San Lucas 10

1Bde na', Xanllon' breje' wyon chi be'nne, na' golle' leake' kwiarao ake' rawe'n, na' chej chop wej ake' toto yell gan' za tie' na'. 2Na' lle'e leake': —Da li nia' re', ka be'nn gon wrapen' gonllo, da xhen llin na' de, na' to chopze be'nn wrap ka' nak. Lennabe Dios be'nnen' nak xan llin na', wse'le' yezikre be'nn wen llin rao llin na'. 3Lechej, ni llse'la' re', ka llse'le' xhi'r da'o radj be'kw yi'o. 4Bi go'xre bzod ni mell, ni ye chkwe' xher-re, na' bi sezre scha wapre be'nn lliox tnez. 5Yo' gan' llinre, ka cho'ren' zga'tek nnere: “Sochgare wen.” 6Cha' lo yo' na' zo to be'nn nak ra'llda'o wen, gonkze Diosen' gak wen ke'e. Cha' nono llra' be'nn nak ra'llda'o wen, bi gak kan' yeren'. 7Yo' ga llinre, ganna'ze sore, ye'j gaotezre kon da gonn ake'. Ka to be'nn wen llin llaya'l si'kze raxhje', ka'kze ke re'; bi tasre toto yo'. 8Cha' to yell ga llinre, kon da gonn ake' llaya'l gaore. 9Lennab yeyak cha' be'nn llak yillwe', na' leyé ake': “Ba bllin lla re'llo kan' llnebia' Diosen'.” 10Cha' to yell ga llinre bi wreb ake' re', lechej do lyell, leyé ake': 11“Bichte dan' bllia lo nia'to'n rao yell keré na', llabibto'n nench waxhoan ko'llre, na' llaya'l nnézere ke yel llnebia' ke Diosen', ba bra' rao rallren'.” 12Ni llnia' re', kate llin lla gon Diosen' yel koxchis ke yeolol be'nne, da xhenll yellayrao be'nn ki, kerke be'nn Sodoma ka'. 13’¡Nya'chraz ke re' be'nn Corazín! ¡Na' nya'chraz ke re' be'nn Betsaida! Chenake broe'ra' be'nn ka' ni't yell ka' nzi'i Tiro, na' Sidón yel wak kia'n ka dan' ba broe'ra' re', batna' ba bayechj ake' banao ake' Diosen' chenake, na' llak ake' to ra'll gasj da nak ze'ch, na' llwazj kwin ake' no de da llroe'n ba bayat akre' chenake. 14Kate llin lla gak yel koxchis ke yeolol be'nne, da xhenll yellayraore kerke be'nn Tiro, na' be'nn Sidón ka'. 15Na' re' be'nn Capernaum, llákere ba zekzre yebá, ga lle'le gor waza'le' re', ga yellayraore. 16Na'll lle'e be'nn ka' non Le'e txhen: —Be'nn wzenaye' xti'llren', kia' nadkza'n wzenaye' chet ka'; na' be'nnen' bi wzenaye' xti'llren', kia' nadkza'n bi wzenaye'. Na' be'nnen' bi wzenaye' kia' nada', ke Dios be'nnen' bse'l nada'n, bi wzenaye' ke chet ka'. 17Bixha gok kate ballín be'nn wyon chi ka', llawé akre' ballín ake', lle ake' Jesúsen': —¡Xanto', rente daxi'o ka', llzenay aken keto' kate llwa'lto' ra'on! 18Na'll lle Jesúsen' leake': —To bre'kazra' llaz daxi'on lle'le, ka llaz yi' bzi'o ka nak llnit yel llnebia' ken. 19Ganni llonna' re' yel wak, nench wrejchekwre no bele, no xhban leo, na' wrejchekwre doxhen yel wak ke da lle'ne wlliayi' lli'o, na' re' bibi gákere. 20Na' bi wawétekere, ni ke dan' llzenay daxi'on keré, zan leyewé le ba nllia Diosen' raren' le' libr ke'en yebá. 21Rawe na' bawé Jesúsen', ka nak zorén Spíritu ke Diosen' Le'en, na' bne'e: —Lloe'rawa' rwe' Dios Xa, rwe'n llnebia'o yebá na' yellrion', bkwa'cho' da ki, bi byejnie' be'nn si'n ka' len, na' broe'ro'n be'nn nak nexjra'lle. Beno' ka' Xa, le ka'n byo'ra'llo'. 22’Yeololte da de, Xa'n ba bene'n rallna', na' nono nombia' Xhi'nne'n, toz Xa' na' nombie' Le'e, na' nono nombia' Xa'n, toz nada' nak Xhi'nne' nombie', na' kon no llbeja' nada' llroe're' kan' nak Xa'n. 23Na' bayechje' golle' be'nn ka' non Le'e txhen to wraz akze': —Nbaraz ke re' llre're nada', na' da ka' llona'n. 24Le be'nn zan be'nn be'e xti'll Diosen', na' be'nn llnebia' blla'a kana', le gokra'll ake' re'e akre' ka da ka' llre're nna', na' bi bre'e akre'n; na' le gokra'll ake' yen akre' ke dan' llénere nna', na' bi ben akre'n. 25Na' bzolla'a to be'nn llsed llroe' ley dan' bzoj da Moisésen', gokra'lle' kweje' Jesúsen' di'lle, lle'e Le'e: —Maestro, ¿Bi llaya'l gona' nench ga't yel nban zejlikane kia'? 26Na'll lle Jesúsen' le'e: —¿Akxha nyoj le' leyen'? ¿Akre nen? 27Na'll be'nnen' llejnie' leyen' kwasro bne'e: —“Llie'ro' Dios do yichj do ra'llo', na' llie'ro' be'nn lwelljo', ka'kze nllie'ro' kwino'.” 28Na'll Jesúsen' lle'e le'e: —Da li kan' bne'on, ka'n ben, na'll bano' zejlikane. 29Na' be'nnen', gokra'lle' wroe're' dakze lixheje, na' lle'e Jesúsen': —¿Ka noxha be'nnen' nak be'nn lwellja'n, na' llie're'? 30Na'll bne Jesúsen': —To be'nn bze'e Jerusalén, na' zeje' Jericó, bixha gok bllayre' be'nn wan, na' bka'a ake' bi ke'e da nse'e, ben ake' zi' ke'e, na' bkwa'nn ake' le'e tnezen' ye zre ke bet akze' le'e. 31Ka' goken, kate bde to bxoz tnezen', ka bre're' be'nn we'en, na' bdie' ye chla're nezen' zejze'. 32Na'll bde ye to be'nn ka' nzi'i levita, lle'nen nen be'nn llakrén lo yoda'o, leska' ka bre're' be'nn we'en, le bdete' ye chla're. 33Bixha to be'nn Samaria, bdie' tnezen'; ka bre're' be'nn we'en, baya'chra'lle' le'e. 34Na' jabi'ye' kwite', na' bdibe' we'e ke'en, btope'n ceit, na' bllone'n xis uva, na' bene'n rmell, na' bcheje'n to ra'lle. Na' blene' le'e bllie' le'e ko'll burr ke'en, na' bche'e le'e ga zo to yo' ga lltas be'nn yo' nez. Ganna' basyolle' bwie' le'e. 35Bateyó ka yewe' nezen', breje' chop mell dan' nzi'i denario, na' be'en xan yo'n, lle'e le'e: “Ben gokre bwia be'nnen', cha' billre da gono' gaxt, na' wayixhja'n kate zaza'a na'.” 36Na'll goll Jesúsen' be'nnen': —Bnechk rwe', ¿nore be'nn ki chonne, gokre' ke be'nnen' bran ake'n nake' be'nn lwellje'? 37Na' bne be'nnen' llsed llroe' leyen': —Be'nnen' baya'chra'll be'nn we'en bran ake'n. Na'll lle Jesúsen' le'e: —Lekze ka'n llaya'l gono' rwe', waya'chra'llo' yeolol be'nne. 38Na' Jesúsen' bawe' nez da yobre, na' bllin ake' to yell, na' rao yell na', zo to no'r re Marta, na' bene' Jesúsen' yexh cheje' rille'. 39Na' zo to bir Martan', na' re María, na' Marían' le blle'te' xhnia' Jesúsen' llzenaye' xti'lle'n. 40Na' Martan' llaral-llre' llsinie' da gao ake', kate jabi'ye' kwit Jesúsen', lle'e Le'e: —Xana', ¿bi llakbe'ro' bi bira'n toza' bkwa'nnbe', llsinia' ganni? Gollbe' gakrenbe' nada'. 41Na'll Jesúsen' lle'e Martan': —Marta, Marta, le lli' yichjo' dan' llsinia'on, na' llakllejla'llo' dan' nyan da zed ko'on. 42Zan toze da de da nak lliarao gonllo, len na' ba brej Marían' llone', na' nono gak waka'a len.

will be added

X\