San Lucas 21

1Ka zo Jesúsen' yoda'on, bre're' ka llgo' be'nn wnia' ka' mell dan' lldop lo yoda'on. 2Leska' bre're' ka bllin to no'r ya'ch no'r wazeb, broe' chop mell da'o. 3Na'll bne Jesúsen': —Da li llnia', no'r wazeb ya'ch ni, da xhenll ba broe' kerke yeolol be'nn ka' yela'. 4Le bro' ake' da ba bgo'nn billbi de gon akre'n, zan ka nak no'ren', rao yel ya'ch ke'en be'e ka da lallibe de ke'e. 5Na' bal be'nn ka' lla'n, lloe' ake' di'll katek nbaraz nak yoda'o braon', na' ka wallajllo nak yej ka' naken na', na' billre da non len nbaraz da lloe' ake' ke yoda'on. Na' bne Jesúsen': 6—Ka nak da ka' llre're nga, wllin lla kat ni to yej ki zjankwa'a ganni, no'x lwellje bi yega'nnen. Yeololen yeyinnj aken. 7Na'll bzorao llnnab akre' Jesúsen', lle ake' Le'e: —Maestro, ¿baten' gak ka'? ¿Bixha gak katen' ba zo rez gak kan' bne'on? 8Na'll lle'e leake': —Lewiá ke nench ke no siye'z re', na' ka're nez yobre, le be'nn zan be'nn wxhiye'e ra', na' nne ake': “Nada'n Criston'”, na' “Ye chollze le yellayraote be'nn lla'a yellrion'.” Bi chejle're ke ake'. 9Kate yénere gak wdile, na' yénere do ga yobre ba llak wdil, bi llebre, da llaya'l gakse da ki, na' ker le wayollte yellrio na'n. 10Na'll bne'e: —Na' til to yell ren ye to yell, na' yell xhen ren ye to yell xhen. 11Na'll xo' gateze, na' gak win, na' ra' yillwe', na' be'nn ka' lleb ake' kwis kan' gaken, na'll biteze gak le' yebán' da yebán akre'. 12’Na' ka za gaktere da ki, go'x ake' re', na' si'chi'll ake' re', na' xobxexj ake' re', wche'e ake' re' ga zo no yoda'o ga lladop ake', na' ko' ake' re' rill ya, na' lljwa'a ake' re' no rao rey, rao koxchis, ni ke dan' nxenra'llre nada'. 13Ka nake gon ake' ka', na' ga't latj we're xti'lla'n. 14Bi gonre xhbab akre ka nnere, kate llinre rao be'nn wnebia' ka', 15nada' gonna' di'll, na' gonna' re' yel si'n nench gak walli're xti'll ake'n, ni ke no soeze re'. 16Na' dan' llebraz wie akre' re'n, kwin xaxhna're, bi'chre, bi'ch lwelljre, na' be'nn ka' nonre txhen, gon ake' re' rallna'a be'nn ka' llwie re'n, na' balre got ake'. 17Yeolol be'nn wie akre' re', ni ke dan' nxenra'llre nada'n, 18zan ni to yich yichjre bi kwiayi' rao Dios. 19Lesé war, na' legap yel llxhenra'lle, na' gonre gan. 20’Kate re're ba lla'a waka'a ya ba nechj ake' Jerusalén na', nnézello ba zo rez kwiayi'n na'. 21Re' lla'a gan' nbane Judean', lewxhonnj lechej ya' xhen, na' re' lla'a Jerusalén na', lellache; re' zej lyi'xe, bi ye'nzere wayo're yell. 22Le ba bllin lla yellayrao be'nn ka', na' soa di'll kan' nyoj xti'll Diosen'. 23¡Nya'chraz ke no'r noa' bda'o, na' no'r nka' bda'o kana'! Doxhen rao yellrion' wallayrao be'nne, na' yeolol be'nn ka' lla'a gan' nbane Judean', Diosen' gone' yellayrao ake'. 24Be'nn zan gat rao wdilen', na' be'nn zan wchach ake', na' wche'e akte' leake' rao yeolol yell xhen ka' zjalli' rao yellrion', na' be'nn zi't bi nak be'nn Israel, cha'a ake' wrejchekw ake' Jerusalén na', llinte lla bill nnebia' be'nn ka' bi nak be'nn Israel. 25’Na' bi gak bi nne le' yebán', willen', be'on na' berj ka', na' be'nn ka' lla'a rao yellrion', to gak ake' tore le llebraz lleb ake' ka yen akre' gon nisda'on llakia, ka nak wlis be'n len. 26Na' dan' lleb ake'n, to gatzi ake' kan' gak rao yellrion', le kana' wroe'rao doxhen yel wak da bi na' re'llo le' yebán'. 27Na'tellen' re'e akre' Be'nnen' Gorj Radj Be'nnachen', ze'e to lo bej nse'e yel wak xhen ke'en, na' beni' xhen ke'en. 28Kate ba bzorao llak da ki, legondipra'lle, na' leyewé le ba zo rez yesrá Diosen' re'. 29Na'll bsa'krebre' llroe're' leake': —Lewiá ke yay higo, na' biteze yay, 30kate ba llaga' xhla'yen, na' llakbe're ba zo rez cho're rao ba. 31Leska'kzen', katen' ba llre're llak da ka' ba bnia' ni, ba nnézere ba zo rez nnebia' Diosen'. 32’Da li llnia' re', be'nn ka' lla'a nna', nna nban akte' kate sorao gak da ki. 33Ka nak yebán' ren yellrion' wllin lla kat te ke, zan ka nake xti'lla'n kere da te ke ka'zen'. 34’Na' lewiá, ke ye'j gaoxenre, sollere, na' kwiare ria, na' cho' yichjre chraoze da de rao yellrion', na' bi gakbe're katen' llin llan'. 35Ka llak ke to bayi'x da'o, ni ke llakbe'zeba' lljabixba' ga lldo'lba', kan' gak ke be'nn ka' lla'a rao yellrion'. 36Lewnna' yere, lewalwill Diosen' nench gakrene' re' katen' llin lla na', na' gak wallinre lljazere rao Be'nnen' Gorj Radj Be'nnach. 37Ka', yeo lla, Jesúsen' llzejnie're' be'nn ka' do lia' yoda'o braon', na' yeo lle' llayejte' ya' gan' nzi'i Ya' Olivos. 38Na' kate lleni' be'nn zan lladop yoda'o braon', na' lljazejnie're' leake'.

will be added

X\