San Lucas 13

1Rao lla na', bal be'nn ka' lla'a gan' llroe' Jesúsen', be'rén ake' Le'e di'lle kan' ben Pilaton', bse'le' be'nn bet ake' txhonnj be'nn Galilea ka', kan' lla'a ake' lo yoda'o llot ake' bayi'x lloe'rao ake' Dios, na' bchixe' xchen ake'n ren ke bayi'x ka'. 2Na'll balli'i Jesúsen' xti'll ake'n, lle'e leake': —Llákere cha' dan' gok ke be'nn ka' ka'n, nak aklle' be'nn wen da xhinnjll, kerke be'nn Galilea ka' yela'. 3Kere ka'n; ni llepa' re', cha' re' bi wayátere ke da xhinnj kerén', wllin lla kwiayi're kan' gok ke be'nn ka'. 4Be'nn ka' chi'n chonne (18), got ake' bdekw ake' to ze'e sibe gan' nzi'i Siloé, ¿leska' llákere nak aklle' be'nn wen da xhinnjll, kerke be'nn ka' yela' lla'a Jerusalén na', na'llen' gok ke ake' ka'? 5Kere ka'n; ni llnia' re', cha' re' bi wayátere ke da xhinnj kerén', wllin lla leska' kwiayi're kan' gok ke be'nn ka'. 6Na'll Jesúsen' bsa'krebre' bne'e: —Bzo to be'nne, na' lo re'j ke'e ga naze' uvas, zo to yay higo; na' jawie' cha' llian daxhix, na' bibi llian. 7Na' golle' be'nnen' llap re'jen': “Ba gok chonn iz lladwia' yayen' cha' llian daxhix, na' bikzbi llbian; wenkre bchoyen, ke da zozen nlanen yellrion'.” 8Na' goll be'nnen' le'e: “Xana' kwexhkello ye choll, la ye twiz rize; wche'nnkera' xhane, na' wlla'n be'n. 9Cha' kwian daxhix, na' wkwa'nnllon, na' cha' bi kwiakzen, na'll wchoyllon.” 10Gok to lla, lla llap be'nn Israel ka' bara'nne, byej Jesúsen' lo yoda'on, na' jazejnie're' leake'. 11Na' lli' to no're lo yo'n; ba gok chi'n chonn (18) iz nleo ko'lle', le byo' to daxi'o kwerp ke'en, na' kere gokll waze'e lilla. 12Ka bre'e Jesúsen' no'ren', goxhe' le'e, na' lle'e le'e: —No're, nna' wayako' ke yillwe' ko'on. 13Na'll bxoa ta'k Jesúsen' ko'll no'ren', na' le bazete no'ren' lilla barí ko'lle'n. Na' bzorao lloe'rawe' Dios. 14Na' be'nnen' llnebia' yo'n, goklle'e kwis dan' bayón Jesúsen' no'ren' to rao lla llap ake' bara'nne. Na'll be'nnen' golle' be'nn ka' ni't lo yo'n: —Xop lla llaya'l gonllo llin; rao xop lla ka' yedre, cha' lle'nere wayakre, zan bi yedre lla llapllo bara'nne. 15Na'll Xanllon' golle' be'nnen': —¡Be'nn chop rao ake! La'kze nak lla llapre bara'nne, dekz de llsellre bell keré, burr keré, lljawe'jreba' nis. 16Na' no'ren' nakteke' xhi'nn dialla ke xozxta'ollo, Abraham, ¿kere leska' llaya'l wayelle ke dan' nchej daxi'on le'e ba gok chi'n chonn iz? 17Ka bayoll bne Jesúsen' ka', le llakzbane be'nn ka' llwie Le'en. Na' be'nn ka' yela' llayo'ra'll ake' kwis kan' llone'n, le naken da wen. 18Na' bne Jesúsen': —¿Akre ka wsa'kreba' kan' llnebia' Diosen'? 19Wsa'kreba'n ka nbaz ke mostaz da goz be'nn lo re'j ke'en, na' ke bra'n na', blli'on gokten to yay xhen, na' byinn da'o ka' jachia akba' rawen, ben xo'nn akba'. 20Na'll bne Jesúsen' da yobre: —¿Akre ka wsa'kreba' kan' llnebia' Diosen'? 21Wsa'kreba'n ka kwa binn da bxhi'i to no're, na' bchixe'n trob yezj, na' baslli'on kwa ke yet xtir na'. 22Jesúsen' bzejnie're' be'nne toto yell gan' bdie'n, ka nak zeje' Jerusalén na'. 23To be'nn golle' Le'e: —Xanto', ¿to chopze be'nn ka' yerán'? Na'll golle' be'nnen': 24—Lewe'la'll, lecho'o gan zo reyj yo' dan' ncho'pen, le llnia' re', be'nn zan ye'n akre' cho' ake', na' bi sa'k akre'. 25Na' gonen kate te na', xan yo'n wseje' reyj yo'n, na' sorao gosia're le' reyj yo'n, nnere: “Xanto', bsarj cho'to'.” Na'll ye'e re': “Bi nombia' re', bi nnezra' ga be'nne re'.” 26Na'll sorao nnere: “We'e bdaorenteto' rwe', na' bdate'o broe'ro' xti'llo'n do lao ya'a rallto'n.” 27Na' da yobre ye'e re': “¿Kere ba bnetia', bi nnezra' ga za're? Lewayej ka'le, re' be'nn wen da xhinnj.” 28Kana' kwellya'chre, gaoxoxj layre kate re're Abraham na', na' Isaac, na' Jacob, na' yeolol be'nn ka' be'e xti'll Diosen' kana', lla'a ake' gan' llnebia' Diosen' yebán'; na' re' bi renre. 29Be'nn zan be'nn za'k doxhen yellrio, yellín ake' yebá gan' llnebia' Diosen', na' kwe'rén ake' Le'e lloa' mes ke'en. 30Na' ganni nia' re', be'nn zan nak ake' ka be'nn lliarao nna', wllin lla kat yeyak ake' ka be'nn za'a xhante, na' be'nn ka' nak ake' ka be'nn za'a xhante nna', leake'n yeyak ake' ka be'nn lliarao. 31Na' llak rao lla na', bllin bal be'nn fariseo ka' rawe'n, lle ake' Le'e: —Baxhonnj, bayej do ga yobre, le Herodes na', lle'nre' gote' rwe'. 32Na' lle'e leake': —Lelljayell be'zen': “Ye chop chonn llazen' nna dakza' llabeja' daxi'o yo' yichjra'llda'o be'nne, na' llayona' be'nn llak yillwe', na'tell wayoll xchina'n.” 33Dekz de wasyollkza' gona' dan' llona'n nna', wxe, willj la llintekza' Jerusalén na', le cha' to be'nn lloe' xti'll Diosen' gate', Jerusalén na'kze llaya'l gate'. 34’Re' be'nn Jerusalén, llotre be'nn ka' ba bse'l Diosen' lladzejnie're re' xti'lle'n, na' ba bchekwre leake' yej. Da zan ras gokra'lla' yetopa' re', ka llon to bellj ba nche'e xhi'nne, llatobba' leakba' lo xirba'n, na' bi gokra'llre. 35Na' nna' tach rillren', ga'nnen ka ga nono llra'kze. Ni llnia' re', bill re'kzere nada' llinte lla nnere: “Nbaraz ba za'a be'nnen' nse'l Xanllo Diosen' ganni nnebie'.”

will be added

X\