateyó badé ake' gan' zo yay higon', na' bre'e akre' byechte do roe. 21Pedron' jadinra'lle' kan' goll Jesúsen' yayen', na' lle'e Le'e: —Maestro, bwiakero' yay higon' dan' beno' de'en byechte ka'zen'. 22Jesúsen' ballie' xti'lle'n lle'e le'e: —Lewxenra'll Dios. 23Di'll likze llnia' re', notezre cha' yere ya'n zo ganna': “Bkwas na' jasó lo nisda'o”, na' bi gakgánere na' wxenra'llre, wakte kan' neren'. 24Ke len na' nia' re', biteze da wnnabre ka yelwillre Diosen', cha' wxenra'llre do yichj do ra'llre, gonte' dan' nnabren'. 25Na' katen' yelwillre Diosen', leyezi'xhen ke no be'nne cha' bi benre' re' nench lekze ka', Xallo Diosen' be'nn zo yebá yezi'xhene' da xhinnj ke re'. 26Zan cha' re' bi yezi'xhenre ke be'nne, Xallo Dios zo yebá bi yezi'xhene' ka da xhinnj ke re'. 27Na'll ballín ake' Jerusalén na' da yobre, na' chak dá Jesúsen' lia' yoda'o braon', jabi'y bxoz wnebia' ka', na' be'nn ka' llsedre ke leyen', na' ren be'nn gor brao ke be'nn Israel ka'. 28Na'll lle ake' Le'e: —¿Bi yel llnebia' napo' llono' da ki? ¿No benn yel llnebia' llono' ka'? 29Jesúsen' ballie' xti'll ake'n, lle'e leake': —Leze de to da nnabra' re', na' cha' yelli're xti'lla'n, na'll yepa' re' bi yel llnebia'n llona' da ki. 30¿Noxhan' bse'l Juan na', be'nnen' bchoa be'nn nis? ¿Diosen' bse'l le'e o cha' be'nnachen'? Leyelli'i xti'lla'n. 31Na'll lloe'rén lwellj ake' di'll, ne ake': —Cha' nnello Dios bse'l le'e, na' ye'e lli'o: “¿Bixchen ke byejle're ke le'e cha'?” 32Na' leska' cha' nnello be'nnachen' bse'l le'e, bi gak. Ka' bne ake', le lleb ake' be'nn yell, le yeolol ake' byejle' ake' da li Diosen' bse'l Juan na', nench be'e xti'lle'n. 33Na'll lle ake' Jesúsen': —Bi nnézeto'. Na'll Jesúsen' lle'e leake': —Leska' nada' bi yepa' re' no benn nada' yel llnebia'n da llonrena' ki.

will be added

X\