San Lucas 12

1Na' gok, be'nn zan kwis badop, na' ka nak badop be'nn zan na', to llrejchekw nia' lwellj ake', na'll Jesúsen' golle' zga'tek be'nn ka' non Le'e txhen na': —Lewiaya'nn kan' llon be'nn fariseo ka', llon ake' ka kwa binn dan' llchixe' yezj yet xtiren', nench llonen yet xtiren' nbaraz. To ko'llzen nla' ake' be'nn wen, na' lla'a da xhinnj lo ra'llda'o ake'. 2Le bibi de da nga'che da nello bi wroe'rawe, na' bi de da nello nono yenneze len. 3Na'llen' biteze da nnere ga nga'che, be'nn zan yene len, na' di'll da we're lo yo' keré, leska' be'nn yell nneze len. 4’Ni llnia' re' be'nn nllie'ra', bi llebre cha' be'nn got ake' re', kwerp na'zen' got ake' chet ka', te na' billbi gak gon ake'. 5Ni llnia' re', non' llaya'l llebre, lelleb Dios, Le'en kate ba bake'e yel nban kerén', ye to chi'i wase'le' re' lo yi' gabil, Le'en llaya'l llebre. 6’Lewiake byinn da'o ka', chop chonnze mell lla'ollo tap ga'yba', le bi za'kba' da xhen. Na' Diosen' ni toba' bi nsanra'lle'. 7Rente yich yichjre ka' nrab Diosen'. Na'llen' nia' bi llebre, za'kll re' kerke txhonnj byinn da'o ka'. 8’Ni llnia' re', noteze be'nn cha' wchebe' nnawe' nada', leska' nada', Be'nnen' Gorj Radj Be'nnach, wacheba' nake' nada' txhen rao angl ke Dios lla'a yebá. 9Na' be'nnen' bi wchebe' nnawe' nada', leska' nada' bi wacheba' nake' nada' txhen rao angl ke Dios. 10’Noteze be'nne cha' bi nne bi zille kia' nada', Be'nnen' Gorj Radj Be'nnach, de yel llazi'xhen ke'e; zan cha' to be'nn nne ke Spíritu ke Diosen', kbat yezi'xhen Diosen' ke'e. 11’Kate wche'e akze' re' rao be'nn ka' llnebia' yoda'on, na' rao koxchis, bi we'la'llre akre ka gonre, na' akre ka nnere, 12wzerenkze Spíritu ke Diosen' re', na' wroe'ren re' kan' gonre, na' akre nnere. 13Radj be'nn zan ka' lla'a rao Jesúsen', blloj to be'nn golle' Le'e: —Maestro, goll bi bi'cha'n wla'to' bien dan' bkwa'nn xaxhna'to'n. 14Na' Jesúsen' lle'e le'e: —¿No goll re', nada' llona' yel koxchis, na' ll-la' bi da de ke be'nne? 15Na'll lle'e leake': —Lewiá bi sera'llre bi ga't keré, le kere kon ka da dérellon', ka' ga'tte yel nban kellon'. 16Na' be'rene' leake' to di'll, bne'e: —Bzo to be'nn wnia', de yellrion' ga goze', na' barape' da xhen. 17Na' bene' xhbab bne'e: “¿Akxha gona'? Billbi latj de ga wlla'cha'wa' dan' barapa'n.” 18Na'll bne'e da yobre: “To da gona', yechinnja' yo' gan' nlla'cha'wa' kia'n, na' gona'n da xhenll, na' wlla'cha'wa' dan' barapa'n, na' ren yeolol da de kia'. 19Na'llen' yeyep kwina': Lla nna' bi'cha', bxhi'i banez, we'e bdao, bzo nbaraz, da xhen da yo'cha'o ko' rwe' de da gao' zan iz.” 20Na' Diosen' golle' le'e: “Be'nn ke llejnie', nna' lle' gato', ¿no gao dan' nlla'cha'on?” 21Na' kan' naken ke be'nnen' zera'lle' chraoze bi ga't ke'e yellrio ni, na' bibi yel wnia' ke'e de rao Dios. 22Na'll goll Jesúsen' be'nn ka' non Le'e txhen: —Llnia' re', bi kwek yichjre chraoze da ye'j gaore chak nbanren', leska' bi kwek yichjre chraoze xhara'nre. 23Za'kll yel nban kellon' kerke dan' ye'j gaollon', na' za'kll kwerp kellon' kerke ra'll dan' llakllo na'. 24Lewiake bechj ka', ni ke llaz llarap akzba', ni ke zoze da' xhoa' keba', na' Diosen' llwaokzeba'. Za'kll re' kerke bechj ka'. 25Ni to re' bi gak yesdón kwinre ye tchit, cha' kon kwek yichjzre gakre be'nn tonne. 26Na' cha' da da'o na', nakten da ke nxhia bi llak gonre, ¿bixchen cho'zre billre da zed yobre? 27’Lewiake yej ti'l ka', bibi llin llon aken, ni ke llabzen yere, na' ni llnia' re', ni gaz be'nnen' golle Salomón, ren yel wnia' xhen ke'en, bi gok xhara'ne' nbaraz kan' nak yej da'o ka'. 28Cha' ka' llone Diosen' yej da'o ka', nench llzon nbaraz, la'kze nna'zen' zon, wxe ba byechen, na' cheyen, gontell Diosen' ke re' nench zore nbaraz chenak wxenra'llre. 29Re', bi cho're da zed, ni ke dan' ye'j gaore na'ze, leska' bi gakllejla'llre. 30Le be'nn ki lla'a yellrion', lezen na' yo' yichj ake', zan re', Xare be'nn zo yebá, ba nnézkzere' kan' yálljere da ki. 31Llaya'l kwe' yichjre na' wzenayre ke Diosen', nench nnebie' yichjra'llda'oren', na' yeolol da ka' yálljeren', Dios na'kze gonne'n. 32’Bi llebre la'kze nak to chopzre, Xallo Diosen' ba breje' re', nench nnebia' renre Le'e. 33Lewayo'te bi da de kere, lewe'e be'nn cha' bi yalljre', cha' gonre ka', na'llen' ga't yel wnia' xhen keré yebá da bi te ke, na' da bi kwiayi'. Ganna' nono be'nn wan llra', nono bada'o lla'a wteba'n. 34Le gan' ngo'cha'ore dan' llazra'llre na'n, ganna'n zokze yichjra'llda'oren'. 35’Lesoteze xhnid ka be'nn llbexh sorao gon llin, ba nka'choch le'e, na' dan' llseni' ke'en lla'ltezen. 36Llaya'l gonre ka be'nn wen llin, lla'a ake' llbexh ake' xan ake'n, zeje' ga llak to wchayna'a. Kate yelline'n, na' nne'e, le ze akte' xhnid wsarj ake'. 37Nbaraz ke be'nn wen llin ka', katen' yellín xan ake'n, lljadi're' leake' llnna' ake' yere; da li llnia' re', kana'll gonchie' leake', kwine' wsinie' da gao ake'. 38Nbaraz ke be'nn ka' katen', la'kze llinte llere, na' llinte bale, cha'a ake' xhnid, llnna' ake' yere. 39Leska', lewayón ke xhbab, chenak to xan yo', nnezre' batkren' chej be'nn wan ka' rille'n, da li, ni ke tasze' do yere, le kere we'e latj cho' be'nn wan ka' rille'n. 40Leska' re', lesó xhnid, le katen' llonren' xhbab bi yeda', kana'n yeda' da yobre, nada' Be'nnen' Gorj Radj Be'nnach. 41Na' Pedron' lle'e Le'e: —Xanto', ¿dan' llsa'krebro' da ki naken ke neto'n o cha' ke yeolol be'nnen'? 42Na'll bne Jesúsen': —Naksen ke noteze be'nne, cha' gone' ka to be'nn wen llin be'nn llejnie'; xane'n, bene' rallne'e yo' ke'en, na' bene' rallne'e be'nn wen llin ka' yela', na' kwe'e xhnneze bi llin da llak, na' kate llin hor gao ake' na', wawe' leake'. 43Nbaraz ke be'nnen', cha' kate yellín xane'n, lljadi're' le'e llone' ka dan' bkwa'nne' rallne'e gone'. 44Da li llnia', kana' gone' rallne'e yeolol da de ke'e. 45Zan cha' be'nn wen llin na', nne'e lo yichjra'llda'we': “Cheke wlleje xana'n”, na' sorao chine' be'nn ka' yela', na' ye'j gaoxene', na' sollre'. 46Bixha yellinkze xane' kat lla ke llwie' yelline', kana' wzap xane'n le'e, chintate' le'e, na' wse'le' le'e ga yellayrawe' ga lla'a be'nn ka' bi llzenay ke Dios. 47’Na' be'nn wen llin na', cha' nnezre' kwasro bi dan' llaya'l gone', na' bi llone'n, bi soe' xhnid kate yellín xane'n, na' chintate' le'e. 48Na' be'nnen' bi nnezre' bin' nllia xane'n bia'a gone', na' gonkze' ke da llaya'l chine' le'e, ra'tze chine' le'e, le bi nnezre'n. Le be'nnen' be'e Diosen' le'e da xhen, leska' da xhen wannabre' le'e, na' be'nnen' bxenra'll Diosen' le'e, bene' rallne'e da xhen, leze da xhenll wannabre' le'e. 49’Ka be'nn badxhen to yi' da wzey da de rao yellrio nin' badyena', le lle'nkazra' sorao ga'lnninnen. 50De to da war da gak kia', na' llakra' kwis, llbexha' kate llin lla gak kia' ka'. 51¿Llákere cha' beda' nench be'nn ka' lla'a yellrion' gak ake' toze'n? Ka'a, chopren' gak ake'. 52Soraozen nna', cha' to lo yo' nak ga'y ake', gak ake' chopre, na' chonne' gakyollrene chope', chope' gakyollrene chonne'. 53Be'nn byion' tilrene' xhi'nne' byion', na' xhi'nne' byion' tilrene' xe'en; no'ren' tilrene' xhi'nne' no'ren', na' xhi'nne' no'ren' tilrene' xhne'en; no'ren' tilrene' xhorille', na' xhorille'n tilrene' tawxhi'nne'n. 54Na'll goll Jesúsen' be'nn zan ka' lla'n: —Kate llre're ba ze bej gan' llen willen', na' nere: “Wak yejw.” Na' llakte yej. 55Na' kate llénere dá be' da za'a lle'le, na' nere: “Wak ze'ye nna'.” Na' llakte ze'ye. 56¡Be'nn chop rao ak! Llwiare yebán', na' yellrion', na' llakbe're cha' gak zay o cha' gak ze'ye, na' bi llakbe're bin' ba llak gan' ba zore nna'. 57’¿Bixchen ke llayonre xhbab, akre ka gonre da wen? 58Kate be'nn lljatawe' xhia rao koxchis, llxoa ake' do'l ko'llre, leko' xhnneze ka za llinre rao koxchisen', la'kze ba yo'tere nez, lewe'la'll leko' xhnneze, le cha' llinre rao koxchisen', na' koxchisen' gone' re' rao na' xa'y ka', na' ko' ake' re' lo rill ya. 59Ni llnia' re', kere wabeje' re' cha' bi chixhjre doxhen dan' llba'yre.

will be added

X\