San Lucas 6

1Gok to lla nba'nne ke be'nn Israel ka', ka yo' ake' nez, bde ake' ga naz ake' trigo, na' be'nn ka' non Jesúsen' txhen na', bzorao ll-lechj ake' dao ke trigon', na' bxho'b ake'n, na' bdao ake'n. 2Na' bre'e be'nn fariseo ka' kan' llon ake'n, na'll lle ake' leake': —¿Bixchen llonre ka'? Llonre da bi llaya'l gonllo lla nba'nne. 3Na'll lle Jesúsen' be'nn fariseo ka': —¿Bixha bi nna golre gan' llian, ka ben da Daviden' ren be'nn lwellje' ka' ka bdon ake'? 4Kan' byoe' lo yoda'on, na' bxhie' yet xtir da ba nak la'y, da bi de latj gao noteze be'nne, toze bxoz ka' gak gao len, na' Daviden' bdawe'n, na' leska' bdaorén be'nn ka' zejrén le'e txhen na' len. 5Na' leska' golle' leake': —Nada', Be'nnen' Gorj Radj Be'nnach, leska' naka' xan llan' llapre bara'nne. 6Gok ye to lla nba'nne, ka byo' Jesúsen' to lo yoda'o ke be'nn Israel ka', na' llzejnie're' leake'. Na' lli' to be'nn nxho'n ne'e cha'we. 7Na' be'nn fariseo ka', na' be'nn ka' llsedre ke ley dan' bzoj da Moisésen', lli' ake' lli'nao ake' cha' wayone' be'nnen' rao lla llap ake' bara'nne, na' ka' ga't da lljatao ake' xhia nench wlliayi'll ake' Le'e. 8Jesúsen' llakbe'tere' kan' llon ake' xhbaben', na'll golle' be'nnen' nat chla' ta'ke'n: —Bazolla'a, na' jasé kllole na'. Na' bzolla'a be'nnen'. 9Na'll goll Jesúsen' be'nn ka': —Ni wnnabkera' re': ¿Bi llaya'l gonllo lla nba'nnen', gonllo da wen o cha' gonllo da xhinnj? ¿Wak yesrallo be'nn o cha' we'llo latj kwiayie'? 10Llwiateze yeolol be'nn ka', golle' be'nnen': —Bli na'on. Na' bli na'a be'nnen', le bayakte ne'en. 11Goklla'a be'nn ka' kwis, na' lloe'rén lwellj ake' di'll akre gon ake' ke Jesúsen'. 12To lla byej Jesúsen' to rao ya' jalwille' Diosen', na' do yer be'rene' Le'e di'lle. 13Kate byeni' na', batope' be'nn ka' non Le'e txhen na', na' breje' chllinn (12) be'nn nne lo raze', na' bsie' leake' postl. 14Ki re be'nn chllinn ka': Simón be'nnen' bsie' Pedron', na' bi'che'n re Andrés, Jacobo, na' Juan, Felipe, na' Bartolomé, 15Mateo, Tomás, Jacobo xhi'nn be'nnen' re Alfeo, Simón be'nnen' ben txhen be'nn ka' nzi'i Zelote, 16Judas bi'ch Jacobo, na'll Judas Iscariote be'nnen', kan' bllin lla, bene' Jesúsen' rallna'a be'nn ka' llwie Le'en. 17Ka llayetjrene' leake' le' ya'n, na' ballín ake' gan' nak ra'che, na' bze Jesúsen' ren be'nn ka' non Le'en txhen na', le ba lla'a be'nn zan za'k doxhen ga nbane Judea, na' Jerusalén, na' yell ka' re Tiro, na' Sidón dan' lli' lloa' nisda'o. Lla'a ake' wzenay ake' xti'lle'n, leska' wayone' yillwe' llak ake'. 18Ren be'nn yo' ake' daxi'o, bayone' leake'. 19Yeolol be'nn ka', lle'n akre' lljatan ake' Le'e, le ne ka lljatan ake' Le'en, ll-lloj yel wak ke'en, na' llayak akte' biteze yillwe' llak ake'. 20Jesúsen' blis rawe'n bwie' be'nn ka' non Le'e txhen, na'll golle' leake': —Nbaraz ke re' be'nn ya'che, re' gonre Diosen' txhen katen' nnebie'n. 21’Nbaraz ke re' nna' bil donre, re' gon Diosen' ka yérjere kwasro. ’Nbaraz ke re' nna' bellre, wllin lla kate yewere. 22’Nbaraz ke re' kate be'nn llwie akre' re', na' wara'a ake' re', na' zi'chi'll ake' re', na' llre'e akre' re' ka be'nn wen da xhinnj, ni ke dan' naore nada' Be'nnen' Gorj Radj Be'nnach. 23Katen' gon akre' re' ka', leyewé, yel banez xhen de keré kate wallinre gan' zo Diosen'. Ka'kzen' ben akre' be'nn ka' be'e xti'll Diosen' blla'a kana'. 24’Zan nya'chraz naken ke re', be'nn wnia', le nna'zen' zi're banez. 25’Nya'chraz naken ke re', nna' nérjere kwasro, za llin lla tonren'. ’Nya'chraz naken ke re', llawere nna', za wallayraoren', za llin lla gosia're. 26’Nya'chraz naken ke re', cha' llon be'nn ka' re' xhen, leska' ben xozxta'o ake' ka', ben ake' xhen be'nn ka' bxhiye'e batna', be'nn ka' bne lloe' ake' xti'll Diosen'. 27’Na' re' llzenay, ni llnia' re': Lellie' be'nn ll-lliayi'll re', legón wen ke be'nn llwie re'. 28Lewnnab gak wen ke be'nn yichjbie' keré, na' lewnnab gakrén Diosen' be'nn llxoa da xhinnj ko'llre. 29Be'nn kape chla' xa'yo'n, bze dan' ye chla' na' kape'n. Cha' be'nn ye'nzre' wke'e xherk ko'on, be'e latj wka'a rente xha'on. 30Cha' be'nn bi da nnabre re', lewe'n, na' cha' be'nn wke'e bi da de keré, bi yennabren. 31Kon yeolol da wen da lle'nere gon be'nn ka' ke re', ka'kze legón ke ake'. 32’Cha' re' nllie're be'nn nllie'zre re', ¿bixha za'ken na' ka'? Leska' llon be'nn wen da xhinnj ka', nllie' akre' be'nn nllie're leake'. 33Cha' llonre wen ke be'nn llone re' wen, ¿bixha za'ken na' ka'? Leska' llon be'nn wen da xhinnj ka'. 34Re' kate bi da llbejre, na' kat bi lloe're be'nne, nnézere wayonne'n, na'llen' lloe'ren, ¿bixha za'ken na' ka'? Leska' llon be'nn wen da xhinnj ka', llakrén ake' be'nn wago' wzon ke ake'. 35Lellie' be'nn ka' llwie re', legón da wen, lewe'e be'nne bi da de keré, bi kwexhzre wayónn ake'n, na'llen' gakre xhi'nn Dios be'nnen' zo yebá, Le'e gonne' re' yel bara'nn xhen kate wallinre gan' zoe'n. Le'e llone' wen ke yeolol be'nne, la'kze nak ake' be'nn wen da xhinnj. 36Lewaya'chra'll, kan' llon Xallo Diosen' llaya'chra'lle' noteze be'nn. 37’Bi wlliayi'llre be'nne nench ke wlliayi'll Diosen' re', na' bi wchoybia're ke be'nne nench ke wchoybia' Diosen' ke re'. Lewazi'xhen ke be'nne, na' ka' wazi'xhen Diosen' keré. 38Lewe'e, cha' bi we're be'nne, ker da nnitrao ka'zen', da wayonnte Xanllo Diosen', wa lla'chochjte wayonne', kon ka we'llo, kon ka zánello we'llo, leska'n wayónn Diosen' lli'o. 39Na'll be'rene' leake' to di'll, bne'e: —¿Wak to be'nn lchol wse'e ye to be'nn lchol yobre? Cha' ka' gone', llop ake' lljabix. 40Ka to bida'o llsede, kere za'kll lebe' kerke be'nnen' llsede lebe'n, zan cha' lebe' we'la'llbe' wsedbe', gonkzbe' ka be'nnen' llsede lebe'n. 41’¿Bixchen llwiazo' beb da'on yo' lo rao be'nn bi'cho'n, na' bi llwia'o beb xhen na', yo' lo rao rwe'? 42¿Bixchen yezo' bibi'cho'n: “Anchk wabejkera' beb da'on yo' lo rao'n?” ¿Bixha dan' yo' lo rao rwe', be'nn chop rao? Zga'tek babej beb xhen na', yo' lo rao rwe', na'llen' yere'ro' kwasro, na' gak wabejo' yixh beben' yo' lo rao be'nn bi'cho'n. 43’Gaga zo yay wen da llbia daxhix da bi nak wen, leska' yay da bi nak wen, bi llbian daxhix wen. 44Kon da xhixen' llbia yay na'n, nnézello ka nak yayen'. Bi llbia higo rao yay ye'che, leska' bi llbia yay ye'che uvas. 45Be'nnen' nak be'nn wen, yichjra'llda'we'n naken ka to ga lla'a da cha'o, na'n llchache' da wen ka' llone'n. Na' be'nnen' nak be'nn wen da xhinnj, lo yichjra'llda'we' na'n, llchache' da ke nxhia ka' llone'n. Kon ke dan' lla'a yichjra'llda'ollo na'n, len na'n ll-llach lloa'llon' kate nnello. 46’¿Bixchen llezre nada': “Xanto'” na' bi llonre kan' nia'n? 47Ni wzejnie'kera' re', ka llon be'nnen' llzenay xti'lla'n, na' llone' ka'n nia'n. 48Wsa'krebe' ka be'nn llon rille', na' brekwe' ranen to rao yej war. Na' gok yejsi'o, babia nis, blloj yeo wa'a byechjen gan' zo yo'n, na' bibi goke yo'n, le llian rao yej war. 49Na' be'nnen' kon llenre', na' bi llone' kan' nia'n, wsa'krebe' ka be'nnen' ben rille' rao yo cholj, na' bi bche'nne' ranen zitj, na' ke blloj yeo wa'a xhen na', bzalen yo'n ka'le, na' blleyi'n.

will be added

X\