San Lucas 11

1Gok ka zo Jesúsen' to latj ga lloe'rene' Diosen' di'lle, bayoll na' to be'nn ka' non Le'e txhen, golle' Le'e: —Xanto', bsede neto' akren' we'rento' Diosen' di'll, kan' ben Juan be'nnen' bchoa nis, broe're' be'nn ka' bnao le'en. 2Na'll lle'e leake': —Kate we'renre Diosen' di'll, ki nnere: Xa, rwe' llia'o yebá, nak la'y ra'on. Yedchga yel llnebia' ko'on. Gakchga kan' lle'nro' rao yellrion', kan' llak yebá na'. 3Na' dan' gaoto' tlla tlla, bennchgan nna'. 4Na' bazi'xhen keto', kan' llon neto', llazi'xhento' ke be'nn biteze da llon akre' neto'. Bi wsanra'llo' neto', yexjto' rao da xhinnjen', bkwas brekyi'll neto' rao da xhinnjen'. 5Na'll leska' lle'e leake': —Bixha cha' re', zo to be'nn nombia're kwasro, na' chejre rille'n llere, na' yere': “Be'nn nllie'ra', ben gokre brej nada' chonn yet xtir; 6bra' to be'nn nllie'ra' be'nn za'a zi'te, na' bikzbi de kia' wa'a gawe'.” 7Na' be'nnen' walli' kerén' gan' de'e na', ye'e re': “Bi gonro' nada' zede, ¿bi llwia'o ba neyj yo'n, na' ren xhi'nna' ki ba tasto', na' bi gak chasa' gonna'n?” 8Ni nia' re', la'kze bi nnen ke chase' gonne'n, na' dan' zere llchie're na', wyaskze' gonne' dan' llnnabren'. 9Ke len na' nia' re': Lewnnab, cha' bi wnnabre, gonnkze Diosen' len; lechirj, cha' bi chirjre, wllelkzen; lewse'kw, na' wyarjkze cho're. 10Le noteze be'nne bi da llnnabe', wzi'kze'n; na' be'nn llyirje', wllelkzere'n; na' be'nn llnne'e, llsarj akse' ke'e. 11’Cha' re' zo to xhi'nnre, na' wnnábebe' re' to yet xtir, kere we'zrebe' to yej. Cha' wnnábebe' re' to belya', kere we'zrebe' to bele. 12Na' cha' wnnábebe' re' to xchit bellj, kere we'zrebe' to xhban leo. 13Cha' re' naktere be'nn wen da xhinnj, nnézere llaya'l we'e xhi'nnre da wen, gonntell Xare be'nnen' zo yebá, gonne' re' Spíritu ke'en kon cha' wnnabren. 14Bixha gok ka llabej Jesúsen' to daxi'o yo' to be'nn blloj; ka balloj daxi'on, le bannete be'nn bllojen'. Na'll llabanre be'nn ka' lla'n. 15Na' bal be'nn ka' bne ake': —Llabeje' daxi'o ka' kone yel wak ke Beelzebú dan' llnebia' daxi'o ka'. 16Na' ye bale', kon llnnab ake' wroe're' yel wak ke'en, gone' to da gone' le' yebá, nench ga't da wxoa ake' do'l ko'lle'. 17Jesúsen' llakbe'tere' kan' nak xhbab ke ake'n, na'll lle'e leake': —Cha' be'nn lla'a to yell gak ake' chopre, wllin lla kate kwiayi' yellen'. Na' cha' be'nn lla'a to lo yo', nak ake' chopre, leska' wllin lla kate waran ake'. 18Leska' daxi'o ka', cha' nak aken chopre, les bi gak soyib aken scha chet ka'. Le kan' nere llabeja' daxi'o yo' yichjra'llda'o be'nne kone yel wak ke Beelzebún'. 19Cha' naken kan' neren', ¿bixha xhi'nnre ka', bi kone llabej ake' daxi'o ka' yichjra'llda'o be'nne? ¿Kone yel wak ke Beelzebú na'n llon ake' ka'? Leake' wroe' akre', kreren' nak xhbab kerén'. 20Zan cha' llabeja' daxi'o ka' kone yel wak ke Dios, len naken to da llroe' ba bzorao llroe' Diosen' yel llnebia' ke'en gan' lla'ren'. 21’Kate to be'nn war, llape' rille'n kon ren ya, notno gak cho' rille'n. 22Zan cha' llin to be'nn nak be'nn warlle tilrene' le'e, na' gone' le'e gan, na' wke'e ya ke'en dan' nxenra'lle'n, na' wka'te' yeolol da de ke'e, na' chisen we'e be'nn ka' nake' txhen. 23’Be'nn bi llone' nada' txhen, llwiere' nada'n. Na' be'nn bi llakrene' nench wzenay be'nn ka' kia', yezikre llone' nench nono wzenaykze kia'. 24’Kate to daxi'o llallojen yichjra'llda'o be'nnen', na' dan llayirjen ga lljacho'n ga yobre. Na' cha' bi ll-llelen to latj ga yezi'ra'llen, na'll nnen: “Waya'chka' lljawia' gan' balloja'n, cha' gak lljalloa' da yobre.” 25Na'll llayejen lljawian gan' zo be'nnen', na' kate re'ren ra'llda'o be'nnen', naken ka to yo' da nxhi nloa, na' ndachen. 26Na'll lljatopen ye gall daxi'o da llonll ka len, na'll yella'a aken txhen lo ra'llda'o be'nnen'. Na' cha' ka' ba ben ake'n, na'll yezikre gakll ke be'nnen', kere kan' gok ke'e kana'. 27Chak lloe' Jesúsen' di'll ki, to no'r ren radj be'nn ka' lla'a llzenay xti'lle'n, bnne'e lle'e Jesúsen': —Nbaraz ke no'ren' bxhan rwe', na' bwa'lle' rwe'. 28Na' bne Jesúsen': —Nakllen nbaraz ke be'nnen' llzenay xti'll Diosen', na' llone'n. 29Na' ka badop be'nn zanll kwit Jesúsen', na'll lle'e leake': —Be'nn ka' lla'a nna', nak ake' be'nn wen da xhinnj kwis, llnnab ake' to da gona' nench wroe'ra' yel wak kia'n, na' chejle' ake' kia'; zan bi gak kan' llnnab ake'n, toze kan' gok ke da Jonás be'nnen' be'e xti'll Diosen' kana', ka'kzen' gak kia'. 30Ka dan' gok ke Jonásen', len na' bre'e be'nn Nínive ka', na' bayakbe'e akre' Diosen' bse'l le'e. Ka'n gok ke'e na', ka'kzen' gak kia' nada' Be'nnen' Gorj Radj Be'nnach, na' gaken to da re'e be'nn ka' lla'a nna'. 31No'ren' bnebia' yellen' re Sabá, kate llin lla gak yel koxchis ke yeolol be'nne, wabanrene' txhen be'nn ki lla'a nna', na' wchoybie' ke ake', le le'en zi't kwis bede' badzenaye' yel si'n ke da Salomón na', na' nada' za'ktella' kerke Salomón na'. 32Be'nn Nínive ka', kate llin lla gak yel koxchis ke yeolol be'nne, wabanrén ake' be'nn ki lla'a nna', na' wchoybia' ake' ke ake', le leake'n ka ben akre' xti'll da Jonásen', bayat akre' ke da xhinnj ke ake'n, na' nada' za'ktella' kerke da Jonásen'. 33’Ni to be'nne kate wxhenze' to yi', wkwa'chze'n o cha' wdo'sze'n to llom, zan llde'en sibe nench llseni'n ke yeolol be'nne. 34Yejraore llian naken ka to beni' nench re're. Cha' bibi llaken, llre'kzere kwasro. Zan cha' yejraoren' bi naken wen, doxhenre ncholen chet ka'. 35Lewiaya'nn ke nnebia' da xcholen' re', lewe'e latj cho' beni' ke Diosen' yichjra'llda'oren'. 36Cha' bill yo'llo ni ra't da xcholen', na' doxhen yichjra'llda'ollo yo'n beni'n ke Dios, kana'llen' chejnie'llo kan' nak xhnnez Diosen', gonen ka'kze ga llseni' to yi' xhen rao nezen'. 37Ka bayoll be'e Jesúsen' di'll ki, to be'nn fariseon' bene' Le'e yexh rille' lljatawe'. Ka byo' Jesúsen' rill be'nnen', na' bllie' gan' gao ake'n. 38Be'nn fariseon' llabanre' ka bre're' kere bna'a ta'k Jesúsen' zan ras, kan' llon leake'n ka nak gawe'n. 39Na'll goll Xanllon' le'e: —Re' be'nn fariseo ake, ka be'nn llayib to ko'llze tas ye'nnen' llonre. Yichjraozren' nak yall, zan lo yichjra'llda'oren' lla'n da ke nxhia, llzera'llre bi da de ke be'nne. 40¡Be'nn ke llejnie'n nakre! ¿Kere Diosen' be'nnen' ben yichjraoren', lekze Le'en bene' yichjra'llda'oren'? 41Lewe'e lmoxh, legakrén be'nne, na'llen' gakre yall doxhenre. 42’¡Nya'chraz ke re' be'nn fariseo! Lloe're Diosen' to ra't wej rao chi kwen ke yeolol da da'o bixhj, ke nak no yixh kwan da llazi're lo re'j keré, da ka' nzi'i menta na' rud, na' llbej yichjren' gonre da nak lliarao, ka nak dan' llie'llo Diosen', na' gonllo da wen. Da li da llaya'l we're da ki, na' bi wsanre yel nllie' ke Diosen'. 43’¡Nya'chraz ke re', be'nn fariseo! Re' ll-lanre siy nell ka' ni't lo yoda'on, na' do lao ya'a, llawere we'rao be'nn re'. 44’¡Nya'chraz naken keré llsedre ke ley dan' bzoj da Moisésen', na' re' be'nn fariseo! ¡Nakre be'nn chop rao! Re' nakre ka ba ke be'nn wat, da bi nla'; be'nn dá rawen', ni ke llakbe'e akzre' akre nak loe. 45Na'll to be'nn ka' llsedre ke leyen' golle' Jesúsen': —Maestro, rente neto' lla'dyi'o ne'o ka'. 46Na'll lle Jesúsen' le'e: —Leska' re' llsedre ke leyen', nya'chraz ke re', ka nak llroe're leyen' be'nn yobre, llonren' ka to yoa' zi' da bi llzoe akre', na' re', ni ke llda'ba'yzre la kanzeren. 47’¡Nya'chraz ke re', ka nak llayoncha'ore rao ba ke be'nn be'e xti'll Diosen' kana', le xozxta'ore ka'n bet leake'! 48Kone ka' llroe're naksre xozxta'ore ka' txhen, le leake'n bet ake' be'nn ka', na' re' llayoncha'ore ba ke ake'n. 49’Ke len na', rao yel si'n ke Diosen' bne'e ka'n batna'te: “Wse'la' be'nn chixjwe' xti'lla'n, na' be'nn nne lo raza', bal ake' got ake', na' ye bale' ko' ake' rill ya.” 50Re' llonre kan' bne'en, na' re' lla'a nna' yellayraore, ni ke xchen be'nn ka' bet ake'n, kan' bxhe yellrio llinte nna' lla. 51Da bzoraozen kan' bet be'nnen' re Caín bi'che'n re Abel, bllinte kan' gok ke Zacarías, be'nnen' bet ake' radj yoda'o za llinl-llo gan' zo bkoyen', re' lla'a nna' yellayraore ke yeolol be'nn ki goten'. 52’¡Nya'chraz ke re' llsed llroe' leyen'! Re' ll-lanre nnézere yel si'n ke Diosen', ni re' bi nnézeren kwasro, na' be'nn llazra'lle' nnezre'n, bi lloe're latj nnezre'n. 53Ka bayoll be'e Jesúsen' di'll ki, be'nn fariseo ka', na' be'nn ka' llsedre ke ley dan' bzoj da Moisésen', bzorao zi'chi'll ake' Le'e, na' llbej ake' Le'e di'll. 54Na' ka' lli'nao ake' bi di'llen' lloj lloe', nench sa'ke gao ake' xhia ke'e.

will be added

X\