San Lucas 4

1Na' Jesúsen' kon ren Spíritu ke Diosen' llnebia'tezen yichjra'llda'we'n, baze'e yeo Jordán na', na' Spíritun' benen nench byej Jesúsen' latj dachen'. 2Choa (40) lla bzoe' na', na' rao choa lla na', daxi'on bko'yelen Le'e gone' da xhinnj. Na' bene' was, bi bdaokze' da choa lla na', bde na' bdone'. 3Na' jabi'y daxi'on llen Le'e: —Cha' da li nako' Xhi'nn Dios, bayonchk yej ki yet xtir. 4Na'll balli'i Jesúsen' xti'll daxi'on, lle'en: —Ki nyoj xti'll Diosen': “Kere toze yet xtir dan' gaollo na'n, llonn yel nban ke lli'o be'nnach, renkze di'll dan' ll-lloj lloa' Diosen' nbanrenllo.” 5Na'll bche'e daxi'on Le'e to rao ya' sibe, na' broe'n Le'e yeolol yell zjalli' rao yellrion'. 6Na' llen Le'e: —Doxhen yel banez yel llnebia' ke yell ki, gonna' rwe', le kia'n naken, na' kon no llazra'lla' wa'an. 7Cha' rwe' wche'k xhibo' we'rao' nada', doxhenen gonna' rwe'. 8Na'll lle Jesúsen' daxi'on: —Byej ka'le daxi'o, ki nyoj xti'll Diosen': “Llaya'l gonlira'llo' Diosen', na' toze Le'en we'ra'o.” 9Na' bche'n Le'e yichjo yoda'o brao Jerusalén na', jasé akte' ga zerao nak sib, na' llen Le'e: —Cha' da li nako' Xhi'nn Dios, bxhi'tchke ganni lljasote'o lle'le, 10le ki nyoj xti'll Diosen': Diosen' wse'le' be'nn ka' nak angl ke'e, gakrén ake' rwe'. 11Na' go'x ake' rwe', nench ke lljache'o yej. 12Na'll goll Jesúsen' len: —Leska' nyojen: “Bi llaya'l nnabro' Diosen' cha' rennre' kan' ne'en.” 13Bayoll kate billbi ballele daxi'on, akre ka wko'yelen Le'e, na' blle'yi'llen to chi'i. 14Na' ka llnebia'teze Spíritu ke Diosen' yichjra'llda'o Jesúsen', bayeje' gan' nbane Galilean', yeolol yell ka' zjalli' do na', bze ke Jesúsen'. 15Na' llzejnie're' be'nn toto yell ga zo yoda'o ga lladop be'nn Israel ka', na' yeolol be'nn ka' lloe'rao ake' Le'e. 16Na' balline' Nazaret gan' blli'we'. To lla llap be'nn Israel ka' bara'nne, byeje' yoda'o gan' lladop be'nn Israel ka' kan' llonkze', na' bzolle'e bele' yichen'. 17Na' bgo'x ake' Le'e dan' bzoj da Isaías be'nn be'e xti'll Dios kana', na' bsarje'n, na' jadi're' gan' nen ki: 18Spíritu ke Xanllon' zorenen nada', breje' nada' nench chixjwe'ra' Di'll Wen ke'en be'nn ya'ch; bse'le' nada' nench wayona' be'nn bi zo wen, na' be'nn zo ya'che. Chixjwe'ra' be'nn ka' nzap daxi'on, Diosen' yesre'e leake', waxa' rao be'nn lchole, wasra' be'nn llsa'kzi' da xhinnjen' leake'. 19Chixjwe'ra' ba bllin lla gakrén Diosen' be'nnachen'. 20Na' batobe' yichen', na' bayoe'n be'nnen' nak rallna'a len na', na' jallie'. Yeolol be'nn ka' lla'a lo yoda'on, llwiachich ake' Le'e. 21Na'll lle'e leake': —Nna' llak kan' llia le' yichen'. 22Be'nn ka' bene xti'lle'n, llabán akre' katek nbaraz nak xti'lle'n, na' bnne ake' wen ke'e. Na' lle lwellj ake': —¿Kere be'nn nin' xhi'nn José? 23Na'll lle Jesúsen' leake': —Cheke nna' yere nada' di'llen' ne ki: “Wen rmell rwe', bayonchk rmell kwino'”. Na' leska' yere nada': “Da ka' ba béneto' beno' Capernaum na', gonchko'n rallo' ni nna'.” 24Na'll bne'e da yobre: —Da li llnia', ni to be'nn lloe' xti'll Diosen', bi cho'ra'll ake' le'e ralle'. 25Da li llnia', zan no'r wazeb lla'a Israelen', kan' bzo Elías be'nnen' be'e xti'll Diosen' kana'. Kana'n chonn iz xop be'o bi gok yej, na' gok win rao yellrion', 26na' Diosen' bi bse'le' Elíasen' gan' zjazó no'r wazeb Israel ka', zan bse'le' le'e to yell da nzi'i Sarepta ga nbane Sidón, ganna'te bzo to no'r wazeb gokrene'. 27Leska' be'nn zan be'nn llen yillwe' dan' ne lepra, blla'a Israelen' kan' bzo Eliseo, ni toe' bi bayak, toze be'nnen' re Naamán be'nn Siria, leze' bayak. 28Ka ben akre' di'll ki, yeolol be'nn ka' lla'a lo yoda'on, goklla'a ake' kwis. 29Na' bzolla'do ake', na' brej ake' Le'e yell, bche'e ake' Le'e to rao ya' awllo gan' lli' yellen', gokra'll ake' wllix ake' Le'e. 30Na' bi gok, llwia akte' badie' radj ake'n zayeje'. 31Na' jasoe' yell dan' re Capernaum ga nbane Galilea, na' toto lla llap be'nn Israel ka' bara'nne, llzejnie're' be'nn ka'. 32Na' llabán akre' kan' llzejnie're'n, le nakbie'ze nnezre' kwasro, na' nse'e yel llnebia' ke Diosen' ka nak lloe' di'llen'. 33Bixha lo yoda'o gan' lladop ake' na', lli' to be'nn yo' daxi'o yichjra'llda'we', na' bzorao llosie', 34bne'e: —Byej ka'le, ¿bixchen zadchixko' ren neto', Jesús be'nn Nazaret? ¿Za'o zadlleyi'o neto'n? Nnézkzera' no rwe', rwe'n Be'nn Nak La'y bse'l Dios. 35Na' benre' daxi'on znia, golle'n: —¡Llakia llono'! ¡Lla balloj yichjra'llda'o be'nnen'! Na'll bllixtolen be'nnen', na' ballojen, na' bibi goke be'nnen'. 36Yeolol be'nn ka' lla'n, llabán akre', lle lwellj ake': —¿Bitk di'llen' ne be'nnen'? Nape' yel llnebia', na' yel wak, na'llen' lle'e daxi'o ka' yelloj aken, na' llalloj akten. 37Yeolol yell ka' zjalli' do na', bze ke Jesúsen'. 38Jesúsen' bazolle'e zayeje', na' byeje' rill to be'nn re Simón. Na' xhna' no'r ke Simón na', yoe' da la, na' goll ake' Jesúsen' wayone' no'ren'. 39Na' Jesúsen' jabi'ye' gan' xhoa be'nn we'en, na' blle'ke', na' balwille' da lan'. Na' le bayakte no'ren', le bayaste' llsinie' da gao ake'. 40Ka ba llen willen', jwa'a ake' be'nn zan llak biteze yillwe' rao Jesúsen', na' bxoa ta'ke'n yichj toto ake', na' bayone' leake'. 41Leska' balloj daxi'o ka' lo yichjra'llda'o be'nn zan ak, llosia' aken, nen: —¡Rwe' nako' Xhi'nn Dios! Na' benre' daxi'o ka' znia, bi be'e latj nne aken, le nnez akren Le'en Criston'. 42Bateyó ka byeni', blloje' byeje' to latj dach. Na' be'nn ka' llayirj ake' Le'e, ka ballel akre' Le'en, bza'y ake' Le'e, bi gokra'll ake' cheje' ga yobre. 43Na'll golle' leake': —Llonen bien cha'a yell ka' yela', lljatixjwe'ra' Di'll Wen ke Diosen', le ke len na' bse'le' nada'. 44Na' ka' toto ga zo yoda'o gan' lladop be'nn Israel ka' doxhen gan' nbane Galilean', lleje' llzejnie're' leake'.

will be added

X\