San Lucas 20

1Gok to lla ka llzejnie' Jesúsen' be'nn ka' yoda'o braon', llroe're' Di'll Wen ke Xanllo Diosen', kate bllin bxoz wnebia' ka', na' be'nn ka' llsedre ke ley dan' bzoj da Moisésen', na' be'nn gor brao ke be'nn Israel ka', 2lle ake' Le'e: —Bnechk neto', ¿bi yel llnebia' napo' llono' da ki? ¿No benn yel llnebia'n llono'n? 3Na'll balli'i Jesúsen' xti'll ake'n, bne'e: —Leska' nada' wnnabra' re', lennechk, 4¿non' bse'l Juan be'nnen' bchoa nis? ¿Diosen' bse'l le'e o cha' nollre be'nnachen'? 5Na' bzorao lloe'rén lwellj ake' di'll, ne ake': —¿Akxha nnello? Cha' nnello Diosen' bse'l le'e, na' ye'e lli'o: “¿Bixchen bi byejle're ke'e cha'?” 6Cha' nnello lwellj be'nnkzllon' bse'l le'e, nxholl wchekw be'nn ki lli'o yej, le ne ake' Juan na'n goke' to be'nn bse'l Dios. 7Na'll goll ake' Jesúsen' bi nnez akre' no bse'l Juan na'. 8Na'll lle Jesúsen' leake': —Leska' nada', bi nnia' non benn nada' yel llnebia'n nench llona' da ki. 9Na' bne Jesúsen' to di'll llzejnie're' be'nn ka' lla'a llzenay xti'lle'n: —To be'nne, goze' lba uvas rao yellrio xhen ke'en, na' bene'n rallna'a be'nne, na' broe' nez zeje' ga yobre ga jasoe' scha. 10Ka bllin lla llalis be'nn ka' da ka' llaz ake'n, be'nnen' nak xane'n bse'le' to be'nn wen llin ke'en, nench wazie' ke to da llaya'le'. Na' ka bllin be'nnen', ben ake' zi' ke'e, na' bibi be'e ake' le'e. 11Na'll be'nnen' bse'le' ye to be'nn wen llin ke'e be'nn yobre, leska' go'dyi' ake' le'e, na' ben ake' zi' ke'e, na' bibi be'e akse' le'e. 12Na'll bse'lkze' be'nn yobre, na' bentat ake' zi' ke'e, ben akte' le'e we'e, jaza'l akte' le'e latj yobre. 13’Na'll xan yellrion' bne'e: “¿Akxha gona' nna'? Wse'lcheka' xhi'nna' bin' nllie'ra' na', cheke gap akebe' bara'nne.” 14Bixha be'nn wen llin ka', ka bre'e akre' xhi'nn be'nnen', lle lwellj ake': “Be'nn nin' xhi'nn xan yellrion', le'en llaya'l si'i bien na', ledá gotlloe', na' gak dan' kello.” 15Na' brej ake' le'e lo re'jen', na' bet ake' le'e. Na'll bne Jesúsen': —¿Akre llákere, akre gon xan yellrion' ke be'nn ka' llon llin rao yellrion'? 16Cheje', na' lljete' leake', na' gone' yellrion' rallna'a be'nn yobre. Ka bayoll bene be'nn ka' ka di'llen', bne ake': —¡Dios gakrene' lli'o bi gonllo ka'! 17Na'll Jesúsen' llwiateze' leake', bne'e: —¿Ka akxha chejnie'llo gan' nyoj xti'll Diosen', nen ki?: Yej dan' bi byo'ra'll be'nn wen yo' ka', gonrén ake' llin, len na' ba naken yej skin. 18Be'nn bixe, na' lljago'nne' rao yejen', gachjtine', na' be'nnen' cha' yej na' bixen wxejen le'e, wxhoxhjtinten le'e. 19Bayoll bne Jesúsen' ka', bxoz wnebia' ka', na' be'nn ka' llsedre ke leyen', le gokra'll akte' go'x ake' Le'e, le byejnie' akre' ni ke leake'n be'e di'llen' ka', na' blleb ake' be'nn yell. 20Na' bse'l ake' be'nn blle'nao Le'e, be'nn ben ka llon Le'e txhenre, nench na' kwe'nao ake' cha' bi di'll lloj lloe', na' sa'ke gon ake' Le'e rallna'a be'nn wnebia'n. 21Na' be'nn ka' goll ake' Jesúsen': —Maestro, nnézeto' lloe'o di'll li llroe'ro' lixheje, na' toz ka llono' ren noteze be'nne, na' llzejnie'ro' kan' nak xhnnez Diosen'. 22Lle'neto' nnézeto', ¿naken wen chixhjto' dan' llnnab be'nnen' le zeraoze nak wnebia', be'nnen' llia Roma o cha' bi naken wen? 23Na' Jesúsen' bayakbe're' kere do ra'll ake'n llnnab ake', na'll lle'e leake': —¿Bixchen lle'nzere gonre're nada'? 24Lewroe' nada' to xhmellren'. Ka be'e ake' Le'e mellen', na' bne'e: —¿Noxha raon' da'a le' mell ni? ¿No ran' nyoj le ni? Na'll bne ake': —César be'nnen' llnebia' Roma na'n. 25Na'll lle'e leake': —Da nake ke César lewayoe'n le'e; na' da llaya'l we're Dios, lewe'n Dios. 26Na' bi llakse gon ake' lloj to di'll krere lloa' Jesúsen' rao be'nn ka' lla'n, na' llabán akre' kan' llallie' xti'll ake'n, llazé akte' llize. 27Na'll bllin bal be'nn ka' nzi'i saduceo, be'nn ka' bi llejle' yebán be'nn wat ka'. Na' goll ake' Le'e: 28—Maestro, dan' bzoj da Moisésen', ganna' nllian bia'a, cha' to be'nn wchayne'e, na' gate', na' nono xhi'nne' bzo, to be'nn bi'che' wazie' no'ren' nench wazó lo raz be'nn waten'. 29Ki gok bzo gall be'nne, be'nn nellen' bxhie' no'ren', na' gote' bi bzo xhi'nne'. 30Na'll bi'che', be'nn wllopen' bazie' no'ren', na' leska' gote' nono xhi'nn ake' bzokze. 31Na'll be'nn wyonne bazie' no'ren', leska' gote', na' ka' yeolol ake' bzorén no'ren', na' yeolol ake' got, ni to xhi'nn ake' bi bzo. 32Na'll got ren no'ren'. 33Kate llin lla yebán be'nn wat ka', ¿nore be'nn ki gakse be'nn ke no'ren', le yeolole'n bzorén le'e? 34Na' goll Jesúsen' leake': —Be'nn ka' lla'a rao yellrio ni, llchayna'a ake', na' llchayna'a no xhi'nn ake'. 35Zan ka nak be'nn ka' ba nbej Diosen' nench yebán ake', na' yellín ake' yebán', kere wchayna'll be'nn ka', na' nollno wchayna'kze. 36Le kere na' gat ake' da yobren', ka angl ke Diosen' wayak ake', gak ake' xhi'nn Dios dogarje, le ke len na' ba basbane' leake'. 37Ka nak dan' de yebán be'nn wat ka', kwin da Moisésen' bzejnie're'n ka nak bzoje' kan' balwill Diosen' le'e to lo xhis ye'che, na' bne Diosen' nake' Dios ke Abraham, Dios ke Isaac na' Dios ke Jacob, le nban be'nn kin', na'llen' bne'e ka'. 38Ka nak Diosen', bi nake' Dios ke be'nn wat, Dios ke be'nn ban na' nake', na' yeolol be'nn nxenra'lle' Diosen', la'kze ba got ake', nban akse' rao Le'e. 39Na' bal be'nn ka' llsedre ke ley dan' bzoj da Moisésen', goll ake' Le'e: —Da li kan' bne'on, Maestro. 40Na' bill bayaxhj akre' wnnab akllre' Le'e billre da yobre. 41Na' lle Jesúsen' leake': —¿Bixchen ne akze', Criston' nake' xhi'nn da rey Daviden'? 42Rencha' kwin Daviden' bzoje' le' yich ke Salmos ki: Xanllo Diosen' golle' Xana'n: “Blle' kwita'n, 43llinte lla ka gona' yeolol be'nn ka' llwie rwe'n, nni't ake' xhnia'on.” 44Cha' Daviden' bne'e Criston' nake' Xane', ¿akxha gakze Criston' xhi'nn dialla ke Daviden' chet ka'? 45Be'nn zan lla'a llzenay xti'll Jesúsen', na'll golle' be'nn ka' non Le'e txhen na': 46—Lewiaya'nn kan' llon be'nn ka' llsedre ke ley dan' bzoj da Moisésen', llawé akre' llak ake' to ra'll tonn, na' llawé akre' gap be'nn leake' bara'nne do tnez, do lao ya'a, na' do lo yoda'o. Leska' ga llak no wao, ll-lan ake' ga ba nak kwe' be'nn brao. 47Na' llka'a ake' rill no'r wazebe, na' da llde' akre', scha llze ake' kate llalwill ake' Diosen' nechkze ten ka'ze. Da xhen da de sa'kzi' be'nn ka' kan' llon ake'n.

will be added

X\