San Lucas 16

1Na'll leska' goll Jesúsen' be'nn ka' non Le'e txhen: —Bzo to be'nn wnia', na' bzo to be'nn wen llin ke'e, be'nn nak rallne'e yeolol da de ke'e; bllin lla kate jatao ake' xhia rao be'nn wnia'n, goll ake' le'e, be'nn wen llin ke'en le ll-lleyie' da ka' nak rallne'en. 2Na' be'nn wnia'n goxhe' be'nnen', na' lle'e le'e: “Ba benra' doxhen kan' llono'n. Llaya'l wia' bixhan' llonkzo', zerao nna' gonna' xchino' chet ka'.” 3Na'll be'nnen' bayone' xhbab, na' bne'e: “¿Akxha gona' nna', ba bne xana'n bill gonne' xchina'? Na' kere llak gona' llin war, na' llaye'ra' wnnaba' lmoxh. 4Ba nnezra' to da gona' nench kate xana'n bill gonne' xchina'n, ba zjalla'a be'nn wreb ake' nada' rill ake'n.” 5Na' goxhe' toto be'nn ka' llba'y xhmell xane'n, na'll lle'e be'nn nellen' bllin na': “¿Arke llba'yo' ke xana'n?” 6Na' bne be'nnen': “To gayoa (100) ye's ceiten' llba'ya'.” Na'll bne be'nn wen llin na', nak rallna'a da ka': “Blle'kero', na' de yich ko'on, bzoj da yobre ke chiyonzen na' (50), llba'yo'.” 7Na'll lle'e be'nn wllope: “¿Bixha rwe', arken' llba'yo' ke xana'n?” Na' bne be'nnen': “To gayoa (100) rrob trigon' llba'ya'.” Le bnete be'nnen' nak rallna'a da ka': “Na' de yich ko'on, bzoj ganni tapraljzen na' (80), llba'yo'.” 8Na' be'nn wnia'n, ka gokbe're' kan' ben be'nn wen llin ke'en, llabanre' kwis katek llejnie're', la'kze nake to be'nn wen llin ke nxhia, lle'e xhbab bene' ka'. Na'll bne Jesúsen': —Na' ka', be'nn ka' llo'ra'll dan' de rao yellrio nize, llayirjla'll aklle', akre ka gon ake' gan be'nne, kerke be'nn ka' ba dá rao beni' ke Dios. 9’Na' llnia' re', legonrenteze llin mell dan' de rao yellrion', nench gakrenre be'nne, na' kate llin lla bill gon mellen' llin, ba nlla're be'nn wreb ake' re' yebá ga sore ke chnare. 10’Be'nnen' llone' da lixhej kone da da'o ra't da de ke'e, na' llroe'n ka'kze gone' cha' de da xhen ke'e. Na' be'nnen' bi gone' da lixhej kon ren da da'o ra'ten, ka'kze gone' cha' ga't da xhen ke'e. 11Na' cha' re', bi gonre da nak lixhej kon ren da de kere rao yellrion' da te chelteze, ¿akxha gon Diosen' rallna're da za'kll da bi te ke? 12Na' cha' ke nollre be'nn yobre, bi gapren' bara'nn, ¿akxha wxenra'll no be'nne gonne' re' da nak keré? 13’Nono gak gon llin ren chopre xane' to chi'ze, le cha' ka' gone', wiere' to xan llin na', na' llie're' be'nnen' ye to; na' gone' llin ke toe' do yichj do ra'lle', na' ke be'nnen' ye to, gone'n ka'ze ra'lle'. Ka'kze ke re' bi gak gonre xchin Diosen', na' waráltere gonre llin sera'llre gakre be'nn wnia'. 14Be'nn fariseo ka', nak ake' be'nn llzera'll mell, ka ben akre' kan' bne Jesúsen', bzorao lltitj akre' Le'e. 15Na'll goll Jesúsen' leake': —To wrazren' llonxhen kwinre, na' llonre ka be'nn wen tegar nechkze re'e be'nne, zan Dios nnezre' kwasro ka nak yichjra'llda'oren'. Le de da llake be'nne, naken da wen, zan rao Diosen' naken da zban. 16’Ley dan' bzoj da Moisésen', na' dan' bzoj be'nn ka' be'e xti'll Diosen' kana', benen llin zerao ka bra' Juan be'nnen' bchoa nis. Bzoraozen kan' bra' Juan na', ba llnneze be'nne kan' nak yel llnebia' ke Diosen', na' be'nn zan llon ake'n ga zerao za'k akre', nench nnebia' Diosen' yichjra'llda'o ake'. 17’Ka nak yellrion', na' da ka' llia le' yebán', wllin lla kwiayi' aken, zan ke nak doxhen kan' ne ley ke Diosen', dekz de gak kan' nen na'. 18’Noteze be'nn cha' wsanra'll xho're', na' sie' ye to no'r yobre, llonkze' ka be'nn zo xto. Na' noteze be'nn yechayna'rene' to no're be'nn bsan xhyiwe'n le'e, rebze llonkze' ka llon be'nnen' darén xho'r be'nne. 19’Bzo to be'nn wnia' zre ra'll cha'o llake', na' yeo lla llontekze' ka to lnnire dan' llaocha'we'. 20Na' leska' bzo to be'nn ya'ch re Lázaro, na' blle'teze' bllie' lloa' yo' ke be'nn wnia'n, na' le llie' ye'lle. 21To lle'ne Lázaron' lljatope' bla'a ka', llexj gan' lli' be'nn wnia'n llawe', na' be'kw ake lljale' akba' we'e ke'en. 22Bixha kate got be'nn ya'chen', na' angl ka' bache'e ake' le'e gan' nak to latj wen gan' zo Abraham na'. Na' leska' got be'nn wnia'n, na' bkwa'ch ake' le'e. 23Lo gabil gan' ballín be'nn wnia'n llallayrawe', kate blis rawe'n, na' bre're' Abraham na', ren Lázaron', lla'a ake' to latj na' naken zi'te. 24Na'll besia' be'nn wnia'n zillj bne'e: “Xa Abraham, baya'chra'll nada', bse'l Lázaron' wasbis xhbene'n, na' wakole' ra't rolla'n, le llallayrawa' lo yi'n.” 25Na'll Abraham na', golle' le'e: “Xhi'nna', jadinra'lle, bxhi'o rwe' banez bzo'o yellrion', na' Lázaron' ballayrawe' bxha'kzie', na' nna' llazie' banez, na' rwe' llallayrao'. 26Na' leska' to bdinnj xhen, nla'n lli'o, na' ni ke gakze yedto' gan' lla'ren', ni re' bi gak yedre gan' lla'to' ni.” 27Na'll bne be'nnen': “Ben gokre cha', xa Abraham, base'le' rill xa'n, 28Le nna zo ga'y be'nn bi'cha', na' chixjwe're' leake' nench ke wayed ake' ganni yellayrao ake'.” 29Na'll lle Abraham na' le'e: “Na' dekze yich dan' bzoj da Moisésen', na' dan' bzoj be'nn ka' be'e xti'll Diosen' kana', len wzenay ake' ke chet ka'.” 30Na'll bne be'nnen': “Bi wzenay ake' ka', xa Abraham, zan cha' to be'nn yebane' radj be'nn wat ka', na' we'rene' leake' di'lle, na'll chejle' ake', na' wayechj ake'.” 31Na'll goll Abraham na' le'e: “Cha' bi chejle' ake' xti'll Dios dan' ba dekze, leska' ni ke chejle' akze', la'kze yebán to be'nn wat.”

will be added

X\