San Lucas 22

1Bixha ba zo rez ga'l lnni dan' ne paskw Jerusalén na', katen' llao ake' yet xtir dan' bi nchix kwa binn. 2Na' bxoz wnebia' ka', na' be'nn ka' llsedre ke ley dan' bzoj da Moisésen', bzorao llyirjla'll ake' akre gon ake' nench got ake' Jesúsen', le lleb ake' be'nn yell. 3Na' daxi'on byo'n yichjra'llda'o Judas, be'nnen' nsi'i ake' Iscariote, be'nnen' nak txhen be'nn chllinn ka'. 4Na'll byeje' je'rene' bxoz wnebia' ka' di'lle, na' ren be'nn ka' nak xan be'nn ka' llap yoda'on, kan' gone' Jesúsen' rallna'a ake'. 5Bawé be'nn ka' kwis, na' be'e ake' di'll we'e ake' le'e mell. 6Judas na' bchebe' wdie' Jesúsen' rao na'a ake', na' bzorao lli'nawe' ga't latj gone' Le'e rao na'a be'nn ka', kate bi gakbe'e be'nn yell. 7Na' ka bllin lla, ka llao ake' yet xtir dan' bi nchix kwa binn, na' leska' llot ake' xhi'r kan' lla'l lnni Paskw. 8Jesúsen' bse'le' Pedron' ren Juan na', lle'e leake': —Lechej lelljén xhnid, lelljasinia' dan' gaollo lnni paskwn'. 9Na'll goll ake' Le'e: —¿Gaxha lle'nro' lljasinia'to'n? 10Na' lle'e leake': —Kate cho're yellen', na' walláyere to be'nne zanzoe' to lle' nis xhichje', lennawe', kon ga cho' le'e, ganna' cho're. 11Kate cho'ren', leyé xan yo'n: “Maestron', ne'e: ¿Ga zo yo' gan' gaoto' xche', ren be'nn ka' non nada' txhen lnni paskw ni?” 12Na' wroe're' re' to yo' da zo chkwia, na' ba de yeolol da ka' yálljellon', ganna' wsinia're dan' gaollon'. 13Na' bza'a ake', gokte kan' golle' leake'n, na' bsinia' ake' dan' gao ake'n. 14Ka bllin gao ake' xche'n, blle' Jesúsen' ren postl ke'e ka'. 15Na' golle' leake': —¡Le ba bzera'llkaza' gaorena' re', lnni paskwn' ka za gata'! 16Ni llnia' re', zerao nna' llaorena'n re'. Kate ba gok doxhen dan' llroe'ra' ni, na' ba llnebia' Diosen', kana'll gaorena' re' da yobre. 17Na' be'xe' leo da'on, be'e yel llioxken ke Dios, bne'e: —Lesi'i da ni, na' leye'j ra't wejen yeololre. 18Llnia' re', zerao nna' lle'ja' xis uvan', llinte lla kate ba llnebia' Diosen'; kana'll yeye'ja'n da yobre. 19Na'll bxhie' yet xtiren', na' be'e yel llioxken ke Diosen', na'll bxhoxhje'n be'en leake', na' bne'e: —Da nin' naken kwerp kia', ke nak nna' llsanra'lla'n ni ke re', ka' gonre gaoren nench lljasa'ra'llre nada'. 20Na' ka badawe' xche'n, be'xe' leo da'on bne'e: —Dan' yoll lo leo da'o ni, naken to da llroe'n, nna' sorao to da kob, dan' bcheb Diosen' gakrene' re', ke len na', larj xchena'n nench gaken da li. 21Be'nnen' gon nada' rallna'a be'nn ka' got nada', leska' rawe gan' lli'llo ni, nxoa ta'ke'. 22Da li, nada', Be'nnen' Gorj Radj Be'nnach, ba naksen gak kia' ka', zan nya'chraz ke be'nnen' gon nada' rao na'a be'nn ka' got nada'n. 23Na' be'nn ka' non Le'e txhen na', bzorao llnnabe lwellj ake', nor ake'n gon Le'e rallna'a be'nn ka' llwie Le'en. 24Leska' bzorao lloe'rén lwellj ake' di'll, noren' gakll be'nn brao. 25Na'll lle Jesúsen' leake': —Be'nn ka' llnebia' toto yell xhen, llawé akre' gon be'nn ka' kon da nez leake', na' leska' llawé akre' nne be'nne, nak ake' be'nn wen. 26Zan re', bi gonre ka', be'nnen' ye'nzre' gake' be'nn brao, llaya'l gake' ka be'nn bibi nneze, na' be'nnen' ye'nzre' nnebie' radjren', llaya'l gake' ka to be'nn wen llin keré. 27Lennechk, ¿nore be'nnen' nak be'nn brao, be'nnen' lli' llao na', o cha' be'nnen' llsinia' dan' gawe' na'n? Nakbie'kze be'nnen' lli' llao na', nak be'nn brao. Zan nada' zia' ganni ka be'nn wen llin keré, na' zia' nench gakrena' re' biteze da gak keré. 28’La'kze biteze da ba gok kia', re' ba bzerenre nada'. 29Leska' gona' nench nnebia're katen' gonn Xa'n yel llnebia' ke'en nada', 30nench kwe'renre nada', na' ye'j gaollo txhen katen' ba llnebia'n, leska' gona' to latj ga kwe're nench gonre yel koxchis, na' wchoybia're ke be'nn Israel ka'. 31Leska' goll Xanllon' Simón Pedron': —Simón, Simón ba bnnab daxi'on nench gonre'ren re', gonen re' ka llon be'nn llrobe trigo. 32Nada' ba bnnaba' rao Dios gakrene' rwe' nench bi gakganro', na' kate ba beno' gan na', gakrenchgo' be'nn bi'cho' ki. 33Na'll Pedron' lle'e Le'e: —Xana', ba bchoyra'lla' kere lo rill yaze sa'rena' rwe', gatrentekza' rwe' chet ka'. 34Na'll lle'e Pedron': —Pedro, llnia' rwe', bire nne kwell lekwn' nna' lle', llinte gak chonn ras bi we'o di'll nombia'o nada'. 35Na' lle Jesúsen' be'nn ka' non Le'e txhen: —Kan' bse'la' re', ka'n bibi be'xkzre, ni mell, ni bzod, ni ye chkwe' xher-re; lennechk, ¿bi byálljere? Na' lle ake' Le'e: —Bitbi byálljeto'. Na'll bne'e: 36—Zan nna', cha' re' de mell keré, lewa'n; leska' cha' napre bzod, lego'xen; na' re' bi napre spad, lego't no xherk keré, na' lesi'i ton. 37Le llnia' re', dekz de gak kia' kan' nyoj xti'll Diosen' gan' nen ki: “Ben akre' le'e ka llon akre' be'nn wen da xhinnj.” Le dan' nyoj gak kia'n dekz de gaken. 38Na'll bne be'nn ka' nao Le'en: —Xanto', na' de chop spad. Na' lle'e leake': —Ba gokse to kate. 39Na' blloj Jesúsen' zeje' ya'n gan' nzi'i Ya' Olivos, ka llonkze', na' be'nn ka' non Le'e txhen bnao ake' Le'e. 40Ka bllin ake' latjen', lle'e leake': —Lewalwill Diosen' nench ke gon da xhinnjen' re' gan. 41Na'll Le'en bdete' zeje', ke to ga llin to yej da llza'l-llo, na' bche'k xhibe' balwille' Diosen', 42bne'e: —Xa, cha' rwe' lle'nro', benchga bi wallayrawa', zan bi gak kon ka nnia' nada', gak kan' nnekzo' rwe'. 43Na' betj to angl za'a yebán' blline' gan' nche'k xhibe'n, na' btipra'lle Le'e. 44Na' llallayrawe' kwis llake yichjra'llda'we'n, na' llalwille' Diosen', kate bzorao llayaklolje', na' nis yes ke'en naktekzen llen ll-llonen rao yon'. 45Bixha ka bayoll be'rene' Diosen' di'llen', bazolle'e. Ka balline' gan' ni't be'nn ka' non Le'e txhen na', jadi're' leake' tas ake' dan' llak akre'. 46Na'll lle'e leake': —¿Bixchen tasre? Lechas, na' lewalwill Dios nench ke gon da xhinnjen' re' gan. 47Na' zete Jesúsen' lloe' di'llen', kate bllin Judas be'nnen' nak txhen ren be'nn chllinn ka', nche'te' be'nn zan, na' jabi'ye' kwit Jesúsen' bno'pe' Le'e. 48Jesúsen' golle' Judasen': —Judas, ¿llno'pte'o nada', Be'nnen' Gorj Radj Be'nnach, nechkze gono' nada' rallna'a be'nn ka' llwie nada'n? 49Bixha ka bre'e be'nn ka' nao Le'en, go'x ake' Le'en, bne ake': —Xanto', na' de spad, ¿wzoyibllo? 50Toe' bdine' spad ke'en, bchoyte' yid nay cha'we be'nn wen llin ke bxoz braon'. 51Na' goll Jesúsen' le'e: —Bi gono' ka'. Na'll bdane' nay be'nnen', na' bayake'n. 52Na'll goll Jesúsen' bxoz wnebia' ka', na' be'nnen' nak xan be'nn ka' llap yoda'o braon', na' be'nn gor brao ke be'nn Israel ka', zjake llje'x Le'en: —Ka be'nn llje'x to be'nn wan, za're no'xre yay na' spad. 53Yeo lla blle'rena' re' yoda'o braon', na' bi be'xre nada', zan nna' bllin lla gak kan' lle'neren', nna' nnebia' da xcholen'. 54Na' be'x ake' Jesúsen', na' bche'e ake' Le'e rill bxoz braon', Pedron' bnawe' Le'e zi't zi't. 55Be'nn ka' bxhen ake' to yi' xhen lia' ke bxozen', na' blle'rén Pedron' leake' lloa' yi'n. 56To no'r nak wete, ka bre're' Pedron' llie' lloa' yi'n, na' bwie' le'e, na' bne'e: —Be'nn ni leska' nake' txhen Jesúsen'. 57Na' Pedron' bi bchebe', na' bne'e: —No're, bi nombia' be'nnen'. 58Gok choll kate be'nn yobre bre're' le'e, na' bne'e: —Renkze rwe'n nako' be'nn ka' txhen. Na'll bne Pedron': —Be'nne, bi nak ake' txhen. 59Bixha ka gok choll kate be'nn yobre bne'e: —Da likze, be'nn nin' nake' txhen ren Jesúsen', le nake' be'nn Galilea. 60Na' Pedron' golle' be'nnen': —Be'nne, bi nnezra' bi di'llen' lloe'o. Na' nete' ka'n, kate le bllellte lekwn'. 61Xanllon' le bayechjte' bwie' Pedron', na' jadinra'll Pedron' kan' goll Jesúsen' le'e: “Bire nne kwell lekwn' nna' lle', llinte gak chonn ras, bi we'o di'll nombia'o nada'.” 62Pedron' balloje' gan' lla'a be'nn ka', da xhen gokre', na' bllelle' kwis. 63Be'nn ka' llap Jesúsen', bzorao lltitj akre' Le'e, na' llon ake' zi' ke'e. 64Bchej ake' to ra'll rawe'n, na' llba'll ake' yichjrawe'n, na' lle ake' Le'e: —Banneya'chk, ¿non' bra'll rwe'? 65Na' da zan da lle ake' Le'e, lla'dyi' ake' Le'e. 66Ka byeni'n, badop be'nn gor brao ke be'nn Israel ka', na' bxoz wnebia' ka', na' be'nn ka' llsedre ke ley dan' bzoj da Moisésen', na'll goxh ake' Jesúsen' gan' ze ake'n, le leake'n llon yel koxchisen'. Ka blline'n lle ake' Le'e: 67—Bne cha', ¿rwe'n Criston'? Cha' rwe'n, bne neto' kwasro. Na' lle'e leake': —Chenak nnia' re', ni ke chejle'zre. 68Chenak nada' wnnabra' re', ni ke yelli'zre xti'lla'n, ni ke yesanzre nada'. 69Na' soraozen nna', Be'nnen' Gorj Radj Be'nnach lljachie' kwit Diosen', be'nn nak yel wak xhen. 70Yeolol ake' goll ake' Le'e: —¿Rwe'n Xhi'nn Diosen' cha'? Na'll bne'e: —Re'n nere ka', na' ka'n naksen. 71Na'll bne ake': —Nollno be'nn yálljello gao xhia ke'e; kwinllo ba bénello kan' bne'en.

will be added

X\