San Lucas 24

1Ka bllin lla nell ke xhman na', ka le za'te cheni', txhonnj no'r ka', jake' gan' zo broj dan' nak ban', no'x ake' dan' bencha'o ake', dan' la xhix. 2Ka bllin ake' na', bre'e akre' bill da'a yejen' lloa' ban', ba da'ten chla're. 3Ka byo' ake' lo ban', bill ballel akre' kwerp ke Jesúsen'. 4Bixha na' ze ake' llon ake' yel wan ke dan' bill xhoa kwerp ke Jesúsen', kate bllin chop be'nn jasé ake' kwit ake'n, llaktit xhara'n be'nn ka' kwis. 5Blleb no'r ka', na' bche'k xhib ake' llwia akte' rao yore, na'll goll be'nn ka' leake': —To be'nn ban, ¿bixchen llayirjzre' radj be'nn wat ka'? 6Nollno xhoa ganni, ba babane'. Lelljadinra'll kan' nna zorente' re' gan' nzi'i Galilea na', 7bne'e dekz de gake' rallna'a be'nn ka' llwie Le'en, na' got ake' Le'e le' yay cruzen', na' wayónn lla yebane'. 8Na'll jadinra'll no'r ka' xti'll Jesúsen'. 9Na' baza'a ake' lloa' ban', jatixjwe' akre' be'nn chnej ka', na' ren be'nn ka' nak leake' txhen. 10Ki re no'r ka': María be'nn Magdala, Xhuan, na'll María xhna' Jacobo, na' ye to chop no'r yobre, leake'n bdixjwe' akre' postl ka'. 11Na' be'nn chnej ka', llak akre' bi di'll ke nxhian' lloe' no'r ka', na' bi byejle' ake'. 12Na' Pedron' bzolla'doe' byeje' jawie' ban', na' ka blline'n, ra'llen' bchel ake' Jesúsen', na'ze xhoan, na' baze'e llabanre' ka dan' bre're'n. 13Lekze lla na', chop be'nn ka' bnao Le'en, zjake' to yell re Emaús, na' Emaúsen' llgo'nnen ka chonn hor nez sa'llo Jerusalén na'. 14Zjake' lloe' ake' di'll ke da ka' goken. 15Chak zjak ake' lloe' ake' di'llen' ka', kate bllin Jesúsen' jabi'ye' kwit ake'n, na' zejrene' leake' txhen. 16Na' chaokze ben Diosen' nench bi wayombia' akre' Le'e, la'kze llwia akte' Le'e. 17Na'll lle'e leake': —¿Bi di'llen' lloe're chak yo're nezen'? ¿Bixchen zoya'chre? 18To be'nnen' re Cleofas, lle'e Le'e: —¿Bixha tozo' rwe' nako' be'nn zi't zo'o Jerusalén na', bi bnnezro' bi gok do nej nnase? 19Na'll lle'e leake': —¿Bixha gok? Na' bne ake': —Dan' gok ke Jesús be'nn Nazareten', goke' to be'nn be'e xti'll Dios. Be'nn yell bayakbe'e akre' xti'lle'n nsa'n yel wak, na' yeolol dan' bene'n, bene'n kon ren yel wak ke Dios. 20Na' bxoz wnebia' ka', na' be'nn ka' llnebia' neto', ben ake' Le'e rao na'a be'nn ka' llwie Le'en, na' bchoybia' ake' llaya'l gate', na'll bda'a ake' Le'e le' yay cruzen'. 21Neto' lláketo' Le'en gakrene' Israelen', nench bill nnebia' be'nn zi't ka' len. Na' nna' ba zejzen da wyonn lla gok ka'. 22Na' leska' llabáneto' ka di'llen' lloe' no'r ka' non neto' txhen na', byej ake' be'e bale, ka za cheni' gan' bkwa'ch ake' Le'en. 23Na' bill bre'e akre' kwerp ke'en, na' ne ake' bre'e akre' angl ak, na' goll angl ka' leake' nbankze'n. 24Na'll bal be'nn byio ka' nakto' txhen na', byej ake' lloa' ban', na' doxhen kan' ne no'r ka', ka' nakten nono Jesúsen' bre'e akre'. 25Na'll goll Jesúsen' leake': —¡Yichj war kwis nakre, bi llejle're dan' bzoj be'nn ka' be'e xti'll Diosen' kana'! 26¿Kere llian, zga'tek wallayrao Criston', na'tellen' wroe're' yel llnebia' ke'en? 27Na' bzorao llroe're' leake' xti'll Diosen' gan' llian lloe'n di'll ke Le'e. Bxhi'zen yich dan' bzoj da Moisésen', na'll dan' bzoj be'nn ka' be'e xti'll Diosen' kana', bzorao llroe're' leake'. 28Na' llakte ka'n, kate bllin ake' yellen' gan' zjake'n, na' Le'en bene' ka be'nn zej ye ra'te zi'tre. 29Na' go'tyoe akre' Le'e, nench ga'yrene' leake', lle ake' Le'e: —Go'yrén neto', ba wlle' nna', la galte. Na'll go'yrene' leake'. 30Bixha gok, ka blle' ake' gan' gao ake' na', bxhie' yet xtiren', na' be'e yel llioxken ke Dios, na' bxhoxhje'n be'en leake'. 31Kana'll gok ake' ka be'nn baxha' rao, bayombia' akre' Le'e. Na' Le'en to baranze' rao ake'n, bill bre'e akre' Le'e. 32Na'll lle lwellj ake': —To llawé ra'llda'ollon' ke nak za'llo tnezen', llroe're' lli'o kwasro xti'll Diosen'. 33Na' ne akte' ka' baza'do ake' zayej ake' Jerusalén na', ka' ballín ake' gan' lla'a be'nn chnej ka', ren be'nn ka' yela'. 34Na' goll be'nn chnej ka' leake': —Da likzen' babán Xanllon', ba broe'rawe' Simón na'. 35Na' be'nn ka' chop, leska' be'e ake' di'll kan' gok zjake' tnezen', na' kan' gok ka bxhoxhje' yet xtir na', bayombia' akre' Le'e. 36Na' lla'a akte' lloe' ake' di'llen', kate bllinkze Jesúsen' jase'e kllol ake'n, na' bwape' leake' lliox, bne'e: —Cha'chga re' wen. 37Blleb ake' kwis, na' llabán akre', llak akre' cha' llre'da'o akre'n o cha' bxen na' llre'e akre'. 38Na' lle'e leake': —¿Bixchen llebre? ¿Bixchen llakgánere? 39Lewiá ta'ka' ni, na' nia'n, nadkza'n. Lekán nada', ke nak to bxen, bill naken de llit, na' be're kan' naka' nada'n. 40Ka ne'e ka'n, llroe'tere' leake' nie'n na' ta'ke'n. 41Na'll bawé akre' kwis, to llon ake' ka be'nn bi llejle', na' llabán akre' kwis, na'll Jesúsen' lle'e leake': —¿Bi de ra't da gawa'? 42Na'll be'e ake' Le'e ra't belya', na' ra't chi'xh beser. 43Llwia akte' bdawe' da ka'. 44Na'll lle'e leake' da yobre: —Ka' bnetekza' kan' nna zorena' re', dekz de gak kia' kan' nyoj le' ley dan' bzoj da Moisésen', na' dan' bzoj be'nn ka' be'e xti'll Diosen' kana', na' dan' llia le' yich ke Salmos ka'. 45Na'll bene' nench byejnie' akre' xti'll Diosen'. 46Na' bne'e: —Gok kan' nyojkze gak ke Criston', yellayrawe', na' gate', na' yebane' wayónn lla. 47Na'tellen' llaya'l nneze be'nne xti'lle'n, si'zen Jerusalén na', llinte doxhen yellrio nnez akre' llaya'l wayat akre', yebi'ra'll ake' nench yezi'xhen Diosen' ke ake'. 48Na' re' llaya'l we're di'll ke doxhen da ki ba goken. 49Na' wse'la' Spíritu ke Diosen', cho'n lo yichjra'llda'ore, le ka'n bcheb Xa'n. Jerusalén na'ze cha're, kwexhre llinte lla si're yel wak da za'a yebá. 50Na' bchach Jesúsen' leake' Jerusalén na', bllin akte' Betania, na' blis ta'ke'n benla'ye' leake'. 51Bayoll benla'ye' leake'n, na' bayepe' zayejte' yebá, bazi'i Diosen' Le'e. 52Na' be'rao ake' Le'e. Bayoll na', zayej ake' Jerusalén na', llawé akre' kwis. 53Na' bzeteze bze ake' yoda'o braon' lloe'rao ake' Diosen'. Ka'n gakchga.

will be added

X\