San Lucas 23

1Yeolol be'nn ka' lla'n bzolla'a ake', na' bche'e ake' Jesúsen' jwa'a ake' Le'e rao Poncio Pilato, be'nnen' llnebia' Judea. 2Na' bzorao llao ake' xhia, llxoa ake' do'l ko'll Jesúsen' rao Pilaton', ne ake': —Be'nn ni de'e llonchixre' be'nne, na' ll-llone' chixhjto' dan' llnnab Césaren', ne'e le'en Criston', na' nake' to be'nn wnebia'. 3Na'll Pilaton' bnnabre' Le'e: —¿Rwe'n nako' Rey ke be'nn Israel ka'? Na'll ballie' xti'll Pilaton', bne'e: —Kan' bnekzo' na' naka'. 4Na'll Pilaton' lle'e bxoz wnebia' ka', na' be'nn ka' lla'a na': —Ni to da xhinnj bi non be'nnen'. 5Na' yezikre llchie' akre', ne ake': —Llonchixre' be'nne doxhen gan' nbane Judea, bzoraoze' Galilea na'te, na' ba bra'te ganni. 6Ka bene Pilaton' bwa'l ake' Galilea, na' bnnabe' cha' be'nn Galilea Jesúsen'. 7Ka bnnezre' be'nn Galilea Jesúsen', na'll bse'le' Le'e rao Herodes na', le le'en llnebia' Galilean', na' rao lla na' zo Herodes, Jerusalén na'. 8Herodesen' ka bre're' Jesúsen', le bawere', le batna'te llenre' lloe' ake' xti'll Jesúsen', na' le lle'nre' re're' yel wak dan' llone'n. 9Da zan da bnnabre' Le'e, na' bi balli'kze Jesúsen' xti'lle'n. 10Na' le zete bxoz wnebia' ka', na' be'nn ka' llsedre ke ley dan' bzoj da Moisésen', llao ake' xhia llchie' aktekzre'. 11Na' Herodesen' ren waka'a ya ke'e ka', bzorao zi'chi'll ake' Jesúsen', lltitj akre' Le'e. Na' bwakw ake' Le'e to ra'll da llaktit, na' base'le' Le'e rao Pilaton' da yobre. 12Lla na', Pilaton' ren Herodes bani't ake' wen, le kere zo ake' wen na'. 13Na'll Pilaton' batope' bxoz ka', na' be'nn wnebia' ka', na' bal be'nn yell. 14Na' lle'e leake': —Re' badwa're be'nnen' rawa', na' nere llonchixre' be'nne. Llwiátere nga ba bnnabyollre', bibi da xhinnj non be'nnen' ka dan' lltóberen'. 15Ba bse'le' rao Herodesen', leska' bibi da xhinnj bre're' none', bibi do'l ke'e de, da llaya'l gate'. 16Na' wkwa'nne' rallna'a be'nn ka' chintat ake' Le'e, na'll yesane'. 17Na' llonen bien wsane' to be'nne yo' rill ya lla na', kan' llak toto lla lnni paskw. 18Na' be'nn zan ka' lla'n, bzorao llosia' ake' ne ake': —¡Gat be'nnen', na' basán Barrabásen'! 19Barrabásen' yoe' rill ya, le bwiere' be'nn ka' llnebia', bxie' to wdil rao yell, na' bene' xhia. 20Pilaton' lle'nre' wsane' Jesúsen', na' golle' leake' cha' wsane' Le'e. 21Na' be'nn ka', yezikre besia' ake', ne ake': —¡Bde'e le' yay cruz! ¡Bde'e le' yay cruz! 22Da wyonn ras golle' leake': —¿Bixha da xhinnj bene' na'n? Bi nna lljadi'ra' cha' bi da xhinnj bene' da llaya'l gate'. Wsa'kzie', na'll yesane'. 23Na' be'nn ka' ze ake' llchie' akre', na' llosia' ake' llnnab ake' gat Jesúsen' le' yay cruzen', na' ka' da bnez leake' gok. 24Pilaton' bchoyra'lle' gak kan' lle'n akre'n. 25Na' bsane' be'nnen' llnnab ake'n, Barrabásen', be'nnen' bxe wdil, na' bene' xhia. Na' bene' Jesúsen' rallna'a ake', nench gon akre' Le'e kan' lle'n akre'n. 26Na' bche'e ake' Le'e, brej ake' Le'e yell Jerusalén na', na' tnez na', ballay akre' to be'nn re Simón be'nn Cirene zaze'e lyi'xe, na' bda'a ake' yay cruzen' ko'lle', na' noe'n bnawe' Jesúsen'. 27Be'nn zan be'nn yell nao Le'e, na' ren bal no're. Na' bell no'r ka', llak akre' ke nak llwia ake' kan' llon akre' Le'en. 28Na' Jesúsen' bayechje', lle'e leake': —Re' no'r Jerusalén, bi kwellre kia', lekwell ke kwinre, na' ke xhi'nnre. 29Le wllin lla kate nne ake': “Nbaraz ke no'r will, na' no'r bi bxhan, na' bi zo xhi'nne' llwa'lle'.” 30Kana' to nnab ake' bix ya' ka' kwenen leake', na' to nnab ake' ka' bdinnj nench kwa'chen leake'. 31Cha' ki llon akre' nada', naka' ka yay ya', gon aktellre' re', nakre ka yay yeche. 32Leska' nche'e ake' ye chop be'nn wen da xhinnj got ake'. 33Ka bllin ake' latj gan' nzi'i Llit Yichj Be'nn Wat, na' bda'a ake' Jesúsen' le' yay cruzen', ren be'nn wen da xhinnj ka' ye chope, bda'a ake' leake' chla' weje. 34Kate bne Jesúsen': —Xa, bxhi'xhen ke be'nn ki, le bi nnez akre' bin' llon ake'. Na' bditjen ake' xhara'ne'n, llwia ake' nara'chk noren' llaya'l toto ake'. 35Be'nn zan ka', ze ake' zi'tre llwia ake', na' be'nn ka' llnebia' Israelen', leska' ren ake' lltitj akre' Le'e, ne ake': —Be'nn yobre basre'e, yesrachke kwine' nna', cha' le'en nak Criston' bse'l Dios. 36Leska' waka'a ya ka', lltitj akre' Le'e, lljabi'y ake' lljazé ake' zo zichj lloe', 37na' lle' ake' Le'e: —¡Cha' rwe'n Rey ke be'nn Israel ka', basrachk kwino'! 38Na' bllia ake' di'll yichj cruzen', nen: “Be'nn nin' Rey ke be'nn Israel ka'.” Llian di'll griego, na' di'll latín, na' di'll hebreo. 39To be'nn wen da xhinnj ka', da'a le' yay cruzen', leska' lla'dyie' Jesúsen', ne'e: —¡Cha' rwe'n Criston' basrá kwino', na' basrá ren neto'! 40Na' be'nn lwellje'n ye to, benre' le'e znia, lle'e le'e: —Rennriz rwe' nne'o, na' bi llapo' Diosen' bara'nne, llwiate'o leska'n ba da'llo ganni gatllo. 41Lli'o da'llo ganni llallayraollo, le ka' llaya'l gakse kellon', le da xhinnjen' benllo, zan be'nn ni, bibi da xhinnj bene'. 42Na'll golle' Jesúsen': —Lljadinra'llchgo' nada' katen' za'o nnebia'on. 43Na'll Jesúsen' golle' le'e: —Da li llnia' rwe', nna' llate sereno' nada' latj wen gan' zo Diosen'. 44Kan' bllin wawillen', gok xchol rao yellrion' bllinte do lladá chonne. 45Bill bnna' willen', na' ra'll dan' ze lo yoda'o Jerusalén na', blle'zen goken chopre. 46Na'll Jesúsen' besie' zillj, bne'e: —Xa, llona' rallna'o Spíritu kia'n. Ka bayoll bne'e ka'n, gote'. 47Na' ze be'nnen' nak xan waka'a ya ka', ka bre're' kan' goken, be'rawe' Dios bne'e: —Da likze be'nn wen be'nnen'. 48Be'nn zan ka' lla'a llwian', ka bre'e akre' dan' goken, baza'a ake' llba'll lcho' ake'. 49Na'll be'nn ka' nombia' Jesúsen', ren no'r ka' nao Le'en Galileate, ze akte' zi'tre llwia ake' kan' llaken. 50To be'nn re José be'nn Arimatea, yell ga nbane Judea, nake' txhen be'nn ka' llnebia' Israelen', na' nake' be'nn wen, be'nn wen da zej lixheje. 51Bzoteze' brexhe' katen' wroe' Diosen' yel llnebia' ke'en, na' bi bene' txhen lwellje' ka', ke nak dan' ben ake'n. 52Byeje' rao Pilaton' jannabe' kwerp ke Jesúsen'. 53Na' baletje' Jesúsen' le' yay cruzen', na' bra'lle' Le'e to xchan, na' bkwa'che' Le'e. Broe' Le'e to lo ba kob, to broj da bene' le' yej ga nono nna lljacho'. 54Naken lla llsinia' ake' ke lnnin', na' le llinte lla nba'nne. 55Na' no'r ka' za'a ren Jesúsen' Galileate, bnaorén ake' be'nn ka' nlen Jesúsen', na' bre'e aktere' gan' bro' ake' Le'en, na' kan' bxoa ake' kwerp ke'en. 56Bde na', baza'a ake' jencha'o ake' za da la xhix, na' nis da la xhix da wtop ake' kwerp ke Jesúsen'. Na' le byo' akte' lla nbane ke be'nn Israel ka', na' bazi'ra'll ake' kan' ne leyen'.

will be added

X\