San Lucas 2

1Gok kan' llnebia' be'nnen' re Augusto César gan' nzi'i Roma, bdixjwe're' llaya'l kwia yich, yeolol be'nn ka' lla'a doxhen gan' nbanre'n. 2Na' naken da nell kwia be'nn yiche. Le kana' be'nnen' re Cirenio, llnebie' gan' nzi'i Siria. 3Na' bene'n bien yeolol be'nn bayej rall ake', jallia ake' yiche. 4Na' Josén' bze'e Nazaret ga nbane Galilea, na' bayeje' Belén ga nbane Judea yell ke David, le xhi'nn dialla David na' le'e. 5Zanche'te' Marían' nench kwia ake' yiche, ba naken si'i lwellj ake'. Na' ba noa' Marían' bda'o. 6Na' zo akte' Belén na', bllin lla sane'. 7Na' gorj bda'o ke'en, gokbe' bida'o byio, bi nelle, na' bra'llebe' to ra'lle, na' jaxoe'be' gan' ll-lla'a ake' da llao bayi'xe, le bibi latj bllel akre' ga we'e ake' wazi'ra'll ake'. 8Rao yer na', awllo Belén na', lla'a bal be'nn llnna' ake' yer, llap xhi'r ke ake'. 9Kate to angl ke Xanllon' blline' gan' lla'a ake'n, to yi' xhen bseni'n gan' lla'a ake'n, na' blleb ake' kwis. 10Na' anglen' golle' leake': —Bi llebre, na' llyixjwe'ra' re' to da wen, da wayo'ra'll yeolol be'nne. 11Nna' gorj to wasrá, gorje' rao yell ke David, na' re'e Cristo be'nn nak Xanllo. 12Cha' chejre, ki nak nench yellélere bda'on: llelbe' to ra'll, na' xhoabe' ga ll-lla'a ake' da llao bayi'x ake. 13Nna nete anglen' ka', kate bllinkze angl zanll gan' ze anglen' to, na' angl zan ka', lloe'rao ake' Dios ne ake': 14¡Dowe'rao Dios be'nn zo yebá! ¡Na' be'nn ka' lla'a rao yellrion', cha'a akchgue' xhbab wen, na' ka' bibi wdil kwe'! 15Ka baza'a angl ka' zayej ake' yebá, gop xhi'r ka' lle lwellj ake': —Chejkello Belén na', lljawiallo bixhan' gokse, ka dan' bdixjwe' Xanllon' lli'o. 16Na' bro'do ake' nez, ka bllin ake'n, na' jadi' akre' Marían' ren Josén' ren bda'on, xhoabe' gan' ll-lla'a ake' da llao bayi'x ka'. 17Ka bre'e gop xhi'r ka' bda'on, bzorao lloe' ake' di'll doxhen kan' goll anglen' leake' ke bda'on. 18Yeolol be'nn ka' bene di'llen' lloe' ake'n, llabán akre' kwis. 19Marían' bro' yichje' kan' bne be'nn ka', na' llone' xhbab lo ra'llda'we'. 20Bde na', zayej gop xhi'r ka', lloe'rao ake' Dios kon ba jawiá ake', na' ba ben aktere' kan' goll anglen' leake'. 21Ka gok xo'n lla na', bzoe' bda'on sen dan' nzi'i circuncisión, na' bsi'i akebe' Jesús, kan' goll anglen' leake' ka za garjterbe'. 22Bde ba bayak Marían' ren bda'on yall kon kan' ne ley dan' bzoj da Moisésen', na' jwe'ebe' yoda'o Jerusalén na', ga gakbe' rallna'a Dios. 23Le kan' ne ley ke Xanllo Diosen': “Noteze bida'o byio garj bi nelle, da bien na' gakbe' rallna'a Dios.” 24Na' byej ake' be'rao ake' Dios, ben ake' kan' ne ley ke'en, gan' nen ki: “Llaya'l gotre chop plom xtir o cha' chop plom yi'x da'o.” 25Na' Jerusalén na', zo to be'nn re Simeón, na' nake' to be'nn wen, na' nxenra'lle' Dios, bzoteze bzoe' brexhe' katen' llin lla gakrén Diosen' be'nn Israel ka', na' zorén Spíritu ke Diosen' le'e. 26Spíritu ke Diosen' bdixjwe'n le'e ke za gattere', dekz de re're' Cristo be'nnen' wse'l Diosen'. 27Leska' Spíritu na', benen nench byeje' yoda'o braon'. Yoda'o na' zoe' kate bllin xaxhna' Jesúsen' gon ake' kan' ne ley ke Diosen'. 28Simeón na' bnnabe' bida'on bde'lebe', na' be'rawe' Diosen' bne'e: 29Ba gokse nna' Dios kia', bazi'chga nada' wen, naka' be'nn wen llin ko'o, kon ka di'llen' be'reno' nada'. 30Rawa' ki nna' llre'ren be'nnen' yesrá neto'n. 31Na' ba beno' to da re'te be'nn zan. 32Bida'on gakbe' beni', nench chejnie' be'nn bi nak be'nn Israel, na' Lebe' gon nench si'i yell ko'o Israelen' yel bara'nn xhen. 33Na'll xaxhna' Jesúsen' llabán akre', ka llen akre' di'llen' lloe' Simeón na' ke bda'on. 34Simeón na', bnnabe' rao Dios gonla'ye' leake'. Na'll lle'e Marían': —Ni ke bida'on be'nn zan be'nn Israel ka' kweyi' ake', na' be'nn zan yerá ake'. Lebe' gakbe' to da wroe'n dan' bse'l Diosen' Lebe', na' be'nn zan bi cho'ra'll ake' dan' ben Diosen' ka'. 35Leska' gonbe' nench ga'tbia' nore be'nn lla'a xhbab wen, na' nore lla'a xhbab da bi nak wen. Na' rwe', ka'kze to da látit chaz lo ra'llda'on, katek wallayrao' ke bida'on. 36Leska' bzo to no'r re Ana, Jerusalén na'. Na' Anan' lloe' xti'll Dios, nake' xhi'nn Fanuel, be'nn nak xhi'nn dialla be'nnen' re Aser. Na' ba nake' be'nn gor, gall iz bzorén xhyiwe'n le'e. 37Na' bga'nne' wazeb got xhyiwe'n, ba gok tapralj tap (84) iz. Na' yeo lla bzoteze bzoe' yoda'o braon', lloe'rawe' Dios, llalwille' Dios do lla do yere, na' llone' was. 38Na' goken jabi'ye' gan' ze Josén' ren Marían', na' lloe' yel llioxken ke Dios, na' bzorao lloe' xti'll bida'on rao yeolol be'nn ka' lla'a, lloe'rene' di'llen' yeololte be'nn llbexh, baten' wse'l Diosen' be'nnen' gakrén leake'n. 39Ka bayoll ben Marían' ren Josén' yeolol kan' ne ley ke Diosen', na' zayej ake' Nazaret gan' nbane Galilea. 40Na' Jesúsen' zejze ll-lli'we', na' zejzell llejnie're' tlla tlla, na' ka' llakrente Diosen' Le'e. 41Na' gan' nzi'i Jerusalén na' llon be'nn Israel ka' lnni dan' ne paskw, na' xaxhna' Jesúsen' yeo iz lljake' lnnin'. 42Ka goke Jesúsen' chllinn (12) iz, bche'e ake' Le'e lnni Jerusalén na', kan' llon akse'. 43Ka bde lnnin' baza'a ake', na' bi gokbe'e Josén' ren Marían', baga'nn Jesúsen' Jerusalén na'ze. 44Llak akre' cha' zaza'rene' be'nn ka' yela'. Ba gokte tlla bago' ake' nezen' ka gokbe'e akre', na' bzorao llayirj ake' Le'e radj bi'ch lwellj ake' ka', na' be'nn nombia' akre'. 45Na' bi llallel akre' Le'e, na' babi' ake' Jerusalén na', da yobre llayirj ake' Le'e. 46Bixha bayónn lla kate ballel akre' Le'e lo yoda'o braon', na' llie' radj be'nn si'n ka', llroe' xti'll Diosen', llzenaye' xti'll ake'n, na' llnnabyollre' leake'. 47Be'nn ka' lla'a llzenayen', llabán akre' katken' llejnie're'n, na' kan' llallie' xti'll be'nn si'n ka'. 48Bixha ka bre'e xaxhne'e ka' Le'en, llabán akre', na' goll xhne'en Le'e: —Xhi'nna', ¿bixchen ba benzro' neto' ka'? Xa'on na' ren nada', le ba bdato' bayirjto' rwe'. 49Na'll Jesúsen' lle'e leake': —¿Bixchen llayirjzre nada'? ¿Bi nnézere xchin Xa' na'n llaya'l gona'? 50Bixha xaxhne'e ka', bi byejnie' akre' bixchen golle' leake' ka'. 51Na' ka', zayej ake' Nazareten' zanche'e akte' Jesúsen', na' bzenayteze bzenaye' ke ake'. Na' Marían' kon llone' xhbab lo yichjra'llda'we' kan' llaken. 52Na' ka', blli'o Jesúsen' llejnie're', Diosen' na' ren be'nn ak, llayo'ra'll ake' kan' llone'n.

will be added

X\