San Lucas 17

1Na'll lle Jesúsen' be'nn ka' non Le'e txhen: —Dekz de chaz da xhinnjen' radjren', zan nya'chraz ke be'nnen' wchize' da xhinnjen'. 2Nakteren wen wchej ake' yene'n to yej xhen, na' wza'l ake' le'e lo nisda'o, kerke da gone' bix to bida'o ki nxenra'll nada' gonbe' da xhinnjen'. 3Lewiá, cha' to be'nn lwelljo', bi gonzre' rwe', byej be'rene' di'll nench wayakbe're' bin' bene', na' cha' wayatre', bazi'xhen ke'e. 4Na' cha' gall ras gone' bi da gone' ko'o rao tlla, na' gall ras za'te' ye'e rwe': “Llayatra' kan' bena'n, bazi'xhen kia'”, llaya'l yezi'xheno' ke'e. 5Na'll postl ka', goll ake' Xanllon': —Gokrén neto' nench yezikre wxenra'llto'. 6Na' lle Xanllon' leake': —Chenak dan' llejle're naken ka to nak nbaz ke mostaz, gakte yere yayen' zo ganni: “Bkwas ganni, na' jasó lo nisda'o na'le,” wzenayten keré. 7Leska' bne Jesúsen': —Re' yo'raore llonre, kate be'nn wen llin keré lleje' wawa'nn belle o cha' gop belle, kate llare'e yo' kerén', kere na' llere': “Blle'do gao' xche'.” 8Yezikre llere': “Bsinia'kero' da gawa'; yedawa' na', na'll gao' rwe'.” 9Leska' kere llere': “Llioxkeno'”, kate ba bayoll bsinie' dan' bdaoren'. 10Leska' naken ke re', naore nada', kate ba benre doxhen kan' ba bnia' gonre, kana' nnere: “Be'nn wen llin ke nxhia nakto', gannen' ba bento' dan' bne'o gonto' na'ze.” 11Bixha chak zej Jesúsen' Jerusalén na', bdie' ga zerao nbane Galilean' ren Samaria. 12Ka blline' to lloa' yell da'o, na' blloj chi be'nn llak yillwe' dan' ne lepra, na' jatil ake' Le'e, bze akte' zi'tre, 13besia' ake' lle ake' Le'e: —¡Jesús, Maestro, baya'chra'll neto'! 14Ka bre'e Jesúsen' leake'n, golle' leake': —Lechej rao bxoz ka', na' wia ake' re'. Bixha chak zjake' na'n, bayak ake'. 15Toe', ka gokbe're' ba bayake'n, na' babie' llosie' zillj lloe'rawe' Dios. 16Ka balline' rao Jesúsen', bche'k xhibe' lloe' yel llioxken ke'e, be'nnen' ben ka' nake' be'nn Samaria. 17Ka bre'e Jesúsen' be'nn ti'chen', bne'e: —¿Kere chi be'nn kin' bayak? ¿Gannxha be'nn ga ka' yela'? 18¿Ti'chga be'nn zi't ni, babie' lloe'rawe' Dios? 19Na' lle'e be'nnen': —Bayas, na' bayej, dan' nxenra'llo' na'n, ba basrá rwe'. 20Gok ka bnnabe be'nn fariseo ka' Jesúsen', baten' sorao nnebia' Diosen'. Na'll lle'e leake': —Ke nake sorao nnebia' Diosen', ni ke no gakbe'ze katen' sorawen. 21Ni ke no nneze: “Ganni ba llnebie'”, na' “Ganna' ba llnebie'”. Ba llnebia'kze Diosen' do radjren' nna'. 22Na'll lle'e be'nn ka' non Le'e txhen na': —Wllin lla kate le ye'nere re're la tllaze kan' gon Be'nnen' Gorj Radj Be'nnachen', na' re' bi gak kan' lle'neren'. 23La'kze ye ake' re': “Ba zote' ganni”, o “Ganna' ba zoe'”; bi chejle're ke be'nn ka', na' bi nnao akre'. 24Kan' llak kate llep yes, llo'nnte beni' ken ye chla're yellrio to sete, kan' gakse katen' yeda' nada', Be'nnen' Gorj Radj Be'nnach, katen' llin llan'. 25Na' zga'tek llaya'l wallayrawa', na' be'nn ka' lla'a nna', bi chejle' ake' kia'. 26Kan' gokse ka bzo da Noé, kan' gakse katen' llin lla yed Be'nnen' Gorj Radj Be'nnachen' da yobre. 27Kan' bzo da Noén', llao ake', lle'j ake', llak wchayna'a nile na'le, bllinte lla byo' da Noén' lo barco xhen na', na'll gok yejsi'o xhen, na' blleyi' be'nn ka'. 28Leska' gok kan' bzo be'nnen' golle Lot, llao ake', lle'j ake', llo't ake', lla'o ake', goz ake', baral akllre' bencha'o rill ake'. 29Bixha ka balloj da Loten' yell Sodoman', na' bzorao llyinnj yi' barje, bexj da nak ka yoran, na' bzeyen yeolol be'nn ka' lla'a rao yellen'. 30Ka'kzen' gak katen' yed Be'nnen' Gorj Radj Be'nnach da yobre rao yellrion'. 31’Na' katen' llin llan', cha' to be'nn de'e yichjore, na' lla'a xchinraze lo yo'n, bi llaya'l wayetje' lljaxhi'i xchinraze' ka'. Na' cha' to be'nn zeje' lyi'xe, leska' bi llaya'l wabie' wayej rille'. 32Lelljadinra'll kan' gok ke no'r ke da Lot. 33Be'nnen' ye'nre' yesrá yel nban ke kwine', le'en wnite'n, na' be'nnen' wsanra'lle' yel nban ke'en ni kia' nada', le'en yerá. 34’Ni llnia' re', lle' na' cha' chop be'nn de ake' txhen, toe'n yezi'i Diosen' na' ye toe' ga'nne'. 35Chop no'r lli' ake' llot ake', toe'n yezi'i Diosen', na' ye toe' ga'nne. 36Chop be'nn cha' da ake' txhen lyi'xe, toe'n yezi'i Diosen', na' ye toe' ga'nne'. 37Na'll goll be'nn ka' non Le'e txhen na' Le'e: —¿Gaxhan' gak ka', Xanto'? Na'll lle'e leake': —Na' gonen ka ke be'nnen' ne'e: “Gan' de ba wat na', ganna'n wadopkze chod ka'.”

will be added

X\